واسلین

واسلین 

نبشتہ کار ۔۔۔۔۔۔۔ شاہ جان شوھاز

مروچی انچیں سردی یے آتکگ ڈنّ ءَ دراھگ نہ بیت ۔

سمرین کُوکار کنان اِنت ۔۔اماں ءُ اما ۔۔ منی دست ءُ پاد تْرک اِتگ اَنت ءُ منی دیم ھُشک اِنت ءُ من ءَ کارجاہ ءَ ھم روگی اِنت ۔۔ 

منی چُک پاد ءُ دست منی ھم تْرک اِتگ اَنت بلے من وَ ھچ کُت نہ کن آں ۔ مات ءَ پسو دات ۔۔۔ 

واسلین ھست اِنت تئی گْور ءَ ؟ سمرین ءَ گْوشت ۔۔

من نہ زان آں تو لوگ ءِ کباٹ ءِ سرا بچار بلکین بہ بیت ! مات ءَ درائینت ۔۔ 

اے وَ ھالیگیں ڈبی یے ایشی ءَ ھرام بات تُشے ھم مان نیست ، سمرین ءَ گوں تْرندیں توار ءَ گْوشت ۔۔۔ 

گُڑا ھمیش اِنت من دوشی وتی دست ءُ پاد چَرپ کُتگ اَنت بلکیں ھَل اِتگ ، مات ءَ پسو دات ۔۔۔ 

اما ، گُوھر کُج اِنت؟ اگاں ھمد ءَ اِنت گُڑا منی گْور ءَ راہ ئِے دے ؟  سمرین ءَ گْوشت ۔۔۔

گُوھر تنینگہ پاد نیتکگ چہ واب ءَ ۔ مات ءَ پسو دات ۔۔ 

گُوھر ءُ گُوھر ۔۔ پاد ءَ جھندم بو نیم روچ ءَ تو واب ئے ، پاد ءَ گَرک بو شَرتر ءَ ، سمرین ءَ پہ زھر گْوشت ۔۔ 

چے کن ئے من ءَ واب ءَ نیل ئے ، بِل من وَپس آں  ، گُوھر ءَ گْوشت ۔۔ 

 من ترا گْوش آں پاد ءَ جھندم بو کہ من ءَ کارے ھست پہ تو ، سمرین ءَ پد ءَ گوں زھر گْوشت ۔۔۔ 

ھاں بہ گْوش چے کارے ؟؟ گُوھر 

تو واسلین ءِ ڑبوک ءَ بِزیر ءُ بُرو مھرول ءِ گْور ءَ بہ گْوش واسلین بدئے سمرین ءَ گْوشتگ ۔۔ 

واسلین ءَ چون کن ئے سر دَرد ؟؟ گُوھر 

منی دست ءُ پاداں بچار ، انچو تْرک اِتگ اَنت بلاھیں کُونڈ جوڑ اِنت بالٹینے آپ دار اَنت ۔۔ سمرین ءَ گوں ژندیں توارے ءَ گْوشت ۔۔۔ 

گُوھر دیم پہ مھرول ءِ لوگ ءِ نیمگ ءَ رَپت ۔۔ 

گُوھر ءَ کُوکار کنان ءَ گْوشت ، مھرول ، او مھرول ۔۔۔ 

مھرول ءَ گوں زھریں تَبے ءَ گْوشت ۔ ھاں چے یے تو مارا واب ءَ نیل ئے ؟؟؟

اے نُکسیں سمرین گْوش اِیت ، کمو واسلین بدئے ۔۔ 

اے سمرین سک شوک کنت ، بہ گْوش پہ واسلین ءِ جَنگ ءَ تو ھچبر اسپیت نہ بئے ۔۔ مھرول گوں تژن ءَ گْوشت ۔۔۔۔ 

سمرین ءَ دیر بُوّگ ءَ اَت کہ آ را کار جاہ ءَ ھم روگی اَت ۔۔۔ 

گُوھر واتر آتک سمرین ءَ واسلین ئے دات اَنت ۔۔  

سمرین ءَ زُوت زُوت ءَ واسلین وتی دست ءُ پاداں چرپ کُت اَنت ءُ دیم پہ کارجاہ ءَ شُت ۔۔ سمرین دلتَرک اَت کہ کارجاہ ءِ مستر باریں چے گْوش اِیت ۔۔۔ 

وھدے سمرین کارجاہ ءَ سر بوت ، اد ءَ دگہ بازیں جنین آدم ھم کار کنگ ءَ اَت ۔۔ 

کارجاہ ءِ مستر ءَ دیست کہ سمرین پیداک اِنت بلے پَشت کپتگ ۔۔ 

گُُڑا جست کُت ئے کہ سمرین تو چیا مرچی پَشت کپتگ ئے  ؟؟

انچو سمرین ءِ دپ ءَ درآتک کہ واسلین نہ بوتگ ۔۔ سمرین ءِ ھمکاراں ٹھک دات ءُ کند اِت ۔۔۔ 

سمرین بژنیگ بوت کہ من واسلین ءِ نام چیا گپت ۔۔۔۔