پبلک لائبریری تربت ءُ نودربرانی تکانسری

سجاد اسد                     

 

وانگ ءُ زانگی سَپر ءَ کہ ما نودربر بِندات کن ایں گُڈاں مارا باندات ءِ عکسے گِندگ ءَ کئیت کہ ہمے عکس ءَ چاگردی، ملکی ءُ درملکُی دْراھیں مردمانی چم سک بَنت. ہمے عکس ءِ تہا لبزانکی پِگر ءُ سسا ساچیں مردم، داکتر، انجئینیر ءُ ایندگہ پڑ ءِ لَس مہلوک گندگ بَنت کہ اَھدے جُڑین اَنت. ہمے عکس بازیں مُدتے ءَ پد دیم ءَ کئیت. عکس ءِ دْراھیں مردم یکیں راہ ءِ مساپری ءَ گوں بندوک اَنت ءُ پیداک اَنت. 

ہمے راہ زانت ءُ زانشت اِنت، وانگجاہ، شاہ دربرجاہ ءُ لائبریری اَنت کہ گوں آھاں مھر چُشیں شوکیں اَھدے جُڑین اَنت ءُ چاگردءِ زینت ءُ چیدگ بَنت. 

ہمے رنگ ءَ اے گیدی ءِ نزوریں کارستاں چہ یکے مناں کہ مُدام دِل ءَ پہ لائبریریاں مِہرءُ دوستی ءِ شاہ یے ءَ سر کش اِتگ ۔منی میتّگ جوسک ءِ وانگجاہ ءِ لائبریری ءِ انچارج واجہ منظور احمد ءَ منا مُدام کِتاب چہ لائبریری ءَ کش اِتگ ءُ پہ وانگ ءَ داتگ ءُ پدا منی کالج ءِ زمانگ ءَ من عطا شاد شاہ دربرجاہ( کالج) ءِ لائبریری ءَ نشتگ ءُ وتی کالج ءِ کورس ءِ کتاب ونتگ اَنت۔ چہ کالج ءِ زمانگءَ رند من امام خمینی لائبریری کراچی ءُ لیاقت لائبریری کراچی ءَ وتی علم ءُ زانت ءِ سپر برجم داشتگ اَت ۔ امام خمینی لائبریری ءَ نودربراں انچو  ھاموشی ءِ گوما کتاب ، روتاک ءُ ماھتاک ونتگ اَنت کہ تو گُمان کُتگ بے بلاہ چہ زِند ءَ زبہر اَنت ءُ مرگ ءِ دامن اِش وتئیگ کُتگ بلے بزّگاں شر کُتگ ۔

 آہانی کوشست بوتگ کہ اے دگہ وانوک ھچ ڈسٹرب مہ بنت ءُ لیاقت لائبریری ءَ سینئیر ھر وھد ءَ پہ وتی کسترینانی سر ءُ سوج ءَ ساڑی بوتگ اَنت. لیاقت لائبریری ءَ پہ سی ایس ایس ، پی ایم ایس ءُ پی سی ایس ءِ چکاسانی تیاری کنوکانی واستہ ءَ جِتائیں سیکشن ھست اَنت ۔ مئے سینئر مدام نشتگ اَنت ۔ علم ءِ سپر دیما جُنزِت ءُ من شال ءَ اتک ءُ سر بیت آں ۔ بی ایم سی کمپلکس ءِ لائبریری ءَ اتک ءُ گوں سنگتاں وانگ بندات کُت ۔ بی ایم سی کمپلکس ءِ لائبریری بیست ءُ چار کلاک پچ اَت ۔ لائبریری ءِ جند کسان ات بلے وانگ ءِ چاگرد ئےِ بے مَٹ اَت۔

ہمے لائبریری ءَ روچے منا واجہ سراج ساھب ءَ سوج ءُ سر کُت کہ تو  کیمسٹری ءِ تہا ماسٹر بکن۔ من روچ ءِ مروچی ھم واجہ ءِ منتوار آں کہ مئے پہ وانگی پڑءَ ءُ چُشیں فیلڑانی گیش ءُ گیواری ءَ گوں مئے نزانتکاری ءِ سر ئےِ پْروشت. بی ایم سی کمپلکس لائبریری ءِ سپر آسر بوت ءُ منی سر صوبائی لائبریری سپنی روڈ ءَ کپت ۔ انچو رش ءُ کش اَت کہ پادءِ ایر کنگ ءَ جاگہ نیستگ اَت ۔ بلے سرکار (کنٹین والا ءِ نام )ءِ زپتیں چاہاں گوں ما مدام گراسی ءَ نشت ءُ وتی ونتگیں چیزانی سرا بحث کُت۔ من بلوچستان شاہ دربرجاہ ءَ ایم ایس سی کیمسٹری ءِ وانگ بندات کُت ۔ دو سال من کیمسٹری ڈیپارٹمنٹ ءُ شاہ دربرجاہ ءِ لائبریری ءَ چہ ملکی ءُ درملکی کیمسٹری ءِ کتاب زُرت ءُ ہمدءَ نشتاں، ونت ، نوٹس بنائینت ءُ چکاس ءِ تیاری کُت ۔ شاہ دربرجاہ ءِ لائبریری ءَ نیٹ اوں است اَت ۔ نودربراں نیٹ ءِ سرا آنلائن لیکچر اوں چار اِت۔ مزن شاہ دربرجاہ ءِ لائبریری ءَ مزنیں کساسے ءَ ڈگری کنوکیں نودربر پہ وت روزگارے ءِ شوھاز ءَ تیاری کنگ ءَ اِتنت. ہمے وانگ ءُ تیاری ءِ برورد ءَ گوں بازین نودربر سر ءُ روزگار بوتنت ءُ وتی منزل اِش گپت.

ہمے لائبریریاں گوں مہر انگت برجاہ اَت کہ زُوتاں نوشکل ءِ گل خان نسیر لائبریری ءَ منی سر کپت کہ اودا گل خان نصیر ءِ دْراھیں کتاب پہ ریفرینس ءِ ھاترا ایر اتنت. امیر آزاد خان نوشیروانی لائبریری خاران ءِ سنگت اوں شموشگ نہ بنت ۔ نوں من وتی گِس تربت ءَ اتکگ اوں ءُ دل مدام  گُشیت کہ  برو  تربت لائبریری ءَ بُوان. چہ شیلف ءَ Judd Harmon ءِ کتاب political thought ءَ چِست کن، ہمودا بہ نند ءُ چہ Plato ءِ دانکاں لہتیں دانک بْوان بلے ۔۔۔۔۔۔ بلے منی اے واھشت ماں وتی بُنکی جاگہ کیچ ءَ ناسرجم بوت وھدے من سرپد بوتاں کہ لائبریری ءَ کساس سالے بیت کہ بَند اِنت. نودربر دُْرس پہ یک لائبریری یے ءَ بے جاہ ءُ بے در اَنت. کسانیں نودربراں پہ سر ءُ سوج ءِ ھاتر ءَ اودا سینئیر نہ رسیت پہ ملکی ءُ درملکی اسکالرشپانی واست ءَ تیاری کنوکیں نودربراں اِدا جاگہ نیست. پہ کالج ءُ یونیورسٹی ءِ نودربراں ملکی ءُ درملکی کتاب نیست. پہ ریسرچ سکالراں اِدا ریفرنس کتاب ءُ ڈیجیٹل سیکشن نیست. پہ میڈیکل ءُ انجینئیرنگ ءِ انٹری ٹیسٹ ءِ تیاری کنوکیں نودربرانی واستہ اِدا لائبریری نیست۔ پہ بلوچی وانوکاں ایدا گل خان نصیر ءُ عطا شاد ءِ کتاب نیست اَنت۔ سی ایس ایس ، پی سی ایس ، ایس اسی ٹی ،  لیکچرار ، جنرل وانوک ، دُْرس بے وس اَنت۔پہ وانوکاں ایدا ھاموش ایں لائبریری نیست۔

ہمے لائبریریاں نندگ ءُ وانگ منا زِندگ کنت. من لوٹاں اَنچو کہ من ڈن ءُ دران پہ وانگ ءُ زانگ ءَلایبریری یے شوھاز اِتگ ءُ اودا ونتگ انَچو اِدا وتی دمگ کیچ ءَ لائیبریری ءَ بُواناں. اِدا لائیبریری ءِ بند بوھگ ءِ سوَب ءَ من تکانسُر آں. بلئے اَنگت اے مہرءِ سرشاہ اے وڑیں تکانسریانی ھوپ ءَ بے چاڑ نہ کُتگ ءُ اَنگت شاہ کشان اِنت. بائد اِنت نودربرانی چُشیں لوگاں (لائیبریری) آھاناں در پہ در کنگ مہ بیت دانکہ آ وتی لوگءَ جہمنند بباں ءُ وتی علم ءُ زانشت ءِ سپر ءَ توام بکناں ءُ منزلے ءَ وتا سر بکناں اگاں ناں چُشیں عکسانی چارگ ءَ پہ کس ھُدوناک نہ بیت. 

نودربرانی لوٹ اِنت کہ آھانی لوگ ءَآھاناں ساہ ءِ کشّگ ءَ بل اِت.