پاکستانءِ مثال میتگءِ میرءِ مثال

 پاکستانءِ مثال میتگءِ میرءِ مثال

نیوزی لینڈءِ ٹیمءَ مرچی سے روچءِ سیریزءِ بنداتی میچءَ نیم کلاک پیسر وتی بینڈُک بستگ انت ءُ پُشت ئے مان داتگ دیم پہ وتی مُلکءَ۔

نیوزی لینڈ کرکٹ بورڈءَ وتی بیانے ءِ تہءَ اشییءِ سبب ھمے بیان کتگ کہ آہانی ھالانی ردءَ آہانی لئیبیانی سرا ارش بیت کنت ءُ ادءِ جاور گیگ نہ انت پمیشکہ آ لئیب کُت نہ کن انت۔

بلئے پاکستانءِ ردءَ ادا جاور شر انت۔ ایمنی انت ءُ پدا پاکستانءِ انٹیلنجس جہان ءِ نمبر یک انت پمیشکہ سوال گوکو نہ کنت کہ ادا چیزے بہ بیت ءُ ادارگاں سرپدی مہ بیت۔ اے نمبر یک بوھگ وت بلائیں جُستے کہ گڑا ھمروچی ایں تراک ءُ جاورانی نہ گیگی آں یا و تؤ سرپد ئے ءُ انگت بوھگءَ آں یا مپتءَ وت گلاءِ دپ ءُ پیمازءِ بوہ۔۔۔۔

پاکستانءِ سرکار، میڈیا ءُ اے کتابانی ونتگیں راجءِ بزگی ھمیش انت کہ اشانی دلاں ھرچی اے وتی چماں گوں چار انت جہان ھم انچش بہ چار ایت۔ جہان ءِ چارگءِ وتی یک دابے۔ جہان چاریت تئی تہی ءُ ڈنی کرد چے انت اگاں تو اوگانستانءَ جنگ کنوکیں تالباناں مجاہد گُش ئے ءُ وتی تالباناں دہشت گرد بلئے جہانءِ چماں تالبان، تالبان انت۔

اگاں تو گُش ئے کہ ملکءَ گران نہادی نیست، میڈیا آجو انت، انساپءِ نظام بروبر انت ءُ بے ایمنی ھلاس بوتگ بلئے مردم چہ شُدءَ وت کُشی کنگءَ آں، اھوالکار ھیالانی درشانی ءِ سرا بندش جنگءِ ھلاپءَ زہرشانی کنگءَ آں، مردم بیگواہ انت ءُ اولی لئیبءِ بندات بوھگءَ گوں ہوٹلءَ بگر داں سڑک ءُ لئیبءِ پٹ ھر نیمءَ فوج اوشتاتگ۔ توترو ءُ سیٹی توارءَ آں۔ اے جاور بیت کنت تئی جندئے واستہ ھچ مہ بنت بلئے نیوزی لینڈءِ واستہ اے گُڈی دہر ءُ جنگی جاور انت۔ ءُ جہان ترا تئی گُشگءِ پدا نہ چار ایت آہاں وتءَ چم پِر ءُ آ ھمے گندگءَ آں کہ تئی سرا ھچ بروسہ نیست۔

مرچی سرکاری مردماں بگر داں پاکستانءِ مزنیں اھوالکار ءُ زانتکارانی ٹوئیٹ ءُ بیانانانی گندگءَ پد مئے بلوچستان ءِ میر، سیاستدان ءُ واجہ کارانی کرد دیمءَ کئیت۔

ادا ھر لس مردمءِ دیوانءَ میر، سیاست دان ءُ واجہ کارانی نام دُز، دروگ بند ءُ دگہ لہتیں نام کہ ادا لِکگ نہ بنت ھماہاں بلئے آ انگت وتی کسانکیں سرکلءِ تہءَ دلءَ وش انت کہ ما عزت انت۔

آ دگہ بلوچستانءِ دروراں بِل تؤ گوادرءِ مثالءَ بہ زور۔ ادا گوستگیں ہپتاد سال انت کہ مہلوک پہ آپءَ تنیگ انت، لئینءِ جیڑہ چہ ھما روچءَ ھست کہ ھما روچءَ کمبہ مِک بوتگ انت۔ جان سلامتی ءِ جاور اش انت زوم ءِ ڈنگ جنگءِ دوائی ترا نہ رسیت، چُک مات بوھگءِ چنچو کیس ھنگول ءِ چپ ءُ چوٹانی تہءَ مات چہ ساہءَ سِد انت۔ وانگ ءُ زانگءِ پڑءَ گوادر مکران ءُ بلوچستانءِ پدمنتگ تریں شھرستان انت۔ 

روزگار نیست بلئے میر ہردل عزیز انت۔ واجہ مئے فرزند ءِ گوادر انت ءُ سیاستدان عوامی طاقتءِ پُشتءَ گَلءَ بال انت۔ آ دگہ گپے کہ اے پانزدہ پانزدہ روچ عوامی جیڑہانی نامءَ مُلا موسیٰ موڑءَ دھرنہ دینت عوامی طاقت کجا جندئے جنین ءُ چُک ھم گپانی گوشدارگءَ نیَئنت اش۔  

چیاکہ اشانی چم اشانی کش ءُ گورءِ داشتگیں مردماں پر انت ھماکہ آہانی نمبر اشانی کرا ھست انت ءُ ھردیں اے داشتگیں مردم اسٹیسے یا سوشل میڈیاءَ پوسٹے جن انت کہ آ بزگ بہ گندیت ءُ دلءَ وش بہ بیت کہ عوامی طاقت مئے ھمراہ انت۔

انچش پاکستانءِ دلءَ سرجمءِ جہان پی ٹی وی ءُ اے آر وائے ءَ چاریت کہ اودءَ ھرچیز جوان انت۔ چو وَ ھر چیز پہ دپءِ گُشگءَ جوان بوت انت گڑا جام کمال ھم گشیت بلوچستانءَ ھر چیز جوان انت بلئے بلیڈپریشرءِ ھالءَ وتی وت زانت بزگ۔