کابل کے ءَ فتح کُت؟

کابل کےءَ فتح کُت

شونگال گوادرءِتوار

سکیں دراجیں جنگےءِ مدتءِ پورا بوھگءَ گوں سکیں لُکیں وھدےءِ تہءَ مرچیگیں ھالانی ردءَ کابل اوگان تالباناں فتح کُت۔

چوش گُشگ کہ تالباناں انچو زوت کابل فتح کت کہ چوش زوت یک ٹیسٹ کرکٹ گوازی یے ھلاس نہ بیت۔ راست نہ بیت۔ چیاکہ تالبان و ھما روچءَ چہ جنگءَ آں ھما روچءَ نیٹو ءِ لشکرءِ اولی اُرد اوگانستانءَ اسامہ بن لادنءِ دزگیر کنگءَ اتکگ ات۔

بلکیں اناں۔۔۔۔ تالبان ھما روچءَ چہ جنگءَ آں کہ ھما روچءَ کمیونسٹیں روس یا یو ایس ایس آر ءَ وتی چم جُھلیں زرءَ سک کُت انت ءُ دیم پہ میان ایشیائی ملکاں بگر اوگانستان ءُ پدا آئیءِ منزل ھرمزءِ آپی راہان ات۔ ھمائیں تالبان جنگءَ انت۔ ءُ بہ گندئے! سوشلزمءِ منوک کدّءِ وت ہزار توجیل بیان بہ کن انت کہ سوشلسٹ روسءِ پروشگءِ سبب پلاں پلان انت ءُ یا اے ھبرءَ مہ من انت کہ روس پروشتگ ءُ سوشلزمءَ تاوان رستگ بلئے راستی ھمیش انت کہ گوں تالبانانی ٹکرگءَ سوشلزم سوبمند و نہ بوتگ۔

نی بیا کمو ھمے اکسءَ زوم کن انت ءُ چاریں کہ لئیبءِ پٹ اوگانستان انت۔ یک نیمگے لئیبی سوشلسٹ روس انت ءُ دومی نیمگءَ تالباناں۔۔۔۔۔ انگت ھمے اکسءَ زوم کن انت ءُ چاریں گڑا زانگ بیت کہ یا و اے دروگے کہ تالبان ءُ روس جنگءَ انت یا و کابل ءُ تالبان جنگءَ انت۔ ءُ نزیکءَ چارگءَ اکس ساپ پدّر انت کہ تالبانانی جنگ گوں ماسکوءَ نہ انت بلکیں آہانی منزل کابل انت ۔ گڑا تالبان گوں کابلءِ روس دوستیں سرکارءَ جنگءَ اتاں۔ یا وَ اے وڑ ھم گُشت کن ئے کہ روسءِ کمکءَ کابلءِ سرکارءَ گوں امریکہءِ کمکءَ تالبان جنگءَ اتاں۔ یا و اے منگی انت کہ جنگ پیسرا اوں کابلءِ سرکار ءُ تالبانانی میانءَ بوتگ انچش کہ انو بوت یا اے کہ امریکہ ایں کپیٹلسٹ ءُ روسیں سوشلسٹءِ میانءَ اوگانستانءَ جنگے بوتگ ات۔

آ جنگءَ روس پد کنز اِت ءُ امریکہءِ دوستیں تالباناں کابل فتح کُت۔ پدا بوت نائن الیون۔ نائن ایلیونءَ القاعدہ ءِ دست مان ات۔ اسامہ بن لادن امریکہءِ مجرم بوت ءُ امریکہءِ جوڑ کتگیں تالباناں آئیءَ را وتی باھوٹ کت۔

امریکہ ءِ کمک کُرتگیں تالبانانی باھوٹ نی امریکہءِ دژمن بوت۔ ادا امریکہءِ گَوَرءَ دو راہ پشت کپت یکے وَ اسامہءَ پہل کن ءُ من کہ تئی سپر پاوری بزاں ہرءِ سرّگ *

یا وَ ھر وڑءَ اسامہ گرگی انت۔ اسامہءِ گرگءِ ھاترءَ امریکہ گوں نیٹوءَ اوگانستانءَ اتک۔ پدا چو روسءِ وڑءَ وتی یک دل دوستیں انچیں سرکارے جوڑ ئے کُت کہ جاگہ وَ کابل بہ بیت بلئے ھکم چہ واشنگٹنءَ جاری بہ بنت۔ ادا دو دگہ جنگ بنا بوت یکے امریکہ ءُ اسامہ ءِ دومی پدا تالبانانی ءُ کابلءِ۔ اے میانءَ ردی ءِ سرا اوں تالبناں کدی واشنگٹن ءَ گوں جنگ نہ کُرت انچش کہ آہاں کدی گوں ماسکوءَ جنگ نہ کُرت۔ تالبنانی جنگ گوں کابلءَ بوت۔۔۔۔ بزاں کہ امریکہءِ کمکءَ چہ جوڑ بوتگیں تالبانانی جنگ گوں امریکہءِ جوڑ کتگیں کابلءِ سرکارءَ جاری ات کہ امریکہ ءَ یک روچے جار جت کہ اسامہ گِرگ بوت ءُ کُشگ بوت۔

اسامہءِ کُشگءَ رند نی ناں وَ روس ادا ھست ات کہ جنگ دیمءَ بہ رؤت ءُ ناں گوں تالبناں دگہ دژمنی یے پش کپت۔ امریکہ ءَ کم کمءَ وتی دست انچش کہ تالبنانی سرا دور کتگ ات انچش چہ کابلءِ سرا دور کُت۔ کابلءِ ءُ تالبانانی میانءَ تالب گیشتر تواناہ انت ءُ روسءَ پد اے زمینی ھد ءُ اویلاں دگہ یک سوشلسٹ بلکیں گامے دیمءَ تر کمیونسٹیں چین اے دہرءَ باز دیمءَ کنز ات۔ نی پدا یک نیمگے سوشلسٹیں یا کمیونسٹیں چین انت ءُ دومی نیمءَ کیپیٹلسٹیں امریکہ۔۔۔۔ گڑا امریکہ داں چُنت کابلءَ لاپ دنت؟ ءُ چُشیں دگہ کے انت کہ کاپریں ،ڈونڈ واریں ، رستر ءُ کچک واریں ءُ یاجوج ماجوجانی ھلاپءَ جہاد بکنت؟

امیت انت کہ آیوکیں چندیں روچ یا ماہانی تہءَ اے وت پدر بیت کہ کابل کےءَ فتح کُت ءُ مئے ءُ شمئے مسیتانی آدینگءِ ترانانی تہءَ یاجوج ءُ ماجوجانی ذکر چنچو بیت۔۔۔  وت کابلءِ فتح کنگءَ پدر کنت۔