سائیکلون بزان کہ زری توپان چون جوڈ بنت ؟
بلوچستان ویدر فارکاسٹ
سائیکلون ءِ جوڈ بوھگ ءِ واستہ سک باز گرمیں موسم ءِ زلورت اِنت۔
وھدے کہ روچ ءِ گرمیں برانز زِر ءَ کپ اَنت گڑا گرمیں زِر گوات ءِ درجہ حرارت ءَ را گیش کنت گڑا گوات سک تینزی ءَ گوں آزمان ءِ نیمگ ءَ چست بیت ءُ وتی ھواری ءَ زِر ءَ چہ آپ ءِ کسانُکیں ترمپ ھم چست کنت گوں وھدے گرمیں گوات بُرز ءَ چست بیت گڑا جھل ءَ گوات ءِ کمے مولیکیول پشت کپ اَنت گڑا ھمے جاگہ ءَ جاہ ھالیگ بیت ءُ گوات ءِ کم دباو جوڈ بیت ءُ کش ءُ کر ءِ گوات ءِ کہ تُرندیں پریشر ھست اَنت آ تچک ءَ ھمے لو پریشر بزان کہ کم دباو والا جاگہ ءَ گِر اَنت گڑا اے آزمان ءَ اِنٹی کُلوک ءِ بزان کہ گڑیال ھساب ءَ گول گول چکرگ ءَ لگ اَنت وھدے گوات سارت بیت گڑا اے جمبر ءِ شکل ءَ زور اَنت ءُ گوات ءِ بُرزی آزمان ءَ ترندی ءَ گوں چست بوھگ ءِ سوب ءَ گوات ءِ سکیں تُرندیں دباو ئے جوڈ بیت گڑا اے دباو گوات ءَ گیشتر توکی نیمگ ءَ جپیت ءُ کاریت گڑا سکیں ترندیں گوات کشگ ءَ بندات کن اَنت ءُ یک سائیکلونے جوڈ بیت۔
یک تاکتوریں توپانے ءِ تھ ءَ گوات ءِ تُرندی 120 کلومیٹر فی کلاک ءِ ھساب ءَ بیت یا و چد ءُ گیشتر اُوں بیت کنت سائیکلون ھما وھد ءَ نزور بنت وھدے کہ آ زمین ءَ گوں ڈیک بہ ور اَنت۔
سائیکون زِر ءَ تھ ءَ 250 کلومیٹر ءِ ھساب ءَ پراہ بنت یا کم اُوں بوت کن اَنت۔
سائیکلون وھدے زِر ءَ اِنت اہی ءَ نمبیں گوات سک باز رسیت ءُ تاکتور بیت بلے وھدے زمین ءَ کہ ایر کپیت نمبیں گوات اُوں ھتم بنت ءُ ھمے سوب اِنت کہ سائیکلون نزور بنت ءُ ھتم بنت یا و لو پریشر ءِ شکل ءَ زور اَنت سپر کناں ءُ دومی زِر ءَ ایر کپ اَنت ءُ پدا تاکتور بنت۔
دنیا ءِ تاکتوریں توپان "بولا" بیتگ کہ آ 1970ءَ بنگلادیش ءَ آتکگ بیتگ ءُ آ انچو ھترناک بیتگ کہ پنچ لَک ءِ ھساب ءَ مردم مُرتگاں ءُ گوات ءِ تُرندی 150 کلومیٹر یک کلاکے یے ھساب ءَ بیتگ
"بولا" سائیکلون ءَ انسانی قاتل گُشگ بیت سائیکلون بولا کیٹیگری چار ءِ توپانے بیتگ۔
نی بلوچستان ءِ گپ ءَ کنیں ءُ بلوچستان ءِ نیمگ ءَ سائیکلون باز کم کاینت اشی ءِ مستریں سوب اہئ پریشر اَنت کہ اے مُدام ایران ءُ بلوچستان ءِ سرا ھست اَنت بلوچ اہی پریشر ءَ شمال گوشنت ءُ گوات ءِ در بزان کہ گوادر ءِ نام ھم ھمے شمال گوات ءِ سوب ءَ ایر کنئگ بیتگ پرچہ کہ اے گوات یکشلہ بلوچستان ءِ تیاب دپی دمگاں کَشیت ءُ بلوچستان ءِ ڈُکال ءِ مستریں سوب ھم ھمے اہی پریشر گوات اِنت کہ لو پریشراں نئلیت۔
بیست ءُ دو مئی نوزدہ سد ءُ نود ءُ نو ءَ "ٹو اے" نامیں سائیکلونے ءَ ٹھٹہ بدین ءِ نیمگ ءَ ڈیک وارتگ ءُ بلوچستان ءَ ھوار سندھ ءِ ھشتاد ھزار مردم چہ اہی ءَ متاسر بیتگ اَنت ءُ یک سد نود مردم مُرتگ۔
ھژدہ جون ھژدہ سد ءُ نود ءُ پنچ ءَ ھم یک توپانے ءَ مکُران ءَ ڈیک وارتگ کہ اہی ءِ ریکارڈ باز کم دست کپیت پدا سئے مئی نوزدہ سد ءُ یک ءَ دگہ یک توپانے ءَ بلوچستان ءَ ڈیک وارتگ کہ اِشانی نام آ وھد ءَ بندگ نہ بیتگ اَنت ءُ اشاں ھما وھد ءَ ھم سک باز تاوان داتگ اَنت مردم۔
ھَشت جون نوزدہ سد ءُ چل ءَ دگہ یک توپانے مکُران ءِ دمگ پسنی ءِ کِر ءُ کشاں ڈیک وارتگ ءُ سندھ ءُ بلوچستان ءَ توپانی ھور بیتگ اَنت۔
پدا دو ھزار ھپت ءَ سائیکلو گونو ءُ سائیکلون یمین ءَ بلوچستان ءَ تباہی آورتگ گونو شش جون 2007 ءَ عمان ءَ شُتگ ءُ ڈیک وارتگے ءُ یمین ءَ بیست ءُ شش جون ءَ پسنی ءُ اورماڈہ تیاب دپی دمگاں ڈیک وارتگ ءُ سک باز تباہی آورتگے چہ یمین ءَ ایوک بلوچستان ءَ سئے سد مردم مُرتگ اگاں سندھ ءِ مرتگیں مردماں ھوار کنے گوں گڑا ٹوٹل ھَپت سد ءُ سی مردم مُرتگ۔
شش جون دو ھزار دَہ ءَ سائیکلون پِیٹ نامیں توپانے ءَ کراچی ءَ ڈیک وارتگ بلے چہ اہی ءَ ھم بلوچستان ءَ سک باز توپانی ھور بیتگ لوگ کپتگاں یکدار پُرشتگاں ءُ گوادر ءَ سئے سد ءُ ھپتاد ملی میٹر ھور ریکارڈ کنئگ بیتگ چہ پِیٹ ءَ ھژدہ مردم بیران بیتگ پدا میان ءَ ھم دو سئے سائیکلون جوڈ بیتگ کہ آ بلوچستان ءَ نیتکگاں چہ آہاں نیلوپر ءُ لوبان سک نامدار اَنت یازدہ سال ءَ پد انوں دوھزار بیست ءُ یک ءَ 1 اکتوبر ءَ سائیکلون شاھین نامیں توپانے بلوچستان ءِ نزیک چہ گوزان دیم پہ عمان ءَ روگ ءَ اِنت چہ اِشی ءَ باز تاوان نہ بیتگ ءُ بلوچستان ءِ تاریخ ءِ مھربان تریں سائیکلون شاھین زانگ بوھگ ءَ اِنت۔
3/10/2021
#BWF
No comments:
Post a Comment