ھار جَتیں گوادر

ھار جتیں گوادر

گوستگیں سال ءِ بشامی ھوراں پد ما کراچی ءِ بابت ءَ نوکیں لبزے اِشکُت کہ آئی ءَ ھربن فلوڈ بزاں شھری ھار ءِ نام پِر ات۔ بلے بیا کہ گوادر ءِ وڑیں کسانیں بندن ناں شھر گُشگ بنت ءُ ناکہ کوچگ ادا ھمک ھور ءَ پد جاور امینچو نگیگ بنت کہ ھور مہ بیت بلوچاں تُن کُشیت ءُ ھور بہ بیت ھار۔

گوادر ءِ کوچگی دمگاں ھوار انوگیں ھوراں شھر سک باز متاسر کُتگ۔ مُلا بند ءِ میتگ ءَ مرچی سیمی روچ ءَ ھم آپ لوگانی تہ ءَ اوشتاتگ۔ 

سرکار ءِ گُشگ ھمیش انت کہ آپ کشگ بوھگ بیگ ءَ انت بلے مردمانی گِلہ کہ ھو سرکار ءُ واکداراں ھما لوگانی آپ کشتگ انت کہ آ مردم کمو چرپ تر بوتگ انت۔ بزگیں بلوچ اد ءَ ھم پشکپتگ انت۔ واجہ محمد بلوچ ءِ لوگ کوھنیں مُلا بند ءَ انت۔ مرچی 3ئمی روچ انت کہ آئی ءِ لوگ انگت آپ ءَ پُر اِنت۔ آ گُشیت کہ آپ ءِ کشگ وتی جاگہ ءَ آ نان ءِ پچگ ءَ ھیران انت کہ کجا برو انت۔ لوگ ءُ چُل ءُ کمپان آپ ءَ پُر انت۔

ھمے وڑ ءَ پراز نامیں ورناھے ھم گِلہ کنگ ءَ انت کہ آیانی یک لوگے کپتگ ءُ دگہ لوگ تَل انت بلے ناں آیاں سرکاری کمکے رستگ ءُ ناں آیانی لوگ ءِ آپ کسے ءَ کشتگ انت۔

ماسی زینب ھم گِلہ کنگ ءَ انت کہ بزگی ءُ واری ءِ وھد ءَ ناں نماھندگ دیم ءَ کاینت ءُ ناں سرکار۔ ماسی زینب گُشیت گوادر ءِ نالیانی نزام انچو جوڑ کنگ بوتگ گُش ئے زاناں ھما جوڑ کنوکاں وتی کبرستان جوڑ کُتگ۔ ماسی گُشیت باھد سرکار نی مردماں لوگ بہ بندیت ءُ بہ دنت۔

انوگیں ھوراں ھم چو مدامی ایں وڑ ءَ باز تاوان داتگ۔ ءُ انگت ھم جوانیں منسوبہ بندی ھچ گندگ نہ بوھگ ءَ انت۔ دو ماہ ءَ پیش ھور ءَ ھم گوادر ءَ سڑک، دمک ءُ بازارانی جاور ھور ءَ پد انچش بوتگ۔ انی ھم انچش انت ءُ دو ماہ پد ھم ھور بہ بیت انچُش بیت۔ چیاکہ اے جاورانی گھتر کنگ ءَ کس تیار نہ انت۔