یکے اَت کریمہ، ھزار بوتگ آں

یکے اَت کریمہ، ھزار بوتگ آں

نبشتکار: جاوید بلوچ

"تو پہ سرانی گُڈّگ ءَ زند ءِ ھئیالان ءَ کُش ئے؟!

پہ سِندگ ءَ داشت کن ئے پُلّ ءَ چہ بوتالانی ءَ!!

مرگ ءَ منی لوٹئے ، تہ ارواہ ءَ بہ کُش

کوش ءَ منی باڑائے ، مھر ءِ واھگاں پاھو بدئے

بیگواھی ءَ زھرے بکن رُژن ءَ منیگ ءَ ایرجیگ

زانت ءَ بکن تیر ءِ نشان

من پہ مِرَگ گار نہ باں

مھراں کہ آوار نہ باں"

اتا ءِ اے شئر ءَ آ روچی بلوچستان ءِ تْیاب دپی دگ ءِ سْیاھی، ھنگول ءِ کوہ، بلوچ زِر ءِ چول ءُ ویرانگاں اوشتوکیں بلوچانی وداریگیں چم پہ جاک الھان کنگ ءَ اِتاں وھدے چہ کراچی بالی پٹ ءَ شھید بانُک کریمہ بلوچ ءِ میّت چیروکائی بیم ءُ تُرسناکیں جاوراں، دُزوکائی دیم پہ تُمپ ءَ بَرَگ بئیگ ءَ اَت۔ ریاستی بیمکاریں مائنڈسِٹ وتی منّاں تُرس شِنگ کنگ ءَ اَت بلے راجدپتر ءَ ھمے نویسگ بوت کہ وَت چون چہ یک بلوچ زالبولے ءِ بے ساہ ایں میّت ءَ چہ تُرسگ ءَ اِنت۔

کریمہ بلوچ ءِ گُڈی دیدار، کَل ءُ کسارت کنگ ءِ وھد ءَ کیچ ءَ سرجم ءَ کرفیو ءِ جاور اَت۔ ءُ ریاستی زوراکی ءُ توپک والا مائنڈسِٹ ءِ لیکہ ھمیش اَت کہ دُزوکائی شھید ءِ کَل کنگ ءَ چہ یک روچی جاورے کہ گار بی ءُ کسہ ھلاس بی بلے مرچی بلوچستان ءِ ھمک شھر ءُ کوچگاں ھزاراں کریمہ پیداگ بوتگ۔ مرچی بلوچ ءِ راجدپتر ءَ ایوک سْیاسی پِڑ ءَ بلوچ زالبول گون نہ اَنت بلکیں جنگی پِڑ ءَ آیاں وتی بھر ھوار کُتگ۔ مرچی شال ءَ بگر داں گْوادر ءِ پدی زِر شھدگ ءَ ھزاراں کریمہ ڈن ءَ دراتکگ آں۔ کریمہ چہ وتی شھیدی ءَ پیسر سرداری، پدرشاھی نظام، ریاستی زوراکی ءِ دیم ءَ ایوک یک نودربر گَلے ءِ باسک اَت بلے مرچی کریمہ یک راجی راھشونے، مرچی شھید بانُک ایوک بلوچ زِر ءَ گِر داں نیمروز، کوہ سلیمان داں بندر عباس ءَ جاھمنندیں بلوچانی "لمہِ وتن" ءِ ھمراھی ءَ اے دھر ءَ جھانی زالبولانی گھگیری ءِ یک درپشناکیں درورے۔

بلوچ گوْستانک ءِ تہ ءَ رابعہ خضداری، بانڑی، مھناز ءَ بگر داں شھید بانُک کریمہ ءَ بازیں زالبولیں کارست ھست انت کہ آیاں وت ءَ ابدمان کُتگ۔ بلے چُشیں درور بہ گِند ئے جھانی راجدپتر کم گِندگ بہ بیت کہ زند ءَ پَد آیانی میّت ھم گھگیری ءِ درور بہ بنت، چُشکہ بانُک کریمہ بوت۔ بانُک ءِ زند، جھد ءُ کار وَ بے مَٹ اَنت بلے بانُک ءِ میّت ھم اے کرن ءِ مزاحمت ءِ مستریں دروراں چی یکے جوڑ بوت۔ 

اے ھمے کرن اِنت ءُ ھمے دھر اِنت کہ جھان ءِ دگہ خطہ ءُ جاگہ یانی زالبول وتی زالبول بوھگ ءِ ھک ءَ لوٹگ ءَ اَنت، فیمینزم ءِ تحریک ھست اَنت، زالبول چاگرد ءِ تہ ءَ وتی پجار ءُ انسانی بروبری ءِ منّارینگ ءِ لوٹ ءَ کنگ ءَ اَنت بلے بلوچ ءِ چاگرد ءَ بلوچ ءِ زالبول، اے پدر شاھی زوراکی ءَ، پدمنتگی ءُ بزگی ءَ، شُد گُژن ءُ دگہ ھر وڑیں آسراتیاں چہ زبھری ءَ ابید ھم وتی مردینانی آجوھی ءِ جُنز ءَ دیم ءَ اِنت۔ مرچی بلوچ زالبول یک راجی جھدے ءَ گوں بندوک اِنت، اے زانت، شعور ءُ منظم بوھگ ءِ نام کریمہ اِنت۔

بلوچستان ءِ تہ ءَ ووٹ ءِ سْیاست ءِ پِڑ ءَ ھم سردار ءُ ٹیکھدار وتی پارٹیانی زالبولیں باسکاں ایوک مخصوصیں نشستانی پُر کنگ ءِ ھاتر ءَ ھما وھد ءَ دیم کار انت کہ آیاں ھمے خانہ پُری کنگ بہ بیت، اد ءَ ھم سردار ءُ سْیاسی ٹیکھدار یا وتی جند ئے لوگ ءِ زالبولاں مخصوص نشستانی سر ءَ سینئٹر، ایم پی اے ءُ ایم این اے کن انت یا دگہ زردارانی کر ءَ اشاں بھا کن اَنت بلے بانُک کریمہ وتی گَل ءِ ھما گرانیں وھداں سرکماش جوڑ بیت کہ بی ایس او ءِ سر ءَ بندش جَنَگ بیت ءُ یک یک ءَ بی ایس او ءِ ورناہ گار ءُ بیگواہ کنگ بنت۔ ھمے گرانیں جاوراں بانُک سُھریں بیرک ءَ بُرز ءَ کنت، کوچگ کوچگاں، شال ءُ کراچی ءَ بلوچ راجی جُست ءَ جھان ءِ دیم ءَ ایر کنت۔ بانُک 2016 ءَ بی بی سی ءِ 100 نامداریں زالبولانی لڑ ءَ ھوار کنگ بیت۔ 

بانک دراں ڈیھی زِند ءَ بلوچ ءِ راجی جُست ءَ جھانی فورمانی دیم ءَ ایر کنگ ءَ بیت کہ 20 دسمبر 2020 ءَ بانُک ءِ بیگواھی ءِ ھال کئیت ءُ دومی روچ ءَ بانُک ءِ شھیدی ءِ ھال۔ زوراکیں منصوبہ ساز ھمے پھم اَنت کہ کریمہ یک بلوچ زالبولے اَت، بیران بوت پمشکہ آ بانُک ءِ میّت ءَ یک ماہ یے ءَ پد چہ کراچی بالی پَٹ ءَ دُزوکائی دیم پہ تُمْپ ءَ بَر انت۔ بیم ءُ تُرس ءِ جاورانی تہ ءَ شھید کَل کنگ بیت بلے مرچی گْوادر ءِ پدی زِر ءِ شھدگ ءَ ایوک یک روانکے ءَ ھزاراں کریمہ ءِ پِگر ءَ گوں سریچیں بلوچ جَنِک دَرا بیت، گوں ھمے بشارت ءَ کہ یکے اَت کریمہ نی ھزار بوتگ آں۔