گِدار 1984 ءِ سرا چمشانکے

گِدار 1984 ءِ سرا چمشانکے

                          سجاد اسد

گِدار 1984 انگریزی زُبان ءِ نامداریں نبشتہ کار جورج اوروِل ءَ نوَزدہ صد ءُ چِل ءُ نہہ ءَ نبشتگ ءُ چاپ کتگ. اے گِدار ماں بلوچی ءَ ڈاکٹر بیزن سباہ ءَ رجینتگ. وتی وھد ءِ نامداریں گِدار نویساں چہ یکے ءُ اے فکشن گِدار آئی ءِ جْوانتریں گِداراں چہ یکے زانگ بیت.

 گِدار 1984 ءِ تہا جورج اوروِل ءَ روس ءِ توک ءَ سٹالن (Stalin) ءُ جرمنی (Germany) ءِ تہا ایڈولف ہٹلر ءِ سرکار  گوں جِتائیں رنگے ءَ ایر جتّگ اَنت. جورج، ہٹلر ءُ سٹالن انگلینڈ ءِ شہر ءُ دمگّاں totalitarainism ءِ دابیں سرکارے ءَ ھیال کنت. ھمے ھئیال ماں گِدار ءِ دْروشم ءَ 1984 ءِ نام ءَ نامدار اِنت. توامیں شہرءَ پوسٹر جنوک بَنت کہ آھانی سرا نبشتہ اِنت "مزنیں برات ترا چارگ ءَ اِنت" بزاں کہ ( Big Brother is watching you.). چوکہ مزنیں برات سرکار اِنت. 

سرکار کہ آئی ءِ سئے نعرہ (slogan) اَنت. 

1. جنگ امن اِنت. 

2. آجوئی گُلامی اِنت.

3. لاعلمی توانا بوھگ اِنت.     

گدار ءِ کسّہ یک انچیں سرکارے ئیگ اِنت کہ آ درستانی واجہ اِنت ، ہرچی سرکار بہ گُوشیت ھما راست اِنت۔ سرکار ترا ہر وھد ءَ چارگ ءَ اِنت۔ سرکار ءَ پہ لس مہلوک ءِ چارگ ءُ گوشدارگ ءِ ھاترءَ ھر جاگہ ءَ کیمرا (Telescreen) ءُ مائیک جتگ. ہمے کیمرا ءُ مائیک ھر دمک ءُ لوگ ءِ تہا پجُارینگ بوتگ اَنت ءُ ھست اَنت ءُ کس آہاں بند کُت نہ کنت ابید چہ سرکار ءِ اجازت ءَ ھچ گپ ءُ کار ءِ اجازت نیست. آ کار ڈائیری ءِ نبشتہ بہ بیت، سنگتی ءُ دوستی کنَگ یا مہر ءُ مہبت کنگ یا سیکس کنگ یا دگہ انچیں کار بہ بَنت۔     

سرکار ءِ مستریں دژمن وَ ھما اِنت کہ چہ سرکار ءِ داتگیں پگر ءُ سوچ ءَ ابید دگہ پگر کنت. پہ پگر ءِ دارگ ءِ ھاتر ءَ سرکار ءَ Newspeak جوڈ کُتگ ۔ نیوزپیک سرکار ءِ داتگیں ھال ءُ احوال اَنت ءُ لس مہلوک ءِ سرا اَلّم اِنت کہ آ نیوزپیک ءَ ھر روچ بچاراَنت ءُ گوش بِداراَنت. نیوز پیک ءِ جہدانی تہا اے جہد ہم ھوار اِنت کہ ھر ھما لبز کہ گوں آجوئی ءُ بغاوت ءَ سْیادی داریت آ چہ زبان ءُ لٹریچر ءَ کشگ ءُ ھتم کنگ بِہ بنت۔ سرکار ءَ یک جتائیں ڈیپارٹمنٹے ہم ٹہینتگ پہ راجدپتر ءِ مٹینگ ءِ ھاتر ءَ ءُ اے ڈیپارٹمنٹ ءِ نام اِنت Ministry of Truth. اے ڈیپارٹمنٹ ھر روچ گوں راجدپتر ءِ مٹینگ ءِ ءُ دگہ نوکیں راجدپترے ءِ نویسگ ءَ گوں گلائیش اِنت.   

 نوکیں راجدپتر انچو نبشتہ بیت کہ آ سرکار ءَ پائیدگ بِہ دنت ءُ لس مہلوک ءَ چہ وتی گْواچنی ئیں راجدپتر ءَ بیھال کنگ بہ پرمائیت. 

سرکار ءَ پہ مجرمانی گرگ ءَ یک فورسے جوڑ کُتگ کہ نام اِنت ئےِ Thought Police. اِشی ءِ کار گوں سرکار ءِ کُمک ءَ بوتگ کہ آ لس مہلوک ءَ بہ رکین اَنت ءُ آھاناں بہ تپاس اَنت. پہ مجرمانی سزا ءَ وڈ وڈیں ٹارچر سیل ءُ ٹارچر ءِ ترز ٹہینگ بوتگ. لٹءُ کٹ، دست ءُ پادانی پْروشگ، کرنٹ دئیگ ءَ ابید کمرہ نمبر 101 ءِ نام ءَ یک ھاسیں کمرہ یے تیار کنَگ بیتگ.   

 کمرہ نمبر 101 ءَ ھر مردم ءَ ھما ٹارچر دئیگ بیت کہ چہ آئی ءَ آ سک تُرسیت. سرکار ءَ اے ھم گشتگ کہ آ وتی مجرماں نہ کُشیت پرچا کہ آ اے رنگ ءَ ھیرو جوڈ بنت. آ وتی مجرماں ٹارچر دنت ءُ  وتی راہا کاریت ءُ یلہ دنت.   

 

گدار ءِ گّڈی لبز چو اے وڈ اَنت " مزنیں برْات شمارا دوست داریت. " بزاں کہ (Big brother Loves you).     

اے گِدار مروچیگیں اَھد ءَ گوں باز سْیادی داریت. گِدار 1984 ءِ کسہ ءُ مرچیگیں عہد ءِ باز رنگ ءُ داب ءَ یک ڈول اَنت. 1949 ءُ مرچیگیں اَھد ءِ بازیں سرکار ءُ کانود یک رنگ اَنت. لسَ مہلوک ءِ ھر کار ءُ گپ ءَ سرکار زانگ لوٹیت. سرکار ءِ داتگیں پگر ءُ سوچ ءَ ابید دگہ پگر ءِ دارگ ءِ اجازت کس ءَ نیست ءُ ھر کسءَ سرکار ءِ ھلاپ ءَ سوچ اِت ءُ پہم اِت گڑاں آ گرگ ءُ ٹارچر کنَگ بنت. نیوز پیک ءِ وڈ ءَ سرکار ءِ نیوز چینل ءُ ھالتاک است اَنت. لس مہلوک ہما چیزاں چاریت ءُ گندیت کہ آہاناں پیشدارگ ءُ گوشدارینگ بیت۔