ھلاریں گجو

ھلاریں گجو

جاوید بلوچ

دنیا وڑ وڑءَ رنگ مٹ کنت ءُ آ دگہ مردم ھمے مٹ اتگیں

 رنگاں جتائیں وڑاں بُنگپ جوڑ کن انت ءُ آہانی سرءَ تژن ءُ بچکند یا سیاسی ءُ لیکہی رنگءَ زہرشانی کن انت بلے مئے گورءَ چشیں ربیدگ پمیشکہ نیست کہ ما جیڑگ ءُ جُست کنگءَ ھم دگرانی چمدار انت۔

چاگردی رسانکدرءِ ھالانی ردءَ بلوچستانءِ تیاب دپی میتگ گنزءِ دریاورداں ھلاریں گجوءِ ھلاپءَ زہرشانی کتگ۔ ھلاریں گجو پمے ھاترءَ کہ اے گجوءِ جنوک درآمد نئینت ءُ اشییءِ ھلاپءَ توار چست کنگءَ سیاسی، کوم پرستی ءُ ھال رسانکءَ ھچ وڑیں شملگ نہ رسیت کہ اودءَ زہرشانی کنگ یا وتءَ بزگ کنگءُ پیش دارگ بہ بیت۔ چد ءُ پیسر ما درآمدانی گورءَ پہ تژن ھلاریں ناچ، ھلاریں شراب ءُ ھلاریں دگہ نام اِشکُتگ انت بلے مئے گورءَ ھلاریں زلم، ھلاریں چاپلوسکی، ھلاریں دروگ بندی، ھلاریں دگہ سک بازیں ٹرمز ءُ کار ھست انت کہ آہانی سرءَ گپ کنگ  ھرام انت۔

گنزءِ کسانکیں آبادی دیر انت کہ لجرءِ شکارءِ ھلاپ زہرشانی کنگءَ انت کہ لجر مزنیں کساسےءَ کشگ ءُ شکار کنگ مہ بیت کہ چر اشیی ءَ مزنیں ماھیگ زرءَ نیا انت ءُ آہانی روزگارءِ ھمرائیءَ زرءِ ساہدارانی نسل کشی ءُ مزنیں ماھیگانی گیمءَ پہ دریا سنٹ بیت۔ بلے بلوچاں گُشتگ کہ "بگاءِ دست مدام وتی گوہارءِ پندولءَ رسیت" پمیشکہ بلوچستانءِ مستریں تیاپ دپی دریاوردانی روزگارءَ ءُ زرءَ اگاں ڈنی ءُ درآمدیں گجو  سنٹ کُت کن انت گڑا اے بلوچیں دریاورد وتیگانی کسانکیں میتگاں پرچہ زوراکی کت مہ کن انت؟

گنزءِ دریا وردانی ھکءَ آ دگہ مزنیں شھرانی دریاوردانی گَل ءُ کارکنوک ھم توار پرچہ نہ بنت ءُ اے ھکمءَ پرچہ جاری نہ کن انت کہ درستیں دریاورد جلادی مہ کن انت ءُ اے کسانیں زری ساہدارانی سرءَ رھم بکن انت تا بلوچ زر چہ سنٹ بوئگءُ ڈکالیءَ بہ رکیت؟ بلے کے اے جارءَ بجنت؟ ھما مزنیں شھرانی دریاوردانی گَل کہ چو بلوچءِ نودربر گلانی وڑءَ الپءَ بگر تا یا بھر بھر ءَ ٹُکر انت۔ ھما کہ آہانی سلتنت ڈوریا ءَ بگر گزروانءَ کُٹیت ءُ پدا گزروانءَ بگر تا بلوچ وارڈءَ دگہ یکےءِ سلتنت بندات بیت؟ انچش انت ناں؟

ھؤ منی ءُ تئی نِزءَ انچش انت بلے اسلءَ اے وڑ اوں نہ انت۔

انچش کہ مارا گُشگ بیت کہ ڈنی گجو چہ آزمانءَ نئیا انت اشاں گوں ادارگ، سروک ءُ نمائندگ ءُ ھندی واکدار درست ھور انت پمیشکہ گجوءِ جیڑہ چو کشمیرءِ مسئلہءَ اسل ھل نہ بیت ھمے وڑ بیا ھساب بجن ءُ بچار درستیں تیاب دپی دمگی میتگانی میر ءُ واجہ کار، سیٹ ءُ بکار ءُ پیکٹریانی مالک، دریاوردانی گَل ءُ میدانی سروک، پدا واکدار، درستانی سرءَ سادے سادے بند ءُ سادءِ سرءَ بگر روان کن بچار کجام بیٹک، جھگہ ءُ یکیں واجہ کارءِ کرا رو انت ءُ سادانی سر ھور بنت۔

پمیشکہ دریاوردانی بھر ءُ بانک بوئگ ابہکئی ھبرے نہ انت ءُ ناں کہ گنزءِ دریاوردانی زہرشانی مزنیں گپے کہ پہمگ مہ بیت۔ بلے ھؤ گنز یک کسانکیں میتگے کہ وتی روزگارءِ جُستءَ کنگءَ انت بلے جیونیءَ بگر تا گڈانی سرجمءَ کہ زوراکءَ موہ رسیت آ وتیءَ کنت گڑا گپ ھما انت کہ جندے پرچہ مہ کنت؟

دریا وردانی جیڑہ چو مئے آ دگہ جیڑہاں پمیشکہ گستا انت کہ دریاورد ھما پوریاگر بیتگ کہ بزگ وَ بیتگ بلے شُدیگ باز نہ بیتگ پمیشکہ اشاں وتی چک پمے ھاتر ءَ نہ وانیتگ انت کہ بگندئے شدیگ مہ بنت بلے مرچی شدیگ انت۔ پدا مئے ماھئیگیرانی یک جیڑہے اِش انت کہ مئے یوریاگرانی توار چست کنوک یا مھنت کشانی ایکٹویسٹ بیچارگ ھم لاہور ءُ کراچیءِ "میرا جسم میری مرضی" والا سوشلسٹاں چہ متاسر انت کہ آہانی کرا دریاوردی پوریاگریءِ ھچ پہم نیست۔ اے آہانی سرگءَ ھچ وڑ نہ پُتر ایت کہ دھکان کاری، آسن کاری، گلکاری ءُ پیکٹریانی تہا کارکنوکیں پوریاگرانی وڑءَ دریاورد ھم بزگیں پوریاگراں ۔ پمیشکہ مئے سوشلسٹ ھم بیچارگ پوریاگرءِ نامءِ گرگءَ گوں داس ءُ ہتھوڑیءَ یات کنت بلے ماھور آئیانی سرگءَ نہ پُتر ایت۔ نوں کے پہ اشاں توار چست بکنت؟

ھؤ مرچگیں دریاوردے کرا یک وش بھتیے ھست اگاں ھوش بکنت۔ مرچی جیونیءَ بگر تا گنز، پشکان، پدی زر ءُ دیمی زر، سُر بندن، کپر، پسنی ءُ کلمتءَ بگر تا اورماڑہ ءُ گڈانی ہر میتگءَ یک دریاوردی چُکے الم در کئیت کہ آئیءَ ھمے دریاءِ زراں چہ بے منت ءُ بے پاد چُکی وتی پتءِ ھیدانی برکتءَ دگہ شھراں شُتگ ونتگ ءُ وتی وانگ سرجم کتگ۔ آ پہ دریاورداں اگاں جُنزے زرمبینت نہ کن انت بلے وتی جیڑہاں پہ یک پتیں پترے و جوڑ کت کن انت۔ چہ واجہی چاپلوسکی ءُ سوشل میڈیاءَ اکس کشیءُ پدا توسیپی نوکریءَ سر بگوزیت گڑا وتی جیڑہاں پیش داشت و کن انت۔ جُست کُت و کن انت۔ اگاں ڈنی گجوہاں داشت نہ کن انت بلے ھلاریں گجو ءِ ھلاپ زہرشانی و کت کن انت۔ ھندی بکاراں مکن کت و کن انت کہ دریاءَ سنٹ کنگءَ بدار انت۔ باور کن! اگاں اینچو بکن انت گڑا مات انت کہ ڈنی گجو گوں توکی واجوکاں ھم شور بہ بنت ءُ روچ رامانی دزی بکن انت بلے ھؤ پیسرءَ ھلاریں گجوءِ کربانی اوں دئیگ المی انت۔