زاناں پنجگور ءِ ءُ پاکستان ءِ مانا یک؟
گدان ٹی وی ءِ مراگش تران ءِ نوکیں بھرے ءَ شمس الدین شمس ءُ اھوالکار رفیق چاکر ءِ تران ءَ پد مردم جیڑ ایت تا انچو سما بیت کہ پنجگور ءُ پاکستان ءِ جاور کمو وت مہ وت سک نزیکی ءُ سیادی کن انت۔ پاکستان ءِ جرنیل ءُ مزنیں واکدار، دینی سروک ءُ سیاستدانانی لاپ وتی ملک انت بلے آیانی ترجیحات ءُ وشی ڈن ءَ انت۔
سرجمیں زند ءَ وتی وشیانی وھد ءَ ڈن ءَ گوازین انت۔ چُکانی وانگ ءَ بگر داں جائیداد ءُ زند ڈن ءَ گوزیت بس مِرگ ءَ ءُ کَل بوھگ ءَ پاکستان ءَ کاینت۔ بزاں آیانی نزیک ءَ پاکستان ایوک کبرستانے۔۔۔۔۔
ھمے وڑ ءَ بلوچستان ءِ بیوروکریسی ءُ مزنیں عھدگانی سر ءَ پنجگور ءِ مردم باز بوتگ انت ءُ انگت ھم ھست انت بلے ھما وھد ءَ دانکہ نزور انت پنجگور ءَ انت بلے ھردیں شریں پوسٹے گپت گڑا شال، کراچی یا مرچی باندہ گوادر یا ڈن ءَ بنت۔ سرجمیں لوگ ءُ فیملی ءَ گوں ڈن ءَ بنت۔ پدا دانکہ مرگ ءَ پد پنجگور ءَ بس کَل بوھگ ءَ کاینت۔
اشانی وشی ءُ زند ڈن ءَ گوزیت۔ چُک ءُ اولاد ڈن ءَ وان انت پدا سیٹ ءُ اسکالرشپانی واستہ اشانی مکابلہ گوں پدمنتگیں اسکول پروم، تسپ یا ھیسائی ءِ یک سرکاری اسکولے ءَ ونتگ ایں یک گریب ءُ بزگریں پنجگوری ءَ بیت۔ پدا ڈن ءَ ونتگیں اپر کلاس پنجگوری سیٹ ءُ اسکالرشپ ءَ گپت ءُ وانگ ءَ پد پدا ڈن ءَ بیت۔ ادا پنجگور ءِ بزگر ءُ اپر کلاس پنجگوری ءِ میان ءَ انچیں پرکے ودی بوتگ کہ ھما واکدار ءُ بیوروکریسی کہ پنجگور ءِ زمہ وار انت۔ آئی ءِ کرّ ءَ پنجگور و ایوک یک کبرستانے کہ کل بوھگ ءَ روت پمشکہ اگاں پدمنتگ بیت، ڈُنگ ءُ دُزانی دست ءَ بیت یا کشت ءُ کوش بیت بلے بیت ءُ گریب ءُ لس بلوچ دانکہ وسے روت ھمود ءَ بیت اگاں ناں ھر وڑ کنت کہ در بئیت۔
نی ادا دگہ وَ چیزے بیت یا نہ بیت بلے چُش ھما دُزیں سیاستدان ءُ نماھندگ یا واکدار ءُ ٹیکھدارئیگ ءَ کہ آئی ءَ بھ وش نہ بیت کہ ایمنی بہ بیت، گریب ءُ بزگ ءِ پرک ھلاس بہ بیت۔ چیاکہ پدا آئی ءَ کس جُست نہ کنت ھمے وڑ ءَ پنجگور ءِ افیسر ءُ بیوروکریٹ یا واکدار ھر کجا بہ روت بلے آئی ءَ پہ پجگور ءَ نہ بیت گڑا پہ دگر چون بیت۔۔۔۔۔۔
دعا انت پنجگور چو پنجگور ءِ سیریں ءُ بیوروکریسی ءِ وڑ ءَ آباد بات۔
No comments:
Post a Comment