بی ایس او ایسُپءِ کَتَبءَ رستگ

 بی ایس او ایسُپءِ کَتَبءَ رستگ

جاوید بلوچ                                

آ ھم یک وھدے ات وھدے بی ایس او دگہ راجانی دیمءَ یک درورے ات۔ بی ایس او  نہ ایوک وتی راجءَ پہ زانت، جھد ءُ سوبمندیءِ نام ات بلکیں چیردستیں دگہ راجانی توار ءُ آہانی جھدءِ سوبمند بوھگءِ امیتے ات۔ بی ایس او ءَ بلوچستانءِ لس نودربراں ھما سکت ءُ توانائی داتگ ات کہ بلوچءِ زھگ زھگ پہ وانگءَ دیمءَ دراتک۔ بلوچستانءِ سردار، میر ءُ واجہ کارانی دیمءَ میلانک بوت انت۔ ءُ اے پگر یا لیکہ رد کُت کہ بلوچ سرداری کور ءُ ٹِکّریں نظامءِ منوگر انت۔ بلکیں اے سیائیں نظامءِ ھلاپءَ یک رژنائیں بانداتےءِ امیت، یک واننداھیں چاگردےءِ پجار ءُ بلوچ ءِ رژنا پگر بوھگءِ نمائندگیں دیم انت۔

بی ایس او ءِ ھلاس کنگءُ ٹکر کنگءَ پہ برے سردار ءُ واجہ کاراں گوں سرکاری کمکءَ بے سوبیں جھد کُت ءُ برے سرکارءَ وت دینی گَل ءُ آہانی (بچک پاٹی) نودربر کارمرز کت انت۔ گُش انت بلوچستانءِ یک گورنرےءَ چہ بی ایس او ءِ بیمءَ یک رندے بنجائی سرکارءَ نمدی یے نویس اِت کہ اگاں بی ایس او ءِ سرا بندش جنگ نہ بوت گڑا من ئے گورنر چہ وتی عہدگءَ دزکش باں ءُ بی ایس او ءَ ھوار بئیگءِ جارءَ جن آں۔ 

بی ایس او یک پگرےءِ دروشمءَ بلوچ چاگردءِ انچیں بھرے جوڑ بوت کہ  ھر بلوچ نودربر وتءَ بی ایس او ءِ کارندہ یے سرپد بیت۔ بلوچءِ تہءَ ھستیں ٹیکہدار، سردار ءُ ھما کہ آہاں اے نام چو چمءِ کُنٹگءَ تور اتگ ات آہاں ھمے نامءَ وتی بیرکانی جنگ، کسانکیں ٹیکہدارانی جوڑ کنوک، ءُ بلوچستانءِ میتگانی تہءَ چو سندھءِ پیری ءُ پکیری ربیدگءِ وڑءَ واجہ کارُکانی بیانانی شنگ کنوکیں ٹولیانی جوڑ کنگءَ کارمرز کنگ بنگیج کت۔

مرچی بی ایس او  ایسپءِ کتبءَ رستگ۔ ھال اش انت کہ سردار، ٹیکہدار، بے مہار ءُ بے توار یا نیم گنوک ءُ نیم سار بوھگءِ دروشمءَ الپءَ بگر داں ایکس، وائے، زیڈءِ ورائیٹی مارکیٹءَ ایر انت۔ ءُ اے کلچر نی امینچو ودّ اتگ کہ بلوچءِ دگہ کونسل ءُ نودربر گل ھم ھمے راہءَ روان انت کہ اگاں عہدگ نہ رَست گڑا نوکیں برانچے جوڑ کن کہ اشییءِ نوکیں درور کراچی شاہ دربرجاہ، ملتانءِ بلوچ کونسل ءُ دگہ یک ءُ دو جاگہاں نودربر گل (کولءِ پلانی چُک دئیگءَ آں) گیش بوہان انت۔

چندیں روچ بیت کہ سوشل میڈیاءَ بی ایس او ءِ یک ورژنے گُشگءَ انت کہ دومی ورژن مئے نامءَ کارمرز کنگءَ انت۔ اے بی ایس او ، آ بی ایس او ءُ پدا اے بی ایس او ءِ چیئرمن ءُ کارندہ ءُ آ بی ایس او ءِ کارندہ۔۔۔۔  بیچارگیں بی ایس او اوں کنفیوز انت کہ چے بوھگءَ انت۔۔۔۔۔

پدا مستریں جیڑگءِ گپ اش انت چوش کہ لہتیں دینی گَلانی بچک پاٹی بزاں کہ نودربر گَل ھست انت۔ ھمے وڑءَ دگہ سیاسی پارٹیانی بچک پاٹی ھست انت کہ آ زان انت "میر ءِ بیٹکءَ نندگ ءُ میرءِ نامءِ گرگءَ لج کنگ ائیبے نہ انت" آ سرءِ عام وتءَ ھماہانی بچک پاٹی گُش انت۔ گڑا ادا چیا ائیبے؟ ھرکس زانت کہ کجام بی ایس او کجام واجہ، سردار، ٹیکہدار یا گلءِ بچک پاٹی انت۔ 

بی ایس او ءِ ھال اش انت کہ مرچی شاہ دربرجاہانی تہءَ ھما کہ آہاں داکلہ نہ رسیت ءُ ھرکس پیسرا داکلہ ءَ کنائینیت بزاں ھمائیءَ ھمے نودربر بہاءَ زُرت کہ نی آئیءَ وتی پارٹی والایانی بیان شنگ کنگی انت۔ نامانی دیمءَ فرزند، فخر ءُ ہر دل عزیز لکگی انت ءُ پدا مارکیٹءَ یل دئیگی انت۔ اگاں اے سرکلانی تہءَ کسےءَ جاگہ نہ رست گڑا نوکیں بی ایس او یے مارکیٹءَ لانچ بکنت۔۔۔۔

بی ایس او نی و ایسپءِ کتبءَ وَ رستگ بلئے بائد اے لجی ھبرے مہ بیت کہ تؤ کجام بی ایس او ءِ؟ بزاں کجام پاٹیءِ بچک پاٹی اِت۔۔۔۔ ءُ اگاں بچک پاٹی نہ ات گڑا راہے بہ کش ات وتی چیئرمیناں اینچو ہزت و بہ دئے ات کہ آہانی ناماں دیمءَ بجن ات گوں تاکہ وت کنفیوز مہ بہ اِت۔ راجءِ کار ءُ بلوچءِ لس نودربرانی کار ھئیر انت وتءَ مہ اڑین اِت۔