لوامز اولڑ ھاسٹل یا برٹش فوجی رجمنٹ۔
این آر بلوچ
لوامز ءِ آشری وات ءَ چہ من اولڑ ھاسٹل ءَ اتک ءُ شپٹ بیت آں ، اداں آئیگ ءَ پد گُشے زان ءَ منی پُنر جنم بیتگ اَت من ھما برٹش ایمپائر ءِ اَھد ءَ وتی چم پچ کُتگ اَت آں، دراجیں کوانیں فوجی کوٹی اَت اَنت ، لھتے کوٹی پرشتگ اَت ءُ لھتے وتی گُڑی سیمسراں اِت اَنت درائیں کوٹی یک واڑی ءِ تہ ءَ بند اِت اَنت چَپ ءُ چاگرد ءَ لھتے لیٹ لگیتگ اَت ءُ ھمے لیٹانی تہ ءَ لھتے تَھنا بس اَنچو اَست اَت بَلے روک بئیگ ءَ مرگ کُتگ اِت ئے۔
من اتک آں کوٹی پچ کُت کوٹی ءِ پچ کنگ ءَ گوں یک برے من آں گُماں بیت کہ اگاں اَسَل ءَ وھدے اِے برٹش فوجی رجمنٹ ءِ بوتیں گڑا اِے کوٹی اَلم ءَ ٹوچر سیل بیتگ اَت اِداں مردم پہ لٹ ءُ کُٹ کنگ ءَ آرتگ اَت ئے！
دیوال ءِ لگوشتگیں رنگ ءُ موکوانی بستگیں تند ءُ پدا نزان آں گُٹک ءَ یا ماوائی ریتگیں تُک دیوال ءَ انچوش پدر کنگ ءَ اَت کہ اِداں کس ئے آرگ ءُ ٹوچر کنگ بیتگ، بازنیں لٹاں ھوناں ءَ تْرینزّ بستگ اَت ءُ اتکگ ءُ دیوال ءَ لگیتگ اَنت！
من وت ءَ یک ٹوچر سیل ءِ تہ ءَ گندگ ءَ اَت آں مُدت ئے بیت کہ بندی جاہ ءَ بند ایں ،نُک ھوش بواں اَت ، اَنچش سما بئیگ ءَ اَت چماں روچ ءِ رنگ شموشتگ اَت ،زمین ءِ سرا کپتگ اَت آں جَند ءُ جُور اَت آں ساہ ءِ زیرگ سَکّ گران بوان اَت ، مردمانی یات چو تامری ءِ دروشم ءَ دماگ ءِ مجنگانی تہ ءَ تیز تیز ءَ بدل بوان آت اَنت گُشے زان ءَ انی نہ انی مجگ ترک اَنت ءُ ھما ماوا ئے تُک ءِ وڑا دیوال ءِ سرا تْرِینزّ بند اَنت！
اچانگ ءَ داں کوٹی ءِ پنک ءَ سُرگ ءَ لگ اِت من چَک جَت ءُ چارت داں دومی بچک اَت کوٹی ءِ آئی ءَ پنک ءِ بٹن جتگ آت ءُ من آں گُشت ئے ھمش اِنت اولڑ ھاسٹل اِے گُشگ ءَ پد منی چمانی توک ءِ چارت اِت گُشے زان ءَ آئی ءَ زانت کہ من چیز ئے گُشگ لوٹاں بَلے من ھچ نہ گُشت！
No comments:
Post a Comment