زِرءِ ڈُنگی

زِرءِ ڈُنگی

 سجاد اسد

24 مارچ

 2021

 ءَ 

netflix ءَ یک نوکیں ڈاکومینٹری دْروشمیں تامرے Seaspiracy ءِ نام ءَ شنگ کنگ بوتگ. Seaspiracy بزاں زرءِ ڈُنگی ءِ نام ءَ شنگ بیتگیں اے ڑاکیومینٹری تامر ہمے سرحال ءِ سرا شنگ بوتگیں تامرانی  تہا اولی شُمار کنگ بیت. اے تامر ءِ تہا زری زِند ءِ جنجال جْوانیں وڈیے ءَ پیش دارگ بیتگ اَنت. بیا اِت ہمے پیشداشتگیں جنجالانی سرا لہتیں گپ جنَیں. 

اولی جنجال

2048

 ءَ زِر ءِ ماھیگ ہلاس بنت. 

تامر ءِ تہا پیشدارگ بوتگ کہ اگاں ہمے رپتار ءَ زر ءِ ماھیگ گِرَگ ءُ کُشگ بہِ بنت گڑا 2048 ءَ زِر چہ ماھیگ ءَ ھالیگ بیت۔ اے وَ راستیں ھبرے کہ مرچی سک اِشتاپی ءُ زُوتاں زُوت مزن مزنیں لانچ ءُ ٹرالر ماھیگاں گرِگ ءَ اَنت ءُ آہانی نسل کُشی بزاں کہ پْدریچ ءَ کُشگ ءُ ھلاس کنگ ءَ اَنت. 

زانگ بہِ بیت کہ 2048 ءَ ماھیگانی ہلاس بوُھگ ءِ گپ 2006 ءَ ماں یک انگریزی روتاکے ءَ دیم ءَ آتکگ بلئے مرچی اے گپ مننگ نہ بیت ءُ وھدے ما روچ پہ روچ ہمے جنجالاں گوں دیمپان بئیں گُڈاں ما مارایں کہ چنکس ما دور گار کُتگ.

 

دومی جنجال

 زر ءِ تہ ءِ کپتگیں  50 درسد گَند ءُ پلاسٹک ماھیگ گروکیں دام ءُ جال اَنت 

تامر ءِ ردءَ گْوشگ بیت کہ زر ءِ گَند ءُ گسڈ کنگ ءَ مزنیں دست ئےِ ھمے ماھیگ گروکیں مزنیں لانچ ءُ ٹرالرانی اِنت. اے وَ زاہری ایں گپے کہ اے ٹرالر وتی کْوہنیں ءُ ھرابیں پلاسٹک ءِ داماں زر ءَ دور دَئینت ءُ اے پلاسٹک پدا  زری ساہداراں تاوان دئینت. 

سہمی جنجال

دریاوردانی بزگی

 یک سکیں درد بکشائیں جنجالے کہ اے تامر ءِ تہا پیشدارگ بیت آ دریاوردانی بزگی اِنت ۔ پیشدارگ بیت کہ گریب ءُ بزگریں دریاورداناں رَد دئیگ بیت کہ زرءَ بیا اِت گوں شُمارا  شریں زَرءُ مال دئیگ بیت ، آؤدءَ پہ شُما نِندگ ءُ وپسگ ءِ آسراتی ہم جوڑ کنگ بیتگ،  کار پہ وھد بیت بزاں روچے ہشت کلاک کار ءُ پدا آرام ،وھد وھد ءِ سرا شمارءَ موکل دئیگ بیت بلئے وھدے کہ گریبیں دریاورد رَونت گوں گڈا آہاناں ناں شِہم ءَ وابءَ کِل اَنت ءُ نہ پہ وھد ورگ اِش دئینت. انچیں وھداں دو دو روچ ءَ پہ شُد ءِ لاپ کار کن اَنت ءُ بزگ بنت۔ سالانی سرا ھم لوگ ءِ روَگءَ  نیلنت۔ لٹ ءُ کُٹ ئےِ ھم کنَنت.

زِری ڈُنگی ءَ چہ اِنسان چے در بہ بارت؟

اے تامُر ءَ چہ پَد بائد اِنت کہ ما اِنسان سوچ ءُ پِگر بکنیں، پمیشکہ کہ مئے نزیک ءَ ھُوں نیل بومیں زِرے چول جَنت کہ انگت مئے دِلانی تاھیر بکشگ ءَ ابید ورگ ءَ پہ ماھیگ دَنت ءُ ما وتی زِندگی ءِ گُزر بسر ءَ کن ایں، اگاں ما انسان وتی کارپداں گوں زِرءَ زَوال کن ایں داں مئے جندءِ واستہ زوال ءَ ابید ھچ پشت نہ کپ ایت. اے زِر مارا یک یک ءَ وران کنت. اِنسان بائید اِنت ماھیگاناں زوال مہ کنت ءُ آھانی نسل ءِ ھپازت ءَ بکنت. زِرءَ گَند مکنیں ءُ آئی ءِ جْلواہ ءَ مُدام بَرجاہ بداریں. گُڈی ءَ مارا اے سرپد بوھگی اِنت کہ زِر ابید چہ لاچاری ءَ دِگہ ھِچ ئےِ نئے، اِنسان لاپ ءِ شوھاز ءَ بزگی ءُ سکیاں ھوار منزل ئےِ رَندگیری ءَ کنگ ءَ اِنت. پمیشکہ اے نیام ءَ آ ھِچ نہ گندایت، اگاں گندایت گُڈاں آئیءِ واھشتانی منزل اِنت. اے راہ ءِ میان ءَ ھرچیز بئیت آئی ءِ واستہ ھچ ھژدری نہ اِنت پمیشکہ ماھیگاں ھلاس کنت، نسل کشی ءَ کنت،زرءَ گوں گَند ءُ گسڑاں زوال کنت.