بلوچی زبان ءِ نامداریں گشندہ ءُ راجی ازمکار بانک زرینہ بلوچ ءِ ازم ءُ زند
بانک زرینہ بلوچ وہدیکہ شش سال ءِ چُکّے اَت آئی ءِ مات گلروز ءَ 1940 ءَ چہ چرے دگنیا ءَ سپر کُت ۔ پانزہ سال ءِ اُمر ءِ رسگ ءِ ھمرائی ءَ آئی ءِ ٹکّ ءِ مردماں گوں وتی ناکوزتک ءِ گون ءَ سور دات ۔
آئئ ءَ دو زھگ بوت کہ یکّےءِ کہ نام اکتر بلوچ ات آ 1952 ءَ ودی بوت ءُ دومی کہ 1957 ءَ ودّی بوت آئی ءِ نام اسلم پرویز اَت ۔
ایشی ءَ چہ پد آئی ءِ ءُ لوگواجہ ءِ میان ءَ وانگ ءُ زانگ ءِ جیڑہ ءَ سر کشّ اِت ءُ گڈ سر ءَ 1958 ءَ آ دوئیں جتا بوت اَنت ۔
1960 ءِ دھک ءَ آئی ءَ ریڈیو ھیدر آباد ءَ کار کنگ بِندات کُت ءُ 1961 ءَ آئی ءَ گشندھی ءِ پِڑ ءَ وتئ سوتانی اؤلی داد گِپت ۔
آئی ءَ دومی سور سندھ ءِ نامداریں راجدوست رسول بکش پلیجو ءَ گوں 22 ستمبر 1964 ءَ کُرت ۔
رسول بکش پلیجو ءَ چہ آئی ءَ یکّ زھگے بوت کہ نام ئِے ایاز لتیپ پلیجو اَت ۔
بانک ءَ 1979ءَ سامراجی سرکار زیا الھک ءِ زور ءُ آئی ھلاپ ءَ بانک زرینہ بلوچ ءِ توار کہ سرکار ءِ سر ءَ زوری ءِ ءُ ھک ءِ توار اولی رند ءَ بانک زرینہ ءَ چست کرتگ گڑا زیا الھک ءَ بانک دست گیر کنگ بوت ءُ زندان ءِ تھاریں کوٹیانی تہ ءَ بانک ءِ توار کید کنگ بوت بلے بانک ءَ وتی راجی جنز یلہ نہ کرت ءُ دیم ءَ جنزان بوت اے درگت ءَ سندھ ءِ مھلوک ءَ ابید چہ بلوچاں بزانکہ سندھیاں ھم بانک ءَ جوانیں دلبڈی دات ءُ آئی ءَ را وتی زبان سندھی ءَ *جیجی ماں* پنام دات ءُ جوانیں شرپ بکشات اے دور ءَ بانک ءِ گشتگیں سوت۔ ما چکیں بلوچانی، ما یاگی انت.
بانک زرینہ ءَ جابر ءِ ھلاپ ءَ زلم ءِ ھلاپ ءَ ھک ءِ توار چست کرتگ سندھ ءِ مزن مزنیں جھانگیر دار ءُ سردار ءُ وڑیرھانی زلم ءِ ھلاپ وتی جنز دیم ءَ بران کرت اے درگت ءَ بس بزگیں راج ءِ درد وار ءُ گموار مدام گوں بانک ءَ ھم دست ءُ ھمکوپگ اِت انت.
بانک زرینہ بلوچ استاد جمن ءِ شاگرد بوتگ ءُ استاد ءَ انچوش ساز ءُ زیمل ءِ پڑ ءَ ماھر کرتگ گڑا یک رندے 1960 ریڈیو پاکستان ھیدرآباد ءَ یک مراگشے برجم دارگ بوتگ آ مراگش ءِ تہ ءَ 600 شش سد گشندہ ءُ ازمکاراں بھر زرتگ اے درستانی تہ ءَ بانک زرینہ بلوچ اولی نمبر آتکگ ءُ داد گپتگ ئِے اے چیز سرجمیں دنیا ءَ پیش داشتگ ئِے کہ ساز ءُ زیمل ءِ کوھیں سیادی ءِ ھست گوں بلوچ راج ءَ ۔
بانک ءَ سندھی آجوئی بازیں گلانی تہ ءَ سندھ ءِ بیرک برز کرتگ ءُ اے جار پرینتگ کہ اے گلزمین مئے ماس انت پمیشکا سندھ ءِ ادبی گلاں بانک ءَ جیجی ماس ءِ پنام داتگ ۔
زرینہ بلوچ یک اَھدی ساز ءُ زیمل ءِ سوتی ءُ ترزکار ءِ بوتگ، اِزمکار ، نبشتہ کار ،رھدربر ءُ راجمانی ءُ چاگردی مردم ئے ھم بوتگ۔
بانک وتی یک گلگدارے تہ ءَ گش ایت کہ بندات ءَ من ریڈیو ءَ سوت جتگ گڑا ابید چہ منی مستریں برات ءَ دگہ کس سھی ءُ مالوم نہ بوتگ یک روچے ریڈیو پاکستان ھیدرآباد ءَ چہ شنگ بوتگیں گوستگیں مراگشانی منی یک سوتے منی کماش بزانکہ آرپیں پت گوشدارگ ءَ ات وھدیکہ سوت ھلاس بوت گڑا منی کماش ءَ دراھینت گوں سندھی گالوار ءَ " واہ مائی زرینہ واہ ۔۔ باز، جوان ءُ وش گش ئِے کاش ترا بہ دیست ئِے ۔ گڑا بانک گش ایت من گوں بچکندے نیم چمی کماش ءَ را چار ات ءُ وتی ساہ مان چت اَنت ھمت نہ بوت کہ بگوش آں کہ اے توار منی انت چہ ترس ءَ وت ءَ را یک کر کرت ۔
بانک ءَ بازیں ایوارڈز ءُ داد گپتگ ۔ چشکہ شاہ لتیپ ایوارڈ، وھید مراد، شاہ سچل، سامی، لال شہباز، ایس جی اے، ڈبلیو ایس سی، پی ٹی وی مراگش ایوارڈ ،رام پنجوانی، سندھی سادین، جد، ایوارڈ پیز اھمد پیز ایوارڈ ءُبازیں ایوارڈ ءُ داد گپتگ ئِے چشکہ سندھی ادبی گلاں بانک ءَشرپ بکشاتگ ھنچوک بلوچی جند ءِ زبان ءِ گلاں ھم نہ بانک زرینہ یک منتگیں استادے بوتگ ۔
بانک ءِ زند، پہ راج ءَ ندر بوتگ ءُ ارواہ پہ زیمل ءَ۔ 2005 مجگ ءِ شومک ءِ دراہ ءَ سوب ءَ کراچی ءِ مزن نامیں بیمار جاہ لیاکت، نیشنل نادراجاہ ءَ چہ اے کوڑھیں دنیا ءَ پہ مدام شت ءُ ابدمان بوت ۔
No comments:
Post a Comment