"پریکٹیکل بئیگ" اے دور ءَ آشوبی زرمبشت ءَ ھور بیگ ءَ گش اَنت۔

نبشتانک : پَزیل اَزگر

رجانک: عبدالحئی

 ملک (پاکستان) دیوالیہ بِیتگ بلے آئی ءِ سرکاری اعلان انگت پش کپتگ۔ سدانی کچّ ءَ پیکٹری بند بوتگ ءُ  ھزارانی کچّ ءَ پوریاگِر بیروزگار بیتگ اَنت۔ نوجوانانی مزنیں کچّے ملک ءَ یل دیگ ءُ تَچگ ءِ کوشست کنگ ءَ اِنت۔ ھاس نودربر ءُ نوجوانانی مزنیں کچّے بیروزگار بیتگ ءُ نوکیں روزگار نیست۔ اے وھدی ھرکسی زھن ءَ  اے جُست تَرّگ ءَ اِنت کہ "باندا چے بیت؟"

ھمود ءَ کہ یک نیمگے کروڑانی کچ ءَ پوریاگر مھلوک شد، بیروزگاری، بے الاجی، زلّت ءُ  بے وسی ءِ  تہ ءَ برباد بیگ ءَ اِنت ءُ دومی نیمگ ءَ ھکمران وتی مڈّیانی گیش کنگ ءِ  ھاتر ءَ چو ھڑکائی کچکانی وڑ ءَ جنگ ءَ اَنت۔ ھڈّ کسان بیگ ءِ سبب ءَ ایشانی جنگ ءُ چوپ ھم روچ پہ روچ ءَ گیش بیگ ءَ اِنت۔ سرمایہ دار تبکّ، جرنل، جج، سِوِل اپسرشاھی، سیاسی پارٹی، میڈیا ءِ  اینکرز، دانشور کلاڑی، اداکار ءُ سرجمیں ھکمران تبکّ ءُ آئی ءِ داشتگیں کچک اے وھد ءَ یک دگرے ءِ سر ءَ راشگ ءَ گوں ھوار   یک دگرے ءَ وَرَگ اَنت ھم ۔پی ٹی آئی، نون لیگ، پیپلز پارٹی ءُ  اسٹیبلیشمینٹ ءِ بازیں گروپ ءِ جنگ اِیش اِنت کہ گیشتر زر ءُ مڈّی کے مُچ کنت ءُ وارت۔

پد ءَ ھم ھکمران تبکّ ءِ تہ ءَ لھتے سنگینی ءِ نیمگ ءَ شر زانت ءُ سرپد اِنت کہ اے جاور ھال یک مزنیں زرمبشتے پیداک کُت کنت ءُ ایشی ءِ سبب ءَ آ  سک تُرسگ ءَ اَنت ھم۔ ھمے ھاتر ءَ ھم روچ ٹی وی چینل، روتاک، یونیورسٹی، سیمیناراں گوں ھور مزنیں شھرانی تہ ءَ سیمینار ءُ مراگشانی تہ ءَ پیسریگیں ھکمرانانی پالیسیانی سر ءَ شرگداری کنگ بیگ ءَ اِنت۔ ھاس ملک ءِ مئیشت ءِ سر ءَ بازیں سیشنے ایر کنگ بیگ ءَ اِنت بلے ایشی ءِ مول ءُ  مراد ھم ایش اِنت کہ نوجوان ءُ پوریاگِراں رَد بدے کہ جیڑہ سرمایہ دارانہ نظامے نہ اِنت بلکیں ھما ھکمرانانیگ اِنت کہ ایشی ءَ ھلّائینگ ءَ اَنت ءُ دگہ نوجْوان ءُ  پوریاگراں سرمایہ دارانہ نظام ءُ سرمایہ دارانہ ریاست ءِ  ھلاپ چہ بگاوت ءَ بدار اَنت۔ اے مراگشانی تہ ءَ ھکمرانانی داشتگیں دانشور ملک ءِ مئاشی پالیسیانی ردی ءِ سر ءَ وَ سک باز شرگداری کن اَنت بلے کس ھم اے جست ءَ نکنت کہ اے ملک ءِ تہ ءَ یک نیمگے کروڑانی کچّ ءَ مھلوک بیروزگار اِنت ءُ لکّانی کچّ ءَ مردم گُژنگ اَنت گڑا یک درسد جرنل، سرمایہ دار، جاگیردار، جج ءُ بیوروکریٹانی دولت چون گیش بیگ ءَ اَنت ؟ اگاں ملک گَپچَل ءِ تہ ءَ اِنت گڑا درستاں گَپچل ءِ تہ ءَ بیگ لوٹیت، تھنا پوریاگِر پرچا؟ ءُ  کس اے گپ ءَ ھم نکنت کہ ھمے یک درسدیں مردمانی بے کساس دولت ءَ ریاست پچ بگپت ءُ سرجمیں مھلوک ءِ دیمروی ءِ ھاتر ءَ کارمرز بکن اِت۔ گڑا سرجمیں جیڑہ ھلاس بیت کن اَنت۔ درستاں چہ پیش اے داشتگیں دانشورانی کوشست ایش انت کہ اے نظام ءُ ریاست ءَ نمیران بکن اَنت ءُ پیش بدار انت۔ پوریاگِر ءُ نوجْواناں اے سوج بدینت کہ ھرچ شرّی یے کہ بیت ھمائی ءَ تھنا ھمے سرمایہ دارانہ ریاست کت کنت۔

ھمے وڑ گوں مزنیں شیواری ءَ پوریاگِر ءُ نوجوانانی دل ءُ دماگ ءَ اے گپ نادینگ ءِ کوشست کنگ بیت کہ اگاں ریاست ءِ سر ءَ "شریں ھکمرانانی" ھکومت بئیت گڑا سرجمیں ملک شر بیت بلے ما سوشلسٹ اے سرپد بہ ایں کہ مروچی پاکستان وتی جاہ ءَ بلے دیمروی کتگیں دنیا ءِ  ریاست ءُ ھکمران تبکّ ھم بیروزگاری، گران نھادی ءُ  گُژنگی ءَ کم کت نکنت بلکیں ایشاں  انگت گیشتر گیش کنت اسلی ءَ اے سرمایہ دارانہ نظام ءِ نامیاتی بزاں کہ کِشتگیں گَپچل اِنت کہ دنیا ءِ سر ءَ اوشتاتگ۔ مروچی تھنا سوشلزم بزاں منصوبہ بند مئیشت ءِ تہ ءَ چاگرد دیمروی کت کنت۔ 

راستی ایش اِنت کہ ما یک تبکّی چاگردے ءَ نشتگ اِیں، ایشی ءِ تہ ءَ یک سرمایہ دار تبکّے  ھست انت ھما چاگرد ءِ سرجمیں دولت ءُ  پیداوار ءِ سر ءَ اوشتاتگ ءُ دومی نیمگ ءَ پوریاگِر تبکّ ءِ مھنت ءَ سرمایہ دار دُزّیت وتی دولت ءَ گیش کنت۔ ھمے وڑ پاکستان ءِ سرمایہ دار تبکّ ھم اے تُرسناکیں مئاشی گَپچل ءِ سجھیں گرانی ءَ  پوریاگِر ءِ  بڈّ ءَ دیگ ءَ اِنت۔ ٹیکس ھمے یکّیں تبکّ ءِ سر ءَ جنگ بیگ ءَ اِنت ، پوریاگرانی پگار ءِ تہ ءَ کمی کنگ بیگ ءَ انت، ادارگ پرائیویٹائیز کنگ بیگ ءَ انت، نودربرانی زرانی تہ ءَ گیشی کنگ بیگ ءَ اِنت ءُ دگہ۔ بلے درستیں چاگردانی  وڑ ءَ پاکستان ءِ سرمایہ دار، ھکمران تبکّ ءُ ریاستی اشراپیہ کساس ءَ سک کم انت دومی نیمگ ءَ  پوریاگِر کساس ءَ سک باز انت تھنا اے گپ نہ اِنت بلکیں پوریاگِر ءِ پوریا ءِ سر ءَ اے سرجمیں چاگرد دیم ءَ جُنزگ ءَ اِنت۔ ٹرانسپورٹ، الاج، درس، شھرانی ساپ کَنگ، پیکٹری ءَ کار کنگ، کشت ءُ کشاری کَنگ سجھینانی سجھیں ادارگ پوریاگِر ءِ  پوریا ءِ سر ءَ جُنزگ ءَ اَنت۔ ایشی ءِ بزانت ھمیش انت اگاں پوریاگِر وتی دستاں بداریت گڑا سرجمیں چاگرد اوشت ءِ آماچ بیت گڑا اِنچو تاکت ءِ بیگ ءَ پد ھم چون یک درسد ءِ ھکمران سرجمیں آسراتیانی سر ءَ ایوک ءَ اوشتاتگ ءُ پوریاگِرانی پوریا ءَ پہ وتی دولت ءِ گیش کنگ ءَ کارمرز کنگ ءَ اَنت۔

ایشی ءِ سبب ایش انت کہ اے ریاست ءِ  سورت ءَ آیانی، بزاں کہ سرمایہ دارانی گور ءَ یک منظمیں سِلاہ بندیں ادارگے ھست اِنت ءُ آ  تاکت ءُ  زور ءِ سر ءَ وتی ھکمرانی ءَ  برجم دارگ ءَ اِنت۔ گڑا چے؟  پوج،  پولیس، ءُ ادالتاں گوں اے کروڑانی کچ ءَ پوریاگِراں باز ٹیمب ءَ دارَگ بنت؟ ھچبر دارَگ نہ بنت تھنا تاکت ءِ  زورءِ  سر ءَ اے ھچبر بیت نکنت چی ءَ کہ ھما ٹیمب ءَ کروڑانی کچ ءَ پوریاگِر کار کنگ ءَ یل بدے اَنت، بزاں کہ کار ءَ چہ ھڑتال بکناں گڑا ھکمران آیاں چے زبردستی کار گپت نکناں ءُ نہ آیاں سجّھیناں تیر جت کن اَنت۔ ھمے وڑ پوج ءَ گوں ھور دگہ سیکیورٹی ادارگانی تھ ءَ ھم تبکّی پیر ھست اِنت، ھمے سپاھیگانی تہ ءَ ھم گیشتر پوریاگِر تبکّ ءَ چہ سْیادی دارنت وھدے ھمایاں اے ھکم دیگ بیت کہ برو اِت آ مردمانی سر ءَ تیر گواری بکن اِت کہ آ تھنا ھمے ھاتر ءَ  زھرشانی کنگ ءَ اَنت چی ءَ کہ آیانی بازیں ماھانی پگار نرستگ، یا پگار نیم کنگ بیتگ یا نودربرانی فیسانی تہ ءَ گیشی کنگ ءِ سبب ءَ زھرشانی کنگ ءَ اَنت، گڑا ھما وھد ھم کئیت کہ ھمے سپاھیگ وتی پوریاگِرانی سر ءَ تیر گواری کنگ ءَ چہ جواب دینت ءُ وتی تپنگ ءِ نلیاں ھمے ھکمرانانی دیم ءَ دراج کن اَنت۔ ھمے وڑ ھکمران تھنا وتی تاکت ءِ سر ءَ ھکمرانی کُت نکنت ( بلے اے گپ ھم راست اِنت ھمینچو بیت کنت اے وتی تاکت ءَ کارمرز کن اَنت) ھمے ھاتر ءَ ھکمران ھمروچیگیں ھالانی تہ ءَ نظام ءِ وانگءُ زانگ، میڈیا، پلم، ڈراما، مَنْدر ءُ مسیتاں گوں  پوریاگِر ءُ نودربرانی دماگ ءِ سر ءَ کنٹررول کن اَنت۔

تھنا اے گپ نہ اِنت بلکیں اے پوریاگِر یونینانی رھشوناں ھم زَرّ ءِ سر ءَ زیر اَنت وتی کنٹرول ءَ  کن اَنت، ھمے رھشون پوریاگراں گش اَنت کہ پیکٹری ءِ واھند ءِ سبب ءَ  شمئے لوگ ءُ شمارا وَرَگ رَسگ ءَ اِنت پہ ھمے ھاتر ءَ گیشتر مھنت بکَن اِت۔ اگاں شما باز مھنت کن اِت سرمایہ داراں باز پائدگ رسیت ءُ شمئے پگار ءَ گیش کن اَنت۔ ھمے پیکٹری ءِ واھند دگہ پیکٹری ءِ جوڑ کنت گڑا نوکیں روزگار ھم پیداک بیت ءُ شمئے سْیاد ءُ وارساں ھم روزگار رسیت، ھمے وڑ سرجمیں چاگرد ءَ وشھالی اتک کنت۔ بلے گپ مدام چپ بنت۔ سرمایہ دار ءِ دولت تہ ءَ گیشی بیت بلے پوریاگِر ءِ مُز کمتر بیان بیت۔ مروچی ھال اتکگ  اد ءَ سَر اِنت کہ پوریاگِر سبارگ ءُ  شام ءَ گمیگ اِنت الاج ءُ  تعلیم ءِ آسراتی دیریں گپے۔

پاکستان ءِ تہ ءَ ھمود ءَ کہ ٹریڈ یونین ساڑی اَنت سرجمیں سرکاری ءُ پرائیویٹ ادارگانی ءُ پیکٹریانی تہ ءَ،  ھما یونینانی رھشون ساری ءَ  پوریاگِراں مدام اے سوج ءِ  تہ ءَ دار اَنت کہ زھرشانی کنگ شریں کارے نہ اِنت بلکیں بُرز ءَ نشتگیں واھنداں گوں گپ ءُ تران کنگ ءُ جیڑہ ءَ گیشینگ شر تر اِنت۔ دومی، اگاں پوریاگِر مجبُور بنت ءُ  زھرشانی نیمگ ءَ رونت گڑا ھمے رھشون پوریاگِرانی بڈ ءَ کارچ جَن اَنت ءُ  پوریاگِرانی زرمبشت ءَ  ناکام کن اَنت۔ سجھیناں چہ پیش پوریاگِرانی دماگ ءَ اے گپ نادینگ بیت کہ وتی ھرچ جیڑھے بیت تھنا ھمائی ءِ ھلاپ زھرشانی بکن اِنت انچوش کہ پگار کم دیگ یا نہ دیگ گڑا زھرشانی بکن اِت ( بلے مرچاں پاکستان ءِ ٹریڈ یونینانی رھشون اے ھم نکنگ اَنت) ایشی ءَ چہ گیشتر ھچ مکن اِنت۔ پوریاگِر اے جست ءَ چہ داراگ بنت کہ پرچا آ اینچو پدریچاں چہ مھنت کنگ ءُ آھگ ءَ اَنت بلے روچ مروچی آیانی ھال ءِ تہ ءَ بدلی نیتکگ۔ اے جیڑگ ءَ چہ ھم دارگ بنت، اگاں بازیں زھرشانی ءَ  پد  پگار گیش کنگ ھم بہ بیت بلے انچوش کہ گران نھادی گیش بیان اِنت ایشانی ھال گندتر بیان بیت۔ اے جستاں چہ پوریاگِر ھمے ھاتر ءَ دارگ بنت چی ءَ کہ اے جست سرجمیں زر ءِ نظام ءَ کُنّت کن اَنت۔ اگاں اے جستاں چہ پوریاگِر دارگ مہ بنت گڑا آ اے جست ءَ ھم رس اَنت "اگاں سرجمیں پیداور ءِ  کار ءَ  پوریاگِر وتی مھنت ءَ گوں کنت گڑا پرچا ایشانی واھند برورداں زوریتءُ سیر بیان بیت ؟" سجھیناں چہ گیش اے پگر پیداک بیت " اگاں سرجمیں چیزاں پوریاگِر پیدا کنگ اَنت گڑا توامیں پیداور ءِ ادارگانی سر ءَ ھم آیانی کنٹرول بہ بیت۔

دومی نیمگ ءَ  نودربراں سْیاست ءَ چہ پھریز ءِ سوج کنگ بیت ءُ  اے پگر آیانی دماگاں مان کنگ بیت کہ مھنت کن اِت شریں نمبر زور اِت شمارا شریں نوکری یے  رست کنت۔ بلے نوں وا جاور اد ءَ اتکگ ءُ سر اِنت کہ مئے درسی نظام بربادی ءِ نزّیک ءَ رستگ۔ ھاس برزیں درسی نزام وَ برباد بیتگ ، چی ءَ کہ ھائر ایجوکیشن مئے گُوَر ءَ  نوکری ءِ ھاتر ءَ کنگ بیت، ءُ  مروچی ایم اے ، ایم پیل ءُ  پی ایچ ڈی کتگیں لکانی کساس ءَ  نوجْوان بیروزگار ترّگ ءَ انت نوکیں روزگار پیداک بیگ وتی جاہ ءَ  ھرچ روزگارے کہ ھست ھما ھم ھلاس بیگ ءَ اِنت۔ ایشی ءِ  سبب ءَ ھائیر ایجوکیشن ءِ  ڈگری ءُ درسی نظام ءَ وتی بستار گار کتگ۔

سرجمیں درسی نساب ءِ مول ءُ مراد ایش اِنت کہ آ سرمایہ دارانہ نظام ءَ گڈی نظام کنَگ ءُ سوشلسٹ آشوب ءَ گوں ایشی ءِ ھلاس کَنگ ءَ نہ بیتگیں چیزے پیش بداریت۔ بلے نوں نوجْوانانی زھن ءَ سرمایہ دارنہ نظام ءِ ھلاپ ءَ نپرت گیش ءَ چہ گیش بیان اِنت ءُ ھکمرانانی داشتگیں دانشور کہ وت ءَ سوشل میڈیا ءَ آشوبی پیش دار اَنت  ءُ اے دگہ پلیٹ پارمانی سر ءَ نوجْواناں اے سوج ءَ دے اَنت کہ سرمایہ دارانہ نظام وَ شر نہ اِنت بلے آشوب ءِ نیمگ ءَ رَوگ وَ سرجم ءَ ھرابیں کارے۔ ھمے وڑ پارلیمنٹ ءُ ادالت ءِ بستار ءِ سر ءَ  تبلیک کن اَنت ءُ گش اَنت کہ آشوبی باسکاں لوٹیت کہ آ ھمے ادارگاں وت ءَ سر بکن اَنت یک اُھدا یے بِزِیر اَنت ءُ درستیں چیزاں شر بکن اَنت۔ ھمے وڑ یونیورسٹیانی تہ ءَ زبانانی بنیاد ءَ جوڑ بیتگیں کونسلانی اسٹڈی سرکلانی تہ ءَ ھم اے نامیگی آشوبی راجی زلم ءُ زوراکی ءِ آماچیں نوجْوانانی نپرت ءِ جزباتاں گوں لیب کن اَنت ءُ  آیاں ماباد نو آبادیات ءِ وڑیں ھکمران تبک ءِ بد لیکھاں واننین اَنت ءُ دنیا ءِ  تبکّی ءُ بزکارانی یکجائی ءَ  نزور کن اَنت۔ ھمے وڑ پری لانسنگ ءِ سورت ءَ اے راہ پیشدار اَنت کہ ایشی ءِ تہ ءَ ایشانی توامیں جیڑہ ھلاس بنت ءُ  سرمایہ دارانہ نظام ءِ ھلاس کنگ ءِ ھاتر ءَ آشوبی زرمبشت ءِ پکار نہ اِنت۔

ھمے وڑ اے ھم الّمی نہ اِنت کہ تھنا ھما مردم ھکمران ءِ  لیکہ ءَ شِنگ بکنت کہ آئی ءَ ھکمرانانی نیمگ ءَ  زرّ رسیت، کدی کدی  لھتے انچیں مرد ھم ھکمرانانی پروپگنڈا ءِ  آماچ بنت ءُ نزانتکاری ءَ ھمایانی لیکہ ءَ شنگ کن اَنت ءُ  پد ءَ وت ھم ھمے ھکمرانانی زلم ءِ آماچ اَنت ءُ آئی ءَ چہ وت ءَ رکّینگ ءِ جھد کنگ ءَ اَنت ۔ ھاس پاکستان ءِ  بزکاریں راج ءُ زالبول  بدترین ءِ زلم ءِ آماچ اَنت ءُ اے زلم ءِ  ھلاپءَ جھد ھم کنگ ءَ اَنت۔  مروچی ھمے جموری زرمبشتانی تہ ءَ کومپرستی ، پیمینزم، ماباد جدیدیت، ءُ  ماباد نو آبادیات ءِ وڑیں پوریاگِر دژمنیں لیکہ زور اَنت کہ ھما سرمایہ دارنہ نظام ءِ ھلاس کنگ ءِ جھد ءَ چہ دور کن اَنت ءُ  پوریاگِرانی یکمشتی ءَ  نزور کن اَنت ۔  کومپرست پارٹیاں ءُ  دانشوراں روچ مروچی راجی زلم ءِ ھل اے گشتگ کہ ادالت ءُ آئین یا وا اکوام ءِ متھدہ ءِ وڑیں دنیا ءِ  مستریں سامراجی ادارگاں گوں  آیاں آزاتی رسیت بلے 75 سال گْوَستگ آزاتی رسگ و دیریں گپے بلے آیانی سر ءَ زلم انگت گیش بیتگ۔ ھمے وڑ صنفی بزاں کہ زالبوالانی ھکانی ھاتر ءَ جھد کنگ ءُ زلم ھلاس کنگ ءِ  ھل دیگ ءِ  جاگہ ءَ پیمینزم ءِ وڈیں پوریاگِر دژمنیں لیکہ پدرشاھی ءِ  سر ءَ وتی زاراں کشگ ءِ سوج ءَ دے اَنت۔ بلے مروچی راجی ءُ  صنفی زلم ءِ آماچیں پوریاگِر مھلوک ءَ گوں ھور دگہ بزکاریں تبکّانی سنگینیں نوجْوان اے گپ ءِ جیڑگ ءَ  مجبور بیگ ءَ اَنت کہ نہ پارلیمینٹ ءُ نہ ادلیہ، ءُ نہ چشیں دنیا ءِ سامراجی ادارگاں چہ چیزے رستگ ءُ  نہ جدا بیگ جھد کنگءَ چیزے رست کنت، ھمے وڑ آیانی گور ءَ ھم اے راہ پشکپگ ءَ اِنت کہ بید ء سرمایہ داری ءِ ھلاس کنگ ءَ  دگہ ھچ راہ نیست ۔

نامداریں روس ءِ آشوبی لیون ٹراٹسکی ءَ گشتگ ات کہ" مئے سر ءَ یک نیلیں آزمانے بلے مئے دماگ ءَ یک زردیں آزمانے اڈ بیتگ۔ ھمے زردیں آسمان ءِ چیر ءَ ھکمرانانی وڑ وڑیں کردار ناٹک کنگا اَنت ءُ مھلوک ھمیشانی تہ ءَ گار اِنت بلئے ھما وھدی کہ پوریاگِر ھمے زردیں آزمان ءَ برز ءَ چہ گند اَنت آ ھکمرانانی بدیں کرد ءَ سرپد بنت گڑا آیانی ھلاپ یک انچے زرمبشتے چست بیت کہ آشوب ءَ گوں نظام ءَ ھم ھلاس کنت۔"

پاکستان ءِ ھکمرانانی زردیں  آزمان ءَ اد ءِ پوریاگِر چیر ءَ   چہ ناں بلے نوں برز ءَ چہ چارگ ءَ اَنت ءُ  کم کم ءَ چاروکانی کساس گیش بیان اِنت۔ مروچی اے گپ سرجمیں مھلوک ءِ دیمءَ  پدّر بیتگ کہ اے گپچل ءِ تہ ءَ امران کان، جرنل، جج، بیوروکریٹ، میاں منشا، ملک ریاز، زرداری، نواز شریپ ءِ  وڑیں کجام ھم سرمایہ دار ءِ  دولت ءِ تہ ءَ ھچ کمی نیتکگ بلے ایشانی دولت ءُ ایاشی  ساریگیناں چہ گیش بیتگ اَنت۔ اے گپ ھم زیت پدّر بیان اِنت کہ پوج، ادلیہ، پارلیمینٹ، میڈیا ءَ  گوں ھوار  سرجمیں ریاست، سرمایہ دار ءُ سامراجی ادارگ ءُ سامراجی ملکانی کنٹرول ءِ تہ ءَ انت، ھمے وڑ دراھیں پالیسیاں ھکمران تبک وتی مپادانی ھاتر ءَ جوڑ کن اَنت۔  ھمے ھاتر ءَ مزنیں کمپنیاں، ہاؤسنگ سوسائیٹیزاں، زمیناں بینکاں ءُ پرائیویٹ لین ادارگانی سر ءَ ھچ وڑیں ٹیکس جنگ نہ بوگ ءَ اِنت ءُ  منامیگی دِپا ءِ بجٹ ءُ  جرنلانی ایاشی ءِ تہ ءَ ھچ وڑیں کمی کنگ نہ بوگ ءَ اِنت۔ ھمے ھاتر ءَ پاکستان ءِ پوریاگِرانی پیدا کتگیں  دولت ءِ برورد ءِ مزنیں بھرے 75 سال ءِ ھکمرانانی نیمگ ءَ چہ دنیائی سامراجی ادارگانی وامانی سود ءِ دیما دیگ بوگ ءَ اِنت۔ ھمے ھاتر ءَ نان، چائیتاک، شکر، ءُ تیل ءَ گوں ھور ھر چیز ءِ سر ءَ ٹیکس گیش کنگ بیتگ، بلے سرمایہ دار  گیش ءَ چہ گیش ٹیکسءَ چے آزات کنگ بیتگ۔ سجھیناں چہ گیش اے گپ زاھر بیت کہ سرجمیں سْیاسی پارٹی ءُ  اسٹبلشمنٹ تھنا وتی زَرّ ءِ ھاتر ءَ جنگءُ چوپ ءَ اَنت، آ ھم ھما وھدی کہ ملک ساپ ساپ دیوالیہ اِنت۔

چوناھی ءَ پاکستانی ریاست ءِ سرجمیں تاریک ءِ تہ ءَ پوریاگِر ءِ ھاتر ءَ کدی ھم وشیں روچ نیتکگ ءُ ھکمران تبک ءِ ھلاپ مدام کُنّت ھست بلے مروچی پیسر ءَ  چہ اے بدلی اتکگ کہ درستیں ھکمران تبک ءُ سرمایہ دار ءِ  ریاست ءِ دراھیں ادارگانی اسلی ءُ مھلوک دژمن سورت دراھیں پوریاگِرانی دیم ءَ  پدّر بیتگ۔ سجھیناں چہ مستریں گپ پوریاگِرانی سرمایہ دار ءِ ریاست ءِ تہ ءَ نندگ ءُ شری ءِ امیت دارگ مُرتگ۔ ھکمران تبک ءِ واستا اے سکیں ھترناکیں جاورھال اِنت۔ چی ءَ کہ مروچی سرجمیں سیاسی پارٹیانی ھمایت ھلاس بوتگ ءُ نوں پوریاگِر آیاں گوں گیشتر بڈّگ بیگ ءَ تیار نہ اَنت۔ جرنلانی کرپشن درستانی دیم ءَ پدّر بیتگ، ھکمرانانی میڈیا برھنگ بیتگ، ادلیہ ءِ مھلوک دژمنیں سورت ھم درستانی دیم ءَ  پدّر بیتگ نوں مردم ساکب نسار ءِ ( ھما ڈیم والا سرکار ءِ نام ءَ زانگ بیت) وڑیں شادیانی سر ءَ  گوشکند گش اَنت۔ ایشی ءِ متلب ایش اِنت کہ اگاں مروچی یک مزنیں آشوبی بگاوتے  پیداک بیت، ھمے بگاوت سوشلسٹ آشوبی ءِ پجّی ءَ سرمایہ دارانہ نظام ءِ  ھلاس کنگ ءِ نیمگءَ  روت، گڑا اد ءِ ھکمران تبکّ ءِ تاکت نہ بیت کہ آئی ءَ داشت بکنت۔ بلے پوریاگِراں ھوار کنگ ءُ  سوشلسٹ آشوب کنگ رند ءَ ممکن بیت ھما وھدی کہ یک انچیں انکلابی پارٹی ءِ ھست بہ بیت کہ آ پوریاگِر ءِ  مھلوک ءِ زرمبشت ءَ یک تچکیں پروگرامے دنت ءُ سرمایہ دارانہ ریاست ءِ ھلاسی ءُ پوریاگِرانی ریاست ءِ جوڑ کنگ ءِ نیم ءَ روت آیانی رھشونی ءَ کنت جنزان بیت۔

مروچی سرجمیں دنیا ءَ مستریں کار ھمیش اِنت کہ یک ھمے وڑیں سوشلسٹ آشوبی پارٹی ءِ جوڑ دیگ ببیت۔  اے پارٹی ءِ جوڑ کنگ ءِ راہ ءَ سجھیناں چہ مستریں پھریزوک ریاست ءِ تاکت ءُ دگہ زالم ءُ زوراک نہ اَنت بلکیں میڈیا ءُ یونیورسٹیاں گوں شنگ کتگیں وڑیں وڑیں مھلوک دژمن ءِ لیکہ اَنت۔ ھمیشاں چہ مستریں پگر ایش اِنت کہ مارا "پریکٹیکل" بیگ لوٹیت۔ انچو کہ ملک گپچل ءِ تہ اِنت گڑا مارا وت ءَ رکّینگ ءُ وتی باندات شر کنگ ءِ کوشست کنگ لوٹیت۔ اے پگر ءَ  "پریکٹیکل" بیگ گشگ نہ بیت، اے سوچ گلام بیگ سوج دنت۔ اے پگر ھکمرانانی پادین ءَ  گٹگیر بیگ مِرَگ سوج دنت۔ ھمے سوج الی امین گنڈاپور ءِ پہ ھاموشی ءَ اے گپسگاں ھم گوشدارگ ءَ پرمائیت کہ " اگاں گران نھادی باز اِنت گڑا مردم نان کم بہ وَر اَنت "  اے ھمے پریکٹیکل پگر اِنت کہ مردماں سوج دنت کہ راجی ءُ  ٹکّی زلم ءَ  یک سوشلسٹ آشوب ءِ پجّی ءَ مدامی ءِ  واستا ھلاس کنگ ممکن نہ اِنت، ھمے ھاتر ءَ سرمایہ دارانہ نظام ءِ تہ ءَ نندگ ءُ ھرچ آسودگی یے رسگ ءَ اِنت بُزوریت ءُ ھاموش بہ نندیت، ما نالت کنیں چشیں گلامی ءِ  پرکیٹیکل ءِ  پگر ءَ۔ ما سرپد بہ ایں اے دراھیں جھان پوریاگِر ءِ مھنت ءَ گوں ھلّگ ءَ اِنت۔ ما یک ڈگار یک ملکے انّاں بلکیں سرجمیں دنیا ءَ تئی گور ءَ چہ پچگریں ! ما وتی ھکانی جنگ ءَ کنگ ءَ اِنت ، ءُ  اگاں ما جنگ مہ کنیں گڑا شُد، گژنگی، بے کاری، بے الاجی ءُ چاگرد ءِ بدلی، کدرت ءِ توپانانی ازاب یا زالم ءِ مرگ ءِ سورت ءَ مئے ودار کنگ ءَ اِنت۔ اگاں زندگ بیگی اِنت گڑا مارا جنگ کنگی کپیت! بلے اے جنگ ھالیگیں جزباتانی سر ءَ نہ بیت بلکیں اے جنگ مارکسزم ءِ سائنسی لیکہ ءِ بنیاد ءِ سر ءَ ءُ یک آشوبی پارٹی ءِ بیرک ءِ چیر ءَ کنگ بیت۔ مروچیگیں دور ءِ تہ ءَ آشبی جھد ءَ ھوار بیگ ءَ اسلی ءَ پریکٹیکل بیگ گش اَنت۔ مروچیگیں دور ءَ ھما مردم ھاس نوجْوان ھما کہ گلامی ءِ  پِگر ءِ  آماچ اَنت ءُ سوشلسٹ آشوب ءِ جھد ءِ تہ ءَ بھر نہ زورگ ءَ اَنت، ما ھمے وڑیں سرجمیں نوجْواناں داوت دے ایں کہ بْیا اَنت مارا گوں اے پوریا گرانی آشوبی جھد ءُ پہ مدامی زرّ ءِ گلامی ءُ سرجمیں گلامی ءِ پِگر ءَ  چہ آزاتی ھاتر ءَ اے جھد ءِ تہ ءَ مارا گوں ھوار بہ اِت۔.