کمیونیسٹ پیداک انت

نبشتانک: عبدالحئی۔

بیست ءُ  یکمی کرن ءَ  بنی آدم ءِ  اجتماعی مھنت ءِ مُز ءَ  مروچی یک انچیں جاھے ءَ دنیا اُشتوک اِنت  کہ اِد ءَ آرٹیفیشل انٹیلیجینس ءُ روبوٹک ٹیکنالوجی ءَ  دنیا ءِ  تہ ءَ یک معجزاتی آشوبے آورتگ۔

ھمک پِڑ ءِ  تہ ءَ  انسان ءِ  دست مان اِنت  ءُ  ھمک چیز ءِ  سر ءَ انسان ءِ دَزرس ھست اِنت۔ سائنس ءُ  ٹیکنالوجی ءِ  بروّرد ءَ  مروچی میڈیکل سائنس ءُ روبوٹک ٹیکنالوجی ءَ  organ transplantation میڈیکل پِڑ ءِ  تہ ءَ جوانیں آشوبے آورتگ۔ بلے ما بچاریں کرونا  وبا ءِ  وھد ءَ اے سرجمیں سائنس ءُ  ٹیکنالوجی چو تولگ ءِ  وڑ ءَ گار اِت اَنت۔ گار اے واستہ نہ اِت اَنت کہ اے الاج ءَ  درگیپت نہ کنگ ءَ اِت اَنت  اے واستہ گار اِت اَنت کہ مارا چے ڈول چہ کرونا وبا ءِ  ویکسین ءِ  برانڈ  ءَ گیش ءَ چہ گیش زر برس اِیت۔

اے نِزام ءِ  چہ دُرستاں مستریں میار ھمیش اِنت کہ اے انسانیت ءِ  جاہ ءَ بس تھنا  یک لُٹ ءُ پُل کنوکیں سرمایہ دارے ءِ  مُپاداں چار ایت، اے نِزام ءِ  کار ھمیش اِنت کہ دراھیں سماج ءِ  دیمروئی ءِ  جاہ ءَ  یک مردمے  دولت ءِ  تہ ءَ  گیشی بیار ایت۔  ڈُکال ءِ  وھد ءَ  ایشی  زوراکی انگت گیشتر بیت ، وتی مھلوک ءِ  سر ءَ  ٹیکسانی دروشم ءَ  گران نھادی کنت، انچش کہ انوگیں دنیا ءِ  تہ ءَ  بوگ ءَ اِنت۔

بلے، ھما وھد  ءَ  کہ آپ چہ سر ءَ  گوز ایت گڑا مھلوک روڈانی سر ءَ درکیت ءُ دراھیں سماج ءَ  لرزین اِیت۔

بلے ما ھمے سرپد بَہ اِیں کہ ڈُکال ءِ  وَھد ءَ تھنا  کمیونزم ءِ  نزریات بنت کہ بنی آدم ءَ  آئی ءِ  آوکیں نسل  ءَ  یک وشیں بانداتے  پیش دار اَنت۔

مئے ترڈ ورلڈ تہ ءَ  یورپ یک جنّتے گندگ بیت ، یورپ  ءِ  تہ ءَ ھمے سالی سرمایہ داری  ءِ  بابت ءَ سروے ءَ  نوجوانانی  کرّ ءَ اے جست کنگ بَیت کہ شما سرمایہ دارانہ نزام ءَ  چون چار اِت۔

 چہ آیاں 73% درسد ءَ  گشت ”لالچ“ 70 %  ءَ  گشت ” کار، کار تھنا کار“ 69% درسد ءَ                 ”کرپشن“ 42% درسد ءَ  اے گشت”  ھکمرانانی   ءُ  امیرانی نزام اِنت ھما ایشی ءِ سیاسی ایجنڈا ءَ جوڑ کنوک اَنت۔ 

  چہ اے سروے ءَ تچک ءَ پدر اِنت کہ ورناہ کمیونزم نیم ءَ آھِگ ءَ  اَنت  ءُ ھمے ھاتری کمیونسٹاں ھم ھمایانی نیم ءَ  روگ لوٹ ایت۔

لھتے ملا زھنیں مردم کمیونسٹ نام ءِ اش کنگ ءَ  پد  سُھر سُھر  تر اَنت  کہ پلانی وتا کمیونسٹ بزاں کہ بے دین گشگ ءَ اِنت۔ پاکستان  ءُ  اوگانستان ءَ  امریکا ءِ  ڈالر جھاد ءِ  وھد ءَ  امریکی سامراج ءَ کمیونزم ءِ  نام  ءُ  نشان ھلاس کنگ ءِ  ھاترا کمیونسٹانی ھلاپ ءَ  ھمے پروپگنڈا کُت کہ کمیونسٹ ھمائی ءَ  گش اَنت ھما کہ بے دین ءِ  ءُ  بے مذھب اَنت۔ بلے آ اے گپ ءَ  پراموش اِت اَنت کہ کمیونسٹ پارٹی آپ ھندوستان  ءِ  اولی  جنرل سیکریٹری مؤلانا ھسرت موھانی بوتگ، مؤلانا عبیداللہ سندھی ھم یک کمیونسٹ  نزریا ءِ  منّوگرے بوتگ۔ روچ ءِ  مروچی پاکستان اسٹڈیز  ءُ  ریاستی میڈیا چینل کمیونسٹانی ھلاپ ءَ  ھمے وڑیں وتگڑیں ڈیپینیشن کارمرز کنت۔

چوناھا کمیونسٹ ھمایاں گش اَنت کہ آ یک بے تبکاتی سماجے ءِ  گپ ءَ  کن اَنت،  ءُ  پوریاگرانی رھشونی ءَ  یک سوشلسٹ انقلابے   ءُ  سرمایہ دارانہ نزام ءِ  ھلاسی ءَ  واستہ جھد کن اَنت، دنیا ءِ  ھرچ زلم ءِ   سبب ءَ   ھمے نزام ءِ  زر بزاں کہ لُٹ ءُ  پُل کنوکیں سرمایا دارانہ نزام ءَ  لیک اَنت۔

پلستین ءِ جبر ءَ  بگر داں بلوچستان ءَ  بیوکیں جبر ، ماھیگیر ءِ  ماھیگ ءِ ٹرالرانی دست ءَ   نسل کشی کنگ ءَ بگرداں پوریاگر ءِ  گلہ ءَ پچگرگ ءَ درستانی سبب ھمے سرمایہ دارانہ نزام اِنت۔

بلے اے لُٹ  ءُ  پُل پہ مدامی نہ بیت مارکس گش ایت پوریاگر مھلوک چہ وتی ھمروچیگیں  ھالاں دربارت سرمایہ دارانی لُٹ ءُ  پُل ءِ  ھلاپ ءَ  یکجاہ بیت ءُ زالمیں ھکمرانانی کلات ءِ  سر ءَ  کبزا کنت۔ بلے اے زرمبشت ءَ کمیونسٹ آشوبے ءِ نیم ءَ  برگ ءِ  ھاترا یک انچیں کمیونسٹ آشوبی پارٹی یے الّمی اِنت کہ آ لینن ءِ  ءُ  مارکس ءِ  لیکہانی سر ءَ  کار بند بہ بیت  ءُ  اے راجی آشوب ءَ  یک سوبمندیں کمیونسٹ آشوبے ءِ  نیمگ  ءَ  بہ بارت۔

سرمایہ داری کجا سر اِنت؟

سرمایہ دارانہ نزام شانزدَهُمی سدی  ءِ پیداک بوتگیں نزامے، پرانس ءِ 1789 انکلاب ءَ پد یورپ ءَ شنگ بوتگ، بلے سرمایہ دارانہ نزام دو سئے سد سال ءِ   تہ ءَ  دنیا ءَ  ھمنچو ترکی داتگ کہ چہ آئی ءَ  پیشیگیں نزام لکھانی کساس سال  ءَ ھمنچو دیمروئی  نداتگ۔ بلے ھمک تبکاتی نزام  ھمنچو جلدی دیمروئی  کنت آئی  ءِ  وھد ھم ھمنچو جلدی ھتم بیت۔ سرمایہ دارانہ نزام ءَ  جدید سرمایہ دارانہ قومی جھموری ریاست ءِ  بنیاد ھمے ھاتری ایر کتگ کہ آئی ءِ  وتی چیزانی بھا کنگ ءِ واستہ یک بازارے  لوٹگی بوتگ   ءُ  ھما جاہ ءَ  دگہ کسے وتی جوڑ کتگیں چیزاں بھا کُت مکنت۔ بلے ما چاریں بھاپ انجن ءِ  ءُ  مزنیں پیکٹریانی جوڑ کنگ ءَ  پد سرمایہ دار ءِ  چیزانی واستہ آئی ءِ  وتی جوڑ کتگیں بازار بزاں کہ قومی جھموری ریاست  نہ سرجم بنت  ءُ  آ  وتی کومی ریاست ءِ  سیمسراں چہ آ دست بازار شوھازگ ءَ بندات کنت ، اے ھمے وھد اِنت کہ دنیا جھان ءِ  ملک کالونائزڈ بزاں کبزا کنگ بنت، امریکہ درگیجگ بیت، اپریکہ  ءِ  ملکانی سر ءَ  کبزا کنگ بیت ،انگریز برسگیر کبزا کنت  ءُ  ھمے وڑ ھما سرمایہ داری  چہ یک  ملکے ءَ دراتکگ ءُ  پدا  یک کالونائیزرے جوڑ  بوتگ  ءُ  ھرچ جاگہ ءَ  کبزا کنگ  ءِ  ھاترا ارش کَنت  ءُ ھمے درگت ءَ  ما چاریں یک میان  استمانی جنگے کنگ بیت  ءُ دنیا ءِ بازار بھر کنگ بَہ ینت  بلے پدا دومی میان استمانی جنگ ءَ  پد امریکا ءِ شکل  ءَ سرمایہ داری یک سامراجے بیت ءُ زاھری کنت۔

جدلیاتی مادیت ءِ  پلسپہ ءِ  کانون ءِ  سر ءَ  مارکس ءَ  چہ مروچیگ ءَ دوسد سال ساری اے گپ جتگ کہ سرمایہ داری  ءِ  گڈی سورت یک سامراجے   ءُ  مروچی مارکس ءِ اے  گپ سد درسد راست بوتگ۔

ھمے پیم سامراج وتی مپادانی واستہ ھرچ ملک ءِ  تہ ءَ  وتی مورچہ جوڑ کنت بلکیں کدی سامراج وتی مپادانی رکینگ ءِ  ھاترا ملک جوڑ کنت انچوش کہ  پاکستان سویت یونین ءِ  پروش دئیگ ءِ  ھلاپ ءَ  جوڑ کنگ بوتگ  ءُ  اسرائیل مڈل ایسٹ ءِ تیل ءِ  وسائلانی  کنٹرول کنگ ءِ  ھاترا جوڑ کنگ بوتگ۔ 

پدا ھما سوال کیت کہ سرمایہ داری انو کجا سر اِنت؟ 

سرمایہ داری انو وتی دیمروئی ءِ  راہ ءِ  سر ءَ  وت اوشتانکے  جوڑ بوتگ ھرچ دیمروئی ءِ  سرمایہ داری  ءَ  کنگی بوتگ  آئی ءَ  کتگ نو بنی آدم ءِ  بنیادی زلورتاں کاروبار جوڑ کنگ ءَ اِنت، وانگ ءُ  زانگ کاروبارے جوڑ کنگ بوتگ ءُ بنی آدم ءَ یک  انسانے جوڑ کنگ ءِ جاہ ءَ یونیورسٹی زر کمائینگ ءِ  مشین اڈ کنگاں ، جان سلامتی ءِ  ادارگ کاروبار جوڑ بوتگاں کہ آ بنی آدم ءَ  چہ بیماریاں  رکینگ ءِ  جاہ ءَ گیشتر بیمار کنگ ءَ  اَنت کہ گیش ءَ چے گیش زر بہ گِر اَنت آپ کہ بنی آدم ءِ  زند اِنت  بازار ءَ  بھا بوگ ءَ اِنت۔ 

ھمے وڑ نُو اے سرمایہ دارانہ نزام انسان ءِ  زندگی ءَ   ءُ  آئی ءِ  باندات ءَ  پُلگ ءَ اِنت  ، پہ ھمے ھاترا نی بنی آدم ءِ  سر ءَ  اے پرز اِنت کہ آ چہ اے  انسان ءِ  ھڈاں  ھون چُسّوکیں سرمایہ دارانہ نزام ءَ  گوں یک انسان دوستیں کمیونسٹ نزامے ءَ مٹ بکنت۔

روس ءَ کمیونزم پرچہ ناکام بوتگ؟

بازیں مردم سوشلسٹ آشوب ءِ  نام ءَ  اش کنگ ءَ  پد اے سوال ءَ  الّم جست کنت ، شما کمیونسٹ آشوب ءِ  ھاترا جھد کنگ ءَ اِت بلے کمیونزم وَ روس ءَ بزاں کہ سوویت یونین ءَ   بے سوب بوتگ ۔

پدا اگاں  من آیانی کرّا یک جستے بکناں کہ سرمایہ داری کجام کجام ملک ءَ  ھست اِنت گڑا آیانی جواب الّم اے بَیت کہ  سرمایہ داری یک میان استمانی نزامے سرجمیں  دنیا ءَ  ساٹی اِنت، پدا منی جُست اے بَیت اگاں سرمایہ داری یک میان استمانی نزامے گڑا سوشلزم چون تھنا روس ءِ  تہ ءَ  سوبمند  بوت کنت؟

روس ءِ آشوب ءِ وھد ءَ لینن ءَ اے گپ جتگ  کہ اگاں جرمنی ءِ  آشوب ءِ  ھاترا مارا روس ءِ  آشوب ءِ  کربانی دئیگ کپیت ما ھِچ چک ءُ  پد نہ بَہ ایں۔ ھما وھد ءَ روس یک جاگیرادارانہ سماجے  بَیت  بلے جرمنی یک سرمایہ دارانہ سماجے بوتگ  ءُ  ھمودا ماڈرن پرولتاریہ بزاں کہ پوریاگر موجود بوتگ اَنت۔ یک سرمایہ دارانہ سماج ءِ  تہ ءَ  سوشلزم گیشتر سوبمند بیت  لیون ٹراٹسکی ءَ 1936 ءَ  ”آشوب ءَ  چے گَداری Revolution betrayed“ کتاب ءِ  تہ ءَ  نویس اِتگ کہ اگاں روس ءِ  انکلاب تھنا روس ءِ تہ ءَ  دارگ بوت گڑا دنیا ءِ  ھچ تاکت آئی ءَ  چہ پروش ءَ  داشت نکنت۔

گپ ءِ   متلب اش اِنت کہ روس ءِ  پرشگ ءِ  سبب اسٹالنسٹ بیوروکریسی ءِ  پالیسی بوتگ اَنت نئے کہ سوشلزم یا کمیونزم ءِ  بے سوبی بوتگ۔

ٹراٹسکی  ءُ  اسٹالنزم چی اَنت؟

روس ءِ آشوب ءِ رھشونی ءَ  ٹراٹسکی لینن ءِ  ھمراہ بوتگ آشوب ءَ  پد آئی ءَ  ریڈ آرمی ءِ  سروکی دئیگ بوتگ، ٹراٹسکی ازم

 The theory of permanent revolution

  ءَ  گشنت کہ آشوب یکیں ملکے ءِ    تہ ءَ  دارگ  مہ بیت ءُ یک ملکے  ءَ رند دومی ملکے ءَ  ءُ ھمے ڈول سبک سبک ءَ سرجمیں دنیا ءَ  آرگ بہ بیت، ھرچ جاہ ءَ  کہ آشوبی جاور بنت ھما جُنز کُمک کنگ بہ بیت  ءُ  یک کمیونسٹ آشوبے ءِ  تہ ءَ  سوبمند کنگ بہ بنت۔

پرمیننٹ ریولیوشن ءِ  ھاتر ءَ  یک کمیونسٹ  انٹرنیشنلے پارٹی یے  جوڑ دئیگ بہ بیت انچش کہ روس ءِ  آشوب ءَ  پد کامریڈ لینن ءَ  جوڑ کتگ ءُ  دراھیں جھان ءِ  کمیونسٹ یک پلیٹ پارمے ءِ  سر ءَ  یکجاہ کنگ بوتگ اَنت بلے لینن ءِ  مرگ ءَ  پد اسٹالن  گوں انگلستان  ءِ سدر چرچل ءَ  کول کنت ءُ لینن ءِ  جوڑ داتگیں کمیونسٹ  انٹرنیشنل  ءَ پروش اِیت۔ پدا چارمی کمیونسٹ انٹرنیشنل ءَ ٹراٹسکی  جوڑ کنت  ءُ  دنیا جھان ءِ  کمیونسٹانی ھاترا یک پلیٹ پارمے  اڑ دنت کہ آ لینن ءِ  بالشویک پارٹی ءِ  وڑیں پارٹی  دنیا ءِ  تہ ءَ  جوڑ بکنت ۔بلے بژن  کہ 1940ءَ ٹراٹسکی امریکہ ءَ  اسٹالن ءِ  ایجنٹے  ءِ  دست ءَ  میکسکو ءَ  کُشگ بیت۔ پدا کمیونسٹ انٹرنیشنل ءِ  بیرک کامریڈ ٹیڈ گرانٹ ءِ دست ءَ کیت  ءُ  مروچی ھمے ٹیڈ گرانٹ  ءِ  جوڑ کتگیں کمیونسٹ انٹرنیشنل چہ پنجاہ ءَ گیش ملکانی تہ ءَ

Revolutionary Communist International 

 ءِ نام سرا کارا اِنت، بازیں ملکاں RCI  ءِ 

 باسکاں وتی انکلابی کمیونسٹ پارٹیانی جار  جتگ. پاکستان  ءَ  ھم دسمبر ءَ

 RCP 

ءِ جار جَنگ بَیت۔

سرمایہ دارانہ نزام ءِ  ڈُکال دراھیں جھان ءَ  وتی اسراں یل دنت  ءُ  دنیا ءِ  جتا جتائیں دمگاں اے اسر زھرشانی ءِ دروشم ءَ  زاھر بنت، مروچی سرمایہ دارانہ نزام ءِ  ڈکال یورپ ءُ  امریکا ءِ  ملکانی تہ  ءَ  اسرائیل ءِ  ھلاپ ءَ  ءُ پلستین ءِ  یکجھتی ءِ  زھرشانیانی دروشم ءَ زاھر بوھگ ءَ  اَنت ، تناوھدی امریکا ءِ   چہ 150  ءَ  گیش  یونیورسٹیانی  نودربراں نندانک داتگ  ءُ  وتی ملکانی ھکمرانانی ھلاپ اھتجاج کنگ ءَ اَنت۔

ھمے ھاتری سرمایہ دارانہ نزام ءِ  ڈُکال ءِ  تہ ءَ  یک راجی جنزے ھچ وڑ یک ملکے ءِ  تہ ءَ  اوشتات نکنت پلستین  ءِ  یکجھتی ءِ  زھرشانی مئے کرّا یک سبوتے ، ھمے واستہ یک کمیونسٹ انٹرنیشنل اے وھد  ءَ سک الّمی اِنت کہ آ اے جُنزاں ھما وھد ءَ  سرجمیں دنیا ءَ  سر کُت بکنت۔

اسٹالن ءَ  ھم روسی آشوب ءِ ھمراھی کتگ بلے نزریاتی کمزوریانی سبب ءَ  اسٹالن روس ءِ  انکلاب ءَ یکیں ملکے تہ ءَ دارگ لوٹگی بوتگ ءُ  وتگڑیں 

Socialism in one country  نزریا

  وڑیں نزریا یے  دنت کہ آئی  ءَ گوں مارکسزم  ءُ   لیننزم ءَ  ھچ سیادی نیست۔

اسٹالن لینن ءِ  ھمراہ بوتگ بلے اسٹالن  نزریاتی یے نہ بوتگ ھمے واستہ لینن ءِ مرگ ءَ  پد آئی ءِ   نزریا ءِ  جاہ ءَ  اسٹالن  ءَ  سرجمیں روس ءِ تہ  ءَ لینن ءِ  پُوٹُو جنائینتگ  ءُ  روسی انکلاب  ءِ ناکامی ءِ  مزنیں سبب اسٹالن ءِ  نزریاتی کمزوری بوتگ، کہ آئی ءَ  لینن ءِ  نزریا ءِ  جاہ ءَ  لینن ءِ  اکس ءُ  لینن ءِ شَکسیت سرجمیں  جاھاں  ءَ  شنگ کُتگ

کمیونزم چون کیت؟

اے دور ءِ  تہ ءَ  ما نشتگیں اے  مھلوک ءِ  زرمبشت بزاں کہ عوامی انکلابانی دور اِنت سرجمیں سماج یک کیادت ءِ  ھاترا سر پاد جَنَگ ءَ اِنت کہ یک رھشونے  بیت ءُ  مارا چہ اے جنجالاں  آجو بکنت۔

بلے ما ھمے سرپد بہ اِیں کہ رھشون چہ آزمان ءَ نیا اَنت ءُ نئے کہ مارا رھشون آزاد کن اَنت، اے جُنزاں ھما نزریا دیم  ءَ  برت کنت کہ آ چہ تمامیں زاتی، کومی، مذھبی ، نسلی  ءُ  پرکہ ءِ  تعسباں  پھک بہ بیت  ءُ  پدا اے وڑیں نزریا مروچی تھنا مارکس ءِ  نزریا اِنت کہ آ دنیا ءِ  مزلوماں یکمشت کنگ لوٹیت ، کارل مارکس ءِ  گوانک ھم ھمے بیتگ ”دنیا جھان ءِ  پوریاگراں یکمشت بہ بئیت شمے کرّا یلدئیگ  ءِ  واستہ تھنا زمزیل اَنت بلے ھاسل کنگ ءَ دراھیں جھانے “   ما ھمے سرپد بہ ایں  کہ اے وھد ءَ  مئے کرّا تھنا مارکس ءِ  نزریا ھست   کہ  آ تمامیں مزلوماں یک تبکاتی نزریا یے ءِ  پشت ءَ  یکمشت کنت  ءُ  یک کمیونسٹ  انکلابی پارٹی یے جوڑ کنگ ءِ   نیم ءَ  بہ بارت انچیں  پارٹی یے کہ روس  بالشویک پارٹی بوتگ۔

ھمے وڑیں پارٹی انو دنیا ءِ  جتا جتائیں ملکاں اڈ دئیگ بوگ  ءَ  اَنت کہ باندا ھمے عوامی زرمبشتاں یک پلیٹ پارم ءِ  دئے اَنت ءُ  یک کامیابیں کمیونسٹ انکلابے  بکناں۔

کمیونسٹ انکلاب ءَ  پد  چہ درستاں پیسر  تمامیں سرمایہ دارانی دولت پچگرگ  ءُ  عوام ءِ  آسراتیانی سر ءَ  کارمرز کنگ بیت، کومانی سر ءَ  جبر ،کَبزا ءُ  آیانی وسائلانی لُٹ پُل ھتم کنگ بیت، جنین آدم ءَ  یک انسان ءِ  درجہ دیگ بیت پدرشاہانہ نزام ھلاس کنگ بیت، تمامیں مھلوک ءِ  واستہ تعلیم، جان سلامتی ءِ  آسرات، ٹرانسپورٹ لئین، آپ،  ءُ  دگے بنیادی آسرات مپت دئیگ بنت  ءُ  اشانی سر ءَ  کاروبار کنگ ءِ  سر ءَ  پابندی جَنَگ بیت ، دراھیں مردماں روزگار دیگ بیت ، چہ درستاں  مستریں گپ امیر ءِ  گریب ءِ  پرک ھلاس کنگ بیت۔