Bathi- Ragam-Baloch

بتّی

نبشتکار: رگام بلوچ

آئی ءِ نام بانڑی اَت ۔۔۔۔۔ تھنّا بانڑی ۔۔۔۔۔ مردُماں آ چہ بانڑی ءَ پجّا آؤرت ۔۔۔۔ کس ءَ آئی ءِ نام ءِ دیم ءَ آئی ءِ پِت ءِ نام نہ جت ۔۔۔۔ کس ءَ آ چہ مات ءِ نام ءَ نہ زانت ۔۔۔۔۔ آ تھنّا بانڑی اَت ۔

آ شیشگ چمے اَت ۔۔۔۔۔ آ بازار ءَ سک نامدار اَت ۔۔۔۔ بلئے هِچ شائر ءَ پہ آئی ءِ چمّاں شئر نہ بست ۔۔۔۔۔ چیا کہ مردُماں آئی ءِ شیشگیں چمّانی تہ ءَ زیبائی ءَ چہ گیش یاگی بوھگ ءِ نیّت دیستگ اَت ۔۔۔۔ آٹیگ دیستگ اَت ۔

آئی ءَ زانتگ اَت کہ مردُم آئی ءَ بد گُشگ ءَ اَنت ۔۔۔ آئی ءَ زانتگ اَت کہ مُلّا آئی ءِ سرا پتوا هم دات کناں ۔۔۔۔ آئی ءَ زانتگ اَت کہ بازار ءِ جنین وتی جِنکیں چکّانی کِرّا آئی ءَ بد گُشنت، یلاچر گُشنت ۔۔۔۔ بلے انگت آ وتی گچین کُتگیں راہ ءِ سرا اوشتاتگ اَت ۔۔۔۔ آ بھ دلپروش نہ بوت ۔۔۔۔ بہ گندے برے برے بوت بلے زاھرے بھ نہ کُت ۔۔۔۔ آ اے اوں زانگ ءَ اَت کہ دِھکّان مولُک ءَ آ اناگہ ءَ کہ دگ ءِ سرا دیست گُڑا یکدمان ءَ وتی نُماسگے بڑّا کُت ءُ چیا شُت ۔۔۔۔۔ آ زانگ ءَ اَت کہ بازار ءِ مردُم آئی ءَ زاه ءُ بد کنگ ءَ اَنت ۔

" اجبیں زالے ۔۔۔۔ ھرروچ جنگل ءُ کوهان اِنت ۔۔۔۔ برے شھر، برے میتگ، برے اِدا، برے آؤدا "‍ 

بلے بانڑی اَت کہ اوشتگ ئے نہ زانت ۔۔۔۔ اِدا سر جن، آؤدا سر جن ۔۔۔۔ باریں چے چیزّ ءِ دردے دل ءَ اَت کہ ایمن نہ بوت ءُ نہ نِشت ۔۔۔۔ پدا اینچو شِگان، تژن، ملام ۔۔۔۔ درُستے یک کِر کُتاں ءُ وتی گپ ءِ سرا مُهکم اَت ۔

بہ گندے شیرزالے اَت ۔۔۔۔ بہ گندے نہ تُرس یے اَت ۔۔۔۔۔ بے ریائے الّم ءَ هست اَت ۔۔۔۔ ھروھد دیم پہ دیم گُشتے ۔۔۔۔ تچک ءَ تچک گُشتے ۔

پمیشکا آئی ءَ اے هم زانتگ اَت کہ آؤکیں وھد پہ آئی ءَ سک گِران بیت ۔۔۔۔ آ سک ناگیگ کنگ بیت ۔۔۔۔ بلے آ اَت کہ انگت ءَ روَگ ءَ اَت ۔۔۔۔ دیم پہ گُشگ ءَ اَت ۔۔۔۔ تچک ءَ تچک گُشگ ءَ اَت ۔

آئی ءَ دُگنیا ءِ بارا ءَ سرپدی باز هست اَت ۔۔۔۔ کتاب وَ آئی ءِ دست ءِ منگلیک ءِ هساب ءَ اِتاں ۔۔۔۔ برے یک کتابے گون اَتے ۔۔۔۔۔ بہ گندے آئی ءَ اے ھم زانتگ اَت کہ آؤکیں وھد ءَ آئی ءِ همپِکریں سنگت چہ آئی ءَ جُتا کنگ بنت ۔۔۔۔۔ الّم آئی ءَ اے هم زانتگ اَت کہ دوستیگیں مردُمانی گِسر کپگ سک نِزور کنت ۔۔۔۔ تاوان دنت ۔۔۔۔ بلے آ اَت کہ کہ انگت روگ ءَ اَت ۔۔۔ دیم پہ گُشگ ءَ اَت ۔۔۔۔ تچک ءَ تچک گُشگ ءَ اَت ۔

بازار ماندارگ بوھگ ءَ اِتاں ۔۔۔۔۔ مردُم گار کنگ بوهگ ءَ اِتاں ۔۔۔۔ تُرس مردُمانی مجگ ءَ جاه کنان اَت ۔۔۔۔ گریوگ ءُ زاری آں تیوگیں بازار انگِر کُتگ اِتاں ۔۔۔۔۔ ھرکس تُرسگ ءَ اَت، لھتے مسیت ءَ، لهتے مُسلّا ءِ سرا ۔۔۔۔ بلے بازار ءِ مزنیں کوٹ ءِ کش ءِ اولی لوگ ءِ بتّی داں شپ ءِ دیراں روک اِتاں ۔۔۔۔ شیشگ چمّیں بانڑی نبِشتہ کنگ ءَ اَت، وتی زند ءِ کِسّہ آں، وتی جُھد ءَ گوں بندوکیں مارِشتاں، وتی بازار ءِ گماں ۔۔۔۔ سنگتانی جُتائی ءَ! 

مردُم گُژنگ اِتاں ۔۔۔۔۔ بے وانندگ اتاں ۔۔۔۔ آیانی دست ءِ نان پچ گِرگ بوهگ ءَ اِتاں ۔۔۔۔ بھا بوھگ ءَ اِتاں ۔

آ دگہ جنیناں وتی زندگی ءِ مکسد وتی مردینانی هِدمت کُتگ اَت ۔۔۔۔ بلے آئی ءَ وتی زندگی ءِ مکسد تیوگیں بازار ءِ هِدمت کُتگ اَت ۔۔۔۔ تیوگیں بازار ءِ گم آئی ءَ وتی کوپگاں کُتگ اِتاں ۔۔۔۔۔ پہ ھمایاں پاس جنگ ءَ اَت ۔۔۔۔ شپانی نِسپاں وهدے بازار سیاه تراتگ اَت، کندیل آنی وٹ کُشگ بوهگ ءَ اِتاں ۔۔۔۔۔ بلے بازار ءِ مزنیں کوٹ ءِ کش ءِ اولی لوگ ءِ بتّی روک اَت ۔ شیشگ چمّیں بانڑی نبِشتہ کنگ ءَ اَت 

ایردستی ءَ

گِسر کپگ ءِ اهداں 

درتہ پُچی ءَ

تهنّائی ءَ 

ابیتکی ءَ

پہ آئی ءَ اے بلائیں سپرے اَت ۔۔۔۔ جنگل ءُ گیابانی سپر، کوه ءُ ریکانی سپر ۔۔۔۔ بلے آ اَت کہ روَگ ءَ اَت ۔۔۔۔ دیم پہ دیم گُشگ ءَ اَت ۔۔۔۔ تچک ءَ تچک گُشگ ءَ اَت ۔

مرچی بیست سال اِنت کہ مردُم سرپد اَنت کہ آ اسلا کے اَت ۔۔۔۔ مردم مرچی سرپد اَنت کہ وھدے تیوگیں بازار واب اَت بلے آئی ءِ کوٹی ءِ بتّی پرچا روک بوتگ اَنت ۔۔۔۔ مرچی مردُم زانت اَنت کہ آ پرچا بھ پہ ایمنی نہ نِشتگ ۔۔۔۔ مرچی مردُم آئی ءِ نام ءَ وتی چُکّاں پر کن اَنت ۔۔۔۔۔ مرچی بازار ءِ بلُک وتی نُماسگانی کِرّا آئی ءِ کِسّہ کار اَنت ۔۔۔۔ آئی ءِ نہ تُرسی ءِ کِسّہ، آئی ءِ سِنچ ءِ کِسّہ ۔۔۔۔آئی ءِ مُهکِمی ءُ تهنّائی ءِ کِسہ ۔

مرچاں آئی ءِ بازار ءِ درئیں لوگانی بتّی داں شپ ءِ دیراں روک اَنت ۔۔۔۔۔۔ بلے ۔۔۔۔۔ ھما مزنیں کوٹ ءِ کش ءِ اولی لوگ ءِ بتّی مُرتگ اَنت ۔۔۔۔ شیشگ چمّیں بانڑی نبِشتہ کنگ ءَ نہ اِنت ۔۔۔۔ناں بازار ءِ گماں ۔۔۔۔۔ ناں جُتائی ءِ گِرانیں ساهتاں ءُ نہکہ مھلوک ءِ ایردستی ءَ  ءُ ناں دِرتہ پُچّی ءُ گژن ءَ ۔

مرچاں آئی ءِ جاگہ ھما مزنیں کوٹ ءِ کش ءِ کبرستان ءَ اِنت ۔۔۔۔آئی ءِ کبر ءِ شنک ءِ سرا " بانڑی" نبشتہ اِنت ۔۔۔۔۔ ھؤ بانڑی ۔۔۔۔۔ ناں پت ءِ نام ۔۔۔۔۔ نہکہ مات ءِ ۔۔۔۔۔۔ بس بانڑی!