بلوچ ءِ دود ءُ ربیدگ ءُ ربیدگی روچ
نبشتہ کار: کہدہ عبدالغفور واڈیلہ
دو مارچ بزانکہ بلوچ ءِ دُود ءُ ربیدگ ءِ روچ گشگ بیت ءُ اے روچ بلوچ ءِ دود ءُ ربیدگ ءِ روچ ایر کنگ بیتگ ۔ بلوچ سک کوہن انت انچو کہ جہان انت ، اے روچ وَ انوں دارگ بیتگ بلے اے اوں شر انت کہ نہ بوہگ ءَ چہ بوہگ گہتر انت ، اے یک شریں چیزے ۔ اے چیز ءَ باز مردم شر لیکیت باز مردم ایشی ءَ ہراب لیکیت بلے من اے روچ ءِ دارگ ءَ شر لیکاں ۔ من اے روچ ءَ اے واست ءَ شر لیکاں کہ اے روچ ءَ بلوچ یک جاہ بنت ، مہلوک مُچ بیت ، آ انچو گَل ءُ شادان بنت انچو کہ عید ءَ بنت ۔
نوں ایشی ءَ چے پیم دیم ءَ بَر اَنت ، چے پیم کن اَنت ، چے پیم مُچی کن اَنت ءُ زاہر بنت ، اے مئے ءُ شمے سر ءَ انت ۔ ہما مردماں کہ اے مُچی برجم داشتگ ءُ دیم ءَ آورتگ آ مردم احمد اقبال انت ، آئی ءَ اے روچ بنگیج کتگ ، اے روچ دیمروئی کنگ ءَ انت ۔ نوں اے روچ ءَ درستیں بلوچ ھوار بنت ، اے روچ پہ مہلوک ءَ یک گل ءُ شادہی روچے ، آ وداریگ بنت کہ اے روچ کدی بئیت انت ۔ آ اے روچ ءَ ساجو بنت ، گپ ءُ تران کن اَنت ، آ اے روچ ءَ عید ءَ چہ کم سرپد نہ بنت ۔ انچو کہ پنجاب ءِ بلوچ ، سندھ ءِ بلوچ یا جہان ءِ بلوچ ، اے روچ آہاں نزیک ءُ ھوار کنت ، اے روچ آہانی دل ءِ تہا یک ھُب ءُ واھگے کاریت ۔ انچو کہ پیشتری زمانگ ءَ اے کار ءُ مراگش بی ایس او ءِ سنگتاں جم داشتگ اَنت بلے انوں آ وہد ءُ پاس گوست ءُ شت اَنت ۔ اگاں نوکیں پدریچ اے کار ءَ کنگ ءَ انت منی نَزّ ءَ اے اوں شر انت ، چیاکہ ما یک دومی ء َ زانیں بلے چونائی ء َ اے دود ء ُ ربیدگ ء ِ روچ ء ِ اے بزانت نہ انت کہ ما یک پاگے بندیں یا پچ ء ُ پوشاک یا ورگ اڑ کنیں کہ اے مئے دود ء ُ ربیدگ اَنت ۔ ما ہمے سرپد بئیں کہ ما وتی ربیدگ ء َ پیلہ کنگ ء َ ئیں بلے منی حیال ء َ چش نہ انت ۔ منی حیال ء َ بلوچ ء ِ وتی یک کردے است انت ، بیا ہما کرد ء ِ سر ء َ گپ ء ُ تران ء ِ جہد کنیں ۔ چونائی ء َ بلوچ ء ِ چار لبزانی بزانت چوش اے رنگ ء َ زانگ بیت کہ ب ء َ چہ بہادر ، ل ء َ چہ لائق ، و ء َ وفا دار ء ُ چ ء َ چالاک ۔ بلے پدا ایشانی بارو ء َ اے پیم گپ کنیں ۔ ہما بامرد بہادر گشگ بنت کہ دلیر بیتگ پہ وتی ہمساھگ ء ِ رکھینگ ء ِ واست ء َ آ مدام ساجو بیتگ اَنت ۔ آہاں حق ء ِ جنگ کتگ ، آہاں نزور ء ِ سر ء َ کدی دست چست نہ کتگ ، نزور ء ِ سر ء َ دست چست کنگ
بلوچ ء ِ کرد نہ بیتگ ۔ بلوچ ء َ وتی مہلوک ء ِ گہتری ء ِ واست ء َ جہد کتگ ، ل ء َ چہ لائق ، لائق ایش انت کہ ہر چیز ء ِ لائق انت ، چش اے وڑ انت کہ آئی ء َ وتی ہمساھگ انچو دوست بیتگ چشکہ وتی چک ء ُ اوبادگ بہ بنت ، اے چیز آئی ء ِ لائقی بیتگ ، آ مدام گوں وتی ہمساھگاں ھوار بیتگ اَنت ، بلوچ ء َ ہر کارے کتگ گڈا ھور ء ُ ھواری ء َ کتگ ئے ۔ آئی ء ِ لائقی ہمیش انت کہ آ مدام نزور ء ِ گوما ہمکوپگ ء ُ ہم دست بیتگ ۔ و ء َ چہ وفا دار ، وفادار ایش انت کہ آئی ء َ ہر چیزے ء ِ وعد ہ کتگ گڈا وتی وعدہ ء ِ سر ء َ اوشتاتگ ، آئی ء َ بد قولی نہ کتگ بلکیں وتی وعدہ ء ُ قولانی سر ء َ مدام اوشتاتگ ۔ انچو کہ یک لبزے بلوچ ء ِ واست ء َ گشگ بیت ’’ تاسیں آپ سد سال ء ِ وفا ‘‘ آ وتی جاگہ ء َ بلے بلوچ ء َ ہر وہدے گشتگ یا زبان داتگ ئے گڈا آئی ء َ وتی قول پیلہ کتگ ۔ آ ہجبر وتی قولاں چہ نہ بَج اتگ ، انچو کہ بلوچ گش انت کہ سر بروت بلے زبان مروت انت ، آئی ء َ وتی زبان ء ُ قول ء ِ سر ء َ وتی سر داتگ ء ُ قربان کتگ ۔ ہمے ڈول ء َ مارا یک کوہنیں داستان ء ُ کسہے یاد کیت کہ میر چاکر ء ِ دیوان ء َ ہر کس ء َ یک شرط ء ُ قولے کت ۔ اودا جاڈو جلب نندوک ات ، جاڈو جلب ء َ گشت کہ ہر کس منی ریشاں بہ گیپت گڈا من آئی ء ِ گردن ء َ بُرّاں ، جاڈو جلب ء َ وتی قول ء ُ زبان پیلہ کت ۔ انچو کہ یک کسانیں چکے ، چک ء َ وتی پت ء ِ ریش دست جت اَنت گڈا ہر مردم ئے جاڈو جلب ء ِ نیمگ ء َ چارگ ء َ لگ ات ۔ جاڈو جلب ء َ وتی چک یک کر ء َ کت ء ُ دُور دات ، آئی ء َ وتی چک ء ِ سر ء ِ پرواہ نہ داشت ، آئی ء َ وتی قول پیلہ کت ۔ بلوچ ، و ء َ چہ وفا دار گشگ بیت ۔ چ ء َ چہ چالاک گشگ بیت ، چالاک ء ِ مول ء ُ مراد ایش انت کہ میدان ء ِ جنگ ء َ انچو چالاک بیتگ اَنت ، جنگ ء ِ تہا چالاک بیتگ اَنت ، اے وڈ نہ بیتگ کہ مردماں رَدّ بدئے ، آئی ء َ رَدّ دئیگ نہ زانتگ ، آزہم جن ئے بیتگ ، آ زہم جن ئے ء َ چالاک بیتگ ، آئی ء َ جنگ ءِ دیم پہ چالاکی داشتگ ۔ آئی ء َ مدام گوں وتی دژمن ء َ دیم پہ دیم جنگ کتگ ۔ بلوچ ء ِ داستان ء ُ کسہ اے ڈول اَنت کہ آئی ء َ کدی پشت نہ داتگ ، آئی ء َ ہر وہد ء َ تیر وارتگ یا زہم جنگ بوتگ گڈا آئی ء َ دیم پہ دیم وارتگ ۔ بلے چش نہ انت کہ مروچیگیں وعدہ ء ُ قولاں ما وفا نہ کنیں ، وتی وعدہ ء َ چہ بَج ئیں ء ُ پدا بلوچ ء ِ گپ ء َ کنیں ۔ بلوچ یک کردے ء ِ نام انت ، بلوچ تہنا اے پُچ ء ُ پوشاکانی نام نہ انت ۔ مارا ہما کرد برجم دارگ لوٹیت ۔
ہر یکے اے پچ ء ُ پوشاکاں گور ء َ کنت بلے آ بلوچے بیت نہ کنت دانکہ آ ئی ء ِ تہا بلوچ ء ِ کرد مہ بیت ۔ ہر ہمک مردم ء ِ تہا اے کرد بنت گڈا آ بلوچے گشگ بیت ۔ آئی ء ِ واست ء َ بازیں قربانی یے دئیگ لوٹیت ۔ انچو کہ اے روچ ء َ ما دارئیں ، من پمیشکہ گشاں کہ ’’ نیستی ء َ چہ شمبو گہہ اِنت ‘‘ چہ ہمے روچ ء ِ دارگ ء َ لس مہلوک ء ِ ھُب ء ُ واھگ بلوچیت ء ِ نیمگ ء َ کیت انت بلے اے کرد بے حال کنگی نہ اَنت ۔ ہمے چیز ء ُ کرد ء ِ تہا بہ بیت ، ھبر کنگ ء َ بہ بیت بلے بلوچ ء ِ کرد ء ُ کار آئی ء ِ تہا مہ بنت گڈا آ بلوچے نہ انت ۔ مرچی باندا ہر کس ھبر زانت ، درآمد اوں بلوچی زان اَنت ، بلوچ ء ِ جند اوں بلوچی زانت بلے آئی ء ِ کرد چارگ بیت کہ آئی ء ِ کرد چی انت ۔ آ راہ ء َ روان انت ، بدل بیان اِنت ، قول ء ُ وعدہ کنت ، قول ء ُ کرارانی سر ء َ نہ اوشتیت ، آئی ء ِ ھلاپ ورزی ء َ کنت ،زبان دنت وتی زبان ء ِ سر ء َ نہ اوشتیت۔ اے اوں یک بلوچے ، اے بلوچ گشگ نہ بنت ۔ دود ء ُ ربیدگ یکیں ہمے پوشاک ء ُ جامگ ء ِ نام نہ انت ، دود ء ُ ربیدگ ء ِ تہا اے درستیں چیز است انت ۔ ہمے ڈول ء َ ما ہمیشاں بزوریں گڈا ما الم ء َ بلوچ بیت کنیں ، ما وتی مقصد ء َ پیلہ کت کنیں ۔
بیا کہ من شمارا بلوچ ء ِ بابت ء َ دگہ گپے گشاں ، انچو کہ ما مدام گُشیں کہ بلوچ عرب انت ، حلب ء َ چہ اتکگ اَنت ۔ منی نَزُ ء َ اے پیم نہ انت ، من انچو کہ چاراں ، انچو کہ مہلوک گپ کنت ، منی دوست ء ُ سنگت گپ کن اَنت کہ تُرکی ء ِ تہا بلوچاں ہپت سد سال ء ِ کوہنیں تامرے جوڑ کتگ کہ آہاں بلوچی پُچ ء ُ پوشاک گور ء َ انت ، آ زاہر بوہگ ء َ انت کہ آہاں وتی تامر ء ِ تہا بلوچی پچ ء ُ پوشاک گور ء َ کتگ ۔ من اوں ارادہ کت کہ ہمے تامر ء َ بہ چاراں ، وہدیکہ من اے تامر چار ات ۔ اودا کائی ٹک ( قبیلہ ) یک ٹکے ، آ ٹک وت ما وت تپاک اَت ، اگاں ہر کس کہ تپاک بیت ، مئے منزل ء ِ نشانی تپاکی انت ۔ منی نَزّ ء َ اے تامر ء ِ کارست بلوچ اِت اَنت ۔ آ اے ڈول ء َ بلوچ اِت اَنت کہ آہاں بلوچی پچ ء ُ پوشاک گور ء َ اَت ، اے ہما بلوچ اَنت کہ حلب ء َ شتگ اَنت ، اے ہمیش انت کہ ما وتارا عرب گش ا اَنت بلے ما عرب نہ اَنت ۔ ما بلوچیں ،عرب نہ ئیں ، ہمے وہد ء َ کہ ادا جنگ بوہگ ء َ ات ۔ منگول جنگ ء َ اِت اَنت ، منگولاں ہر مردمے گپتگ ات گڈا آ جتگ ء ُ زورانسری گوں وتی لشکر ء ِ گوما برتگ ات ، ہمے گپتگیں مردم دیم ء َ کتگ اَنت ء ُ وت پشت ء َ بیتگ اَنت ۔ آہاں گشتگ کہ اگاں شما پشت ء َ کنز اِت گڈا ما شمارا جن ئیں ، دیم ء َ روئے گڈا مئے دژمن شمارا جن اَنت ۔
ہمے ڈول ء َ ایشانی یک جنگے بلوچانی گوما بیت ، ہمے کشک ء َ دیم پہ ہندوستان ء ِ نیمگ ء َ رءوگ ء َ بنت ،ایشاں گوں بلوچاں ڈیک دات ، بلوچانی گوما ایشانی جنگ بیت گڈا بلوچاں وتی دلوت زرت اَنت ۔ بلوچ ہما شپانک ء ُ دلوت داروکیں مرد م انت ۔ آہاں ایشانی گوما جنگ کت ء ُ اے دیم ء َ مان تر ات اَنت ۔ آ تُرکی ء ِ تہا پترت اَنت ، تُرکی ء ِ زمین ء َ چہ دیم آہاں یک چراگ جاہے پکار اَت ، چراگ جاہ اے ڈول اَت کہ تُرکی ء َ چہ شام بزانکہ حلب سک آباد ء ُ ڈولدار اَت ۔ اے حلب ء َ چہ ڈن سوریا ء َ ہمودا نشت اَنت ۔ آ وہد ء َ سوریا ء ِ بُن شہر بزانکہ آہانی تحت حلب ات گڈا کائی ٹک وت ما وت سک تپاک ات ، ہم مشت ء ُ ہم دست اَت ۔ آ گوں تپاکی ء َ ہما مہتر ء ِ کر ء َ شت اَنت کہ آ ہما وہد ء ِ باد شاہ ات ۔ آہاں گوں باد شاہ ء َ گشت کہ ما چش چش اتکگیں مارا دلوت ء ُ دگہ بازیں چیز گون اَنت ، مارا تئی کمک پکار اِنت ، مارا تو پناہ بدئے ، مارا جاگہے بدئے ما ہمدا نندئیں ۔ گڈا ایشاں چے کت ، ہما کہ باد شاہ ات آئی ء َ گشت کہ ما شمارا جاگہہ دئیں بلے شما مئے یک کارے بہ کن ات ، مئے کار اے ڈول انت کہ مارا وتی لشکر ء َ چہ کمک بہ کن اِت ۔ اے وہد ء َ حلب ء َ تہی جنگے بوہگ ء َ ات ، ہمے بادشاہ ء ُ مہتر ء ِ وتی گہار زتگے است ات ، آ گوں وتی ناکو ء َ جنگ کنگ ء َ ات ۔ آ وتی ناکو ء ِ حکم ء ِ پدا جنگ کنگ ء َ ات گڈا ہما مہتر ء َ گشت کہ من شمارا جاگہہ دیاں ۔ باد شاہ ء َ گشت کہ حلب ء ِ شہر ء َ چہ کساس 20 کلو میٹر ہما دیم ء َ وتی دلوتاں بیار ات ہمودا شمے جاگہہ انت بلے من ء َ چیزئے مردم بدئے ات ۔ اے شت ء ُ وتی ٹک ( کائی قبیلہ) ء ِ کر ء َ واتر بیت انت ۔ کائی ٹک ء ِ سروک سلیمان شاہ ات ، ( آئی ءِ چک ء ِ نام ارتغل ات ) آہاں وتی سروک ء َ گشت کہ مارا جاگہہ داتگ ئے ۔ آہانی آہیگ ء ِ وہد ء َ حلب ء ِ باد شاہ ء ِ گہار زتک ء َ حکم گپتگ ات کہ من وتی ناکو ء ِ گوما جنگ نہ کناں ۔ اے کسہ ہمے ڈول انت ۔
بلوچ مدام گش اَنت کہ ما عرب ئیں ، کس ادا عرب نہ انت ۔ اے ہما مردم اَنت کہ پدا واتر بیتگ ء ُ اتکگ اَنت ۔ گڈا بلوچاں سَے جاگہہ ء َ جنگ کتگ ۔ آہانی جنگ گوں منگولاں بیتگ ، مغل آہانی دمب ء َ کپتگ ات اَنت ۔ گڈا اے ہمدا وتی چراگ جاہ ء َ اتکگ انت ، اے نہ لوٹ اَنت کہ دگہ کسہ ء ُ حالے بہ بیت ۔ اے ہمدا اوشتات اَنت گوں آہاں جنگ اش دات ۔ پدا اے یکے ہما حلب ء ِ تہا ہمے بادشاہ ء ِ ہما مردماں گوں ایشانی جنگ ء َ کہ بادشاہ کجا شت کہ مارا جاگہی دات ۔ ایشاں گوں ہما عرباں جنگ کت ، پدا اودا قُدس ء َ اوں ایشاں جنگ بنگیج کتگ ات ۔ آ اوں ایشاں نیلگ ء َ ات انت کہ اے جنگولیں مردم انت ۔ آ وہد ء َ اسلام نوک اتکگ ات ، آ وہدی اسلام ء َ ہپت سد ء ُ پنجاہ سال بیتگ اَت ۔ ایشاں گوں اسلام ء ِ گوما باز مہر است ات گڈا اودا فلسطین ء َ بزانکہ قُدس ء ِ جنگ ء َ اوں ھوار بیت اَنت ، گوں صلیبی آں جنگ اش دات ۔ چوشکہ ما آہاں عیسائی گشیں ، آہانی جنگ گوں عیسائی آں بوہگ ء َ ات ۔ اودا جنگ اش کت ، سَے جنگاں دیم پہ دیم بیت اَنت ، من اے واست ء َ گشاں اگاں ما تپاک بہ بئیں ، انچو کہ مئے کائی یک قبیلہے ات ۔ کائی قبیلہ تپاک ات ، آئی ء َ سَے جاگہ ء َ جنگ کت ۔ تپاکی مئے منزل ء ِ نشان انت ، اگاں ما تپاک بئیں ما وتی منزل ء َ سر بئیں ۔ مدام پتاکی ء ِ گپ ء َ بہ کن ات ۔ انچو گڈا اے روان بیت انت گڈا ایشاں ہما جاگہہ کہ حلب ء ِ ایشاں گپت ۔ پدا ہمودا جاگہ اش کت ء ُ ہمودا جاہ منند بیت اَنت ۔ پدا ہما مردم واتر بیت اَنت اینگو اتک انت ، مئے شاعراں شعر پر بست کہ اے عرب انت ۔ اے عرب نہ انت ، اے ہمیش انت کہ پیسر ءَ شتگ انت ء ُ پدا واتر بیتگ انت ۔ آہاں چہ لہتیں مردم ، ہرچی کہ اودا قُدس ء َ جنگ ء َ ات انت بزانکہ فلسطین ء َ گڈا آہاں ہما قُدس ء ِ جنگ ء َ باج برت ۔ اودا عرباں انچو کہ اُردن یک ملکے جوڑ بیت ، ایشاں ہما جاگہہ گپت ء ُ اُردن ء ِ ہما مہتراں دات ۔ اے روچ ء ِ مروچی ہما جاگہہ ء ِ جاہ منند اَنت ۔ آہانی لشکر ء ِ تہا مزنیں بہر زیروک بلوچ ات اَنت ۔ آ باز براں رسانک در ء َ اتکگ ، ما ہماہانی چک ء ُ نماسگیں ۔
گڈا یک روچے تر ء ُ تابے ء ِ وہد ء َ یک جاگہے من لہتیں مردماں گوں ڈیک دات کہ آ عرب ات اَنت ۔ چوشکہ ما یک جاہے نشتگ ات ء ُ وت ما وت گپ ء ُ تران ء َ اتیں کہ مارا جست اش کت کہ شما چونین ئے ۔ مئے تہا لہتیں بلوچ گون ات ، ما عربی زبان ء َ گپ کنگ ء َ اتیں ، لہتیں بلوچی ء َ گپ کنگ ء َ ات ۔ ما گشت کہ ما بلوچیں ، ما پلان ملک ء َ چہ اتکگیں ۔ آہاں گشت کہ ما بلوچاں نہ زانیں ، ما جست کت کہ تو کجا نشتگ ئے ۔ اے گوستگیں سال ء ِ گپ انت ، ما آئی ء َ جست کت ، آئی ء َ گشت کہ من اُردن ء ِ نندوکاں ۔ ما جست کت کہ اُردن ء ِ تہا بلوچ است ، آئی ء َ گشت کہ من نہ دیستگ ۔ گڈا مئے سنگتاں گوگل پٹ ء ُ پول کت ، گوگل ء ِ تہا پیش دارگ بیت ، ما آئی ء َ پیش داشت اَنت ، آ وت ھیران بیت ۔ آ ہاں گشت کہ اے بلوچ اَنت ، بلوچ ،ہمیش اَنت ، اے وَ اُردن ء َ بادشاہ ء َ چہ پد ملک ء ِ شرتریں مردم گُشگ بنت ۔ آہاں جست کت کہ اے چتور بلوچ گشگ بنت ۔ ما گشت کہ اے بلوچ انت ، اے مروچیگیں گپے نہ انت ، اے ہپت سد ء ُ پنجاہ سال پیسری گپے کہ اے بلوچ ہمودا اتکگ اَنت ۔ ہمے رنگ برجس بلوچ کہ اُردن ء ِ لشکر ء َ یک زمانگے جنرلے بیتگ ۔ من پدا وتی بلوچاں گشگ لوٹاں کہ ما عرب نئیں ، ما بلوچیں ۔ وہدیکہ ما عر ب بئیں گڈا بلوچ چہ کجا اتکگ اَنت ، مئے زبان چہ کجا اتکگ ، مئے دود ء ُ ربیدگ چہ کجا اتکگ ۔ منی نَزّ ء َ ما بلوچیں ، ما عرب نئیں ۔ اے منی زانت ء ُ زانگ ء ِ گپ اَنت اگاں کَسّے گشیت کہ بلوچ ، عرب اَنت گڈا وتی دلیلاں دیم ء َ بیاریت ء ُ اے گپ ء ِ شون ء َ بدنت کہ بلوچ چون عرب اَنت ۔
ہمے رنگ ء َ یک روچے من وش ٹی وی ء َ چارگء َ اتاں کہ یک ورنایے وش ٹی وی ء َ گپ ء َ ات کہ من یک رندے استبول ء َ پہ بیپار ء َ شتگا ں ، منی نَزّ ء َ اے ورنا احمد اقبال ء ِ گہار زتک اَت ۔ ورنا گشگ ء َ ات کہ ما یک ہوٹلے ء َ داشتگ ات گڈا ما ہوٹل ء ِ لابی ء َ نشتگ اتیں کہ منی گوشاں گش ئے بلوچی گپ پیداک ات انت ۔ ما میزان میزان ء َ مردمانی کر ء َ شتیں ، آہانی پچ ء ُ پوشاک تُرکی ء ِ ڈول ء َ انت ۔ گڈا من درائینت شما بلوچی زبان ء َ گپ کنگ ء َ ات ، آہاں گشت ھو ، آہاں گشت کہ ما بلوچیں ۔ آہاں گشت کہ ما ادا چار لاکھ بلوچ جاہ منندئیں ۔ اے ہمائی ء ِ گپ ات انت ، بائد کہ ایشانی بارو ء َ گیش پٹ ء ُ پول کنگ بہ بیت ۔
مرچی من وتی زھگانی اے اکس دیست اَنت کہ زھگاں منی کتاب دست ء َ انت ، من گَل ء َ چہ بال بیتاں ۔ اے چک ء ُ اوبادگ کہ من دیستاں من سک گل بیتاں ، ایشاں گوں وتی ماتی زبان ء َ سک باز مہر است انت ۔ چوشکہ اے کتاب منی نہ انت ، اے کتاب مئیگ انت ۔ اے کتاب ہمے زھگ ء ُ چکانی انت ۔ ہمے کسہ ء ُ داستان مئے درستانی انت ، ہمے داستان مئے وتیگ انت ، انچو کہ شما گپ جت ، ہمے ڈول ء َ ہمے کسہ اے واست ء َ آہاں وش بیت اے آہانی وتی جند ء ِ زبان انت ۔ اے آہانی لوگ ء ِ زبان انت ، مئے مات ، پت ، پیروکانی ہما وشیں کسانی ء ِ کسہ کہ ما رستگ ء ُ مزن بیتگیں ، ما ہمے زبان ء َ گپ ء ُ حال کتگ ۔ انچو کہ مئے اے درستیں زھگ ء ُ اوبادگ ہمے زبان ء ِ گپ جنوک اَنت ۔ زاہر انت کہ اے زبان آہانی وتی زبان انت ، اے زبان آدگہ زباناں چہ ایشاں وشتر بیت ، آ اے زبان ء َ شرتر سرپد بنت ۔ دگہ زباناں ما اینچک سرپد نہ بئیں ۔ بلے چونائی ء َ مئے جہد ہمیش انت کہ ما وتی وش ء ُ شیرکنیں زبان ء َ شہد ء ُ شیرکنیں گپ بہ کنیں کہ مئے چک ء ُ اوباگ مئے ماتی زبان ء َ سرپد بہ بنت ۔ دیمتر ء َ مئے آءوکیں پدریچ وتی ماتی زبان ء َ شرتر پوہ بہ بیت ۔ من شمے وانگ ء ُ شمے وانگ جاہ ء َ چہ سک باز وش بیتاں انچو کہ من پیسر ء َ گشتگ ات کہ منی دیرگیں واھگے بیتگ کہ من کلر شاخ ء َ چہ بلوچیں دنیا ء َ نزیک بہ کناں ء ُ آئی ء ِ وتی پجارے بہ کناں ۔ اے پجاروکی اے ڈول بیت کنت کہ مئے چک ہما زبان ء َ برجم بدار انت ، ہما گپ کہ ما ڈنی ملکاں گوں وتی مردماں جتگ اَنت کہ کلر شاخ ء ِ بلوچی انگت ہما داب ء َ انت کہ پیسر ء َ بیتگ ۔ مروچی ما اینچک دور نشتگ ء ُ زگریں بلوچی ء َ بلدئیں ، اے کلر شاخ ء ِ برورد اَنت ۔
دگہ یک جاگہے ملیر انت ، ملیر ء ُ کلر شاخ ء ِ بلوچی سک وش ء ُ تامدار انت ۔ اے دوئیں جاگہاں مئے ٹک ء ُ کٹم نشتگ اَنت ، اُودے گیشیں مردم باہو دشتیاری ء ِ نندوک اَنت ۔ اُودے بلوچی داں روچ ء ِ مروچی ہما داب ء َ اِنت کہ مروچیگ ء َ چہ باز سال پیسر بیتگ ۔ اگاں چک ء ُ اوبادگانی ھُب ء ُ واھگ پہ وانگ ء ُ زانگ ء ِ نیمگ ءَ گیش بیت گڈا ما ہمدا چہ بلوچی وانگ ء ُ زانگ ء َ بنگیج کت کنیں ۔ ہمے کتاب مئے بنگیجی کتاب انت ، ما دیم ء َ جہد کنیں کہ انگت شرتریں کتاب دیم ء َ بیاریں ۔ بائد کہ کلر شاخ مئے وانگ ء ُ زانگ ء ِ بن جاہ بہ بیت ۔ سندھ ء ِ چپ ء ُ چاگرد ء َ لہتیں بلوچی میتگ داں روچ ء ِ مروچی است ء ُ برجم اَنت چوشکہ ٹنڈو آدم انت ، ٹنڈو الہ یار انت ، میر پور انت ، بائد کہ ما اے میتگ ء ُ ہلکانی بارو ء َ جہد بہ کنیں اودا بلوچی وانگ ء ُ زانگ بنگیج کنگ بہ بیت ۔ یک رندے من پدا گشاں کہ اے کتا ب منی نہ انت اے کتاب مئے شمے درستانی انت ۔ اے کتاب ء ِ تہا ہما شہد ء ُ شیرکنیں گپ مان انت کہ مئے پت ء ُ پیروکاں کتگ اَنت ، ہما زبان من ہمے کتاب ء ِ تہا کارمرز کتگ ۔ ما چونائی ء َ جہد بہ کنیں کہ ہما زبان ء َ ہر جاہ کار مرز بہ کنیں ۔ مروچی ما درآمدیں ملکے ءَ نشتگیں بلے مئے چک ء ُ اوبادگ انگت ہما زبان ء َ گپ ء ُ حال کن اَنت ۔ منی جند ء َ چل ء ُ ہپت سال انت ، من ہمودا ودی بیتگاں ، رستگ ء ُ مزن بیتگاں ، منی کسانی گوں ہمے جاہ ء َ بندوک انت ۔ کلر شاخ ء ِ ہمے زمین ء ُ ھاک ء َ گوں منی زند ء ِ یاد بندوک اَنت ، انچو کہ من کلر شاخ ء ِ یاداں کپاں گڈا من چوش آہنی تلک ء َ سرپاں ، اے واست ء َ کہ ہما ماہکانی شپ من ء َ یاد کاینت کہ ما لیب ء ُ گوازی کتگ ۔ آ زمانگ ء َ برق یا دگہ ساز ء ُ سامان نہ بیتگ اَنت ، ما پاد شپاد گل بیتگیں ، ہمے پُلکانی تہا ، اے پُلک گشے مئے واست ء َ مسک ء ُ سُرمگ بیتگ اَنت ۔ ما ہمے پُلکانی تہا رستگ ء ُ مزن بیتگیں ، مارا ہچ وڑیں سما نہ بیتگ ، نہ ما نادراہ بیتگیں ، نہ ما را دگہ چیزے بیتگ ۔ بلے وہدیکہ ماہکانی بیتگ ، چاردہی ماہکانی بیتگ گڈا ما سک گل بیتگیں ۔ اودا ما ورو ء ِ لیب کتگ ، کَپّگی کتگ ، دگہ بازیں بلوچی لیب ء ُ گوازی است انت کہ ما درستاں ھوار لیب ء ُ گوازی کتگ ۔ اے شپ پہ مئے واست ء َ عید بیتگ اَنت ، بلوچ ء ِ زندمان ہمے رنگ ء ُ داب ء َ بیتگ ۔ ما دگہ لیب ء ُ گوازی نہ زانتگ ، انوگیں زمانگ ء َ فٹبال ء ُ دگہ لیب ء ُ گوازی است اَنت بلے مئے گوں ایشاں ہچ وڑیں سیادی نہ بیتگ ۔ ما اے لیب ء ُ گوازی نہ زانتگ اَنت ، چیاکہ اے مئے ہند ء ُ دَمگی لیب نہ بیتگ اَنت ۔ مئے کر ء َ ورد بیتگ ، کَپّگی بیتگ ، جی بیتگ یا دگہ بازیں لیب ء ُ گوازی بیتگ اَنت ۔ ما ہمے لیب ء ُ گوازی کتگ اَنت ء ُ وتی وہد گوازینتگ ۔ بلے چوشکہ ماراہما وہد ء ُ دمان یاد کاینت ، مارا وتی کسانی یاد کیت انت ، ہما جاگہ ء َ کہ مردم رستگ ء ُ مزن بیتگ ، آ جاگہ ء ِ یاد ء ُ وشبو ، مدام مردم ءِ ہمراہ بنت ، مئے ہما کسانی ء ِ سنگت ، بازیں است اَنت ء ُ بازیں بیران بیتگ اَنت ۔ اگاں ما اودا بیائیں گڈا ما درستاں پجا کاریں ، مئے زند ء ِ یاد ء ُ مَڈی ہمیش اَنت ۔ ما آہانی چک ء ُ نماسگاں الم ء َ پجا کاریں ۔
مروچی مئے چکاں اے کتاب رستگ ، مئے چک گَل اَنت ، ہمے رنگ ء َ مروچی من اوں سک گل بیتگاں ۔ منی گل بوہگ ء َ چہ ہما وشی ء ِ ارس شلگ ء َ اَنت کہ من ہمینچک گل ء َ بال بیتگاں ۔ مئے نالگ ء ُ پریاداں مروچی کمو باز رنگ آءورتگ ، ما مدام ہما چیز ء ِ جہد کتگ ، آئی ء ِ برورد مارا شمارا درستاں الم رسیت ۔ من ء َ باز گپ ء ُ ھبر کنگی انت بلے گشے کہ من بازیں گپ نہ کتگ اَنت ، وہد ء َ موہ دات الم گوں شما ہمراہداری کناں ۔ مروچی من سک گل بیتاں کہ شما اے ڈولیں دیوانے اڑ داتگ ، امیت کناں کہ شما دائم ہمے رنگیں دیوان برجم دار ئے ۔
بلوچی میزران بات ء ُ بلوچستان سبز بات ۔
No comments:
Post a Comment