مئے پِگری رُدوم پرچا اوشتاتگ؟
۔۔۔۔ وہاب مجید ۔۔۔۔۔
لہتے روچ ساری من کراچیءَ اِت آں۔ یک روچے من کتابے ءِ شوہاز ءَ اُردو بازار ءَ شُت آں۔ ویلکم بُک کتابانی دُکان ءَ من وتی کُہنیں سنگتے ءَ گوں دُچار کپت آں۔ سنگت ایجوکیشن ڈیپارٹمنٹ ءِ مزنیں افسرے۔ کوہٹہ ءَ پوسٹ اِنت۔ ما کساس چار سال ءَ پد یک دومی ءَ گوں ڈیکّ وارتگ اَت۔ آئی ءَ نیک راہی سرھال ءِ دو کتاب دستءَ ات۔ من ءَ منی کتاب دست نہ کپت۔ منی سنگت ءَ ریگل چوک ءِ ھوٹلے ءَ داشتگ اَت۔ سُبارگ ءِ ٹیمب اَت گُڑا ما ہمراہ بیت اِیں ءُ کیفے اسٹوڈنٹس ءَ شُت اِیں۔
نان ءِ سرا ایجوکیشن ءُ اسکولی جھیڑہانی سرا گپ ءُ تران ءَ پد واجہ ءَ مُلکی سیاست ءُ چاگرد ءِ ھرابیانی سرا ہم وتی دُریںّ ھیال درشان کُت اَنت۔ اے اولی رند اَت کہ وانگ ءُ زانگی جھیڑہانی سرا گپ ءَ ابید مرچی من واجہ ءِ دُریں ھیالاں مُلکی سیاست، چاگردی اڈ ءُ جنجال ءُ نیک راہی سرھالانی سرا ہم اِشکنگ ءَ اِت آں۔
واجہ ءِ گُشگ اَت کہ مئے چاگرد ءِ جھیڑہانی مستریں سبب چہ نیک راہی ءَ دوری اِنت۔ واجہ ءِ ھیال اَت کہ مئے پدمنتگی ءِ دگہ یک مزنیں سببے جنین آدمانی یونیورسٹیاں وانینگ ءُ پدا مردین آدمانی ھواری ءَ یکیں کارگس ءَ کار کنگ اِنت۔ واجہ ءِ گُشگ اَت کہ مئے چاگرد ءِ لبرل ءُ سیکولریں کلاس امریکہ ءُ یہودیانی گُشگ ءِ سرا مئے چاگرد ءَ ٹرانس جینڈر، جنین آدم ءُ اقلیتانی ھکّانی پلہ مرزی کنگءَ اِنت۔ دیمترا دراھینت ئے کہ اے ہمے ڈنّی روبرکتی یہودی قوت اَنت کہ مارا زُبان، دود ءُ ربیدگ ءُ علاقہانی تہ ءَ بہرے کُتگ۔ مارا یک زُبان، یک دُود ءُ یک دینے ءِ منوگر بیگی اِنت۔ اے اولی رند اَت کہ من سنگت ءِ اے وڑیں ریڈیکلیں ھیالاں اِشکنگ ءَ اِت آں۔
من واجہ ءِ گپاں گوں تپاک نہ کُت. من " کاونٹر نیریٹیو" دات کہ مئے سیاسی، مالی ءُ چاگردی جھیڑہانی بُنیادی سبب ریاستی پالیسی ءُ وھد ءِ ھاکمانی زُلم ءُ زیادتی اَنت۔ ھیر مئے بحث ءُ تران دراج کش بیت۔ آخر ءَ ناں آئی ءَ منی گپانی سرا تپاک کُت ءُ نا کہ من آئی ءِ۔
اے ایوک منی سنگت ءِ ھیال ءُ لیکہ نہ انت۔ مئے چاگرد ءِ بازیں وانندہانی پگر ہمیش اِنت۔ اے ڈوگما، غیر عقلی، غیر ساہنسی، سطحی ءُ یک رنگی پگر مئے دماگاں کے ءَ داتگ اَنت؟ مے وانگجاہ ءِ کورس ءِ کتاب ءُ مین اسٹریم میڈیاءَ۔ ءُ ہر دوہیں ھاکمانی کنٹرول ءَ اَنت۔ ءُ دگہ لہتے سیاسی نیک راہی راھشوناں ہم آس ءِ سرا تیل پِریتکگ۔ راجدپتر شاہد اِنت کہ ہمے راھشوناں وتی زاتی نپ ءُ سیت ءَ پہ مُدام وھد ءِ ھاکم ءُ بادشاہ سلامت ءِ ہمراہ داری ءُ تعریف ءُ توسیپ کُتگ۔ ایشاں لس مھلوک تُرسینتگ کہ اگاں آیاں نیک ءُ صالحیں ھاکمانی ھلاپ ءَ گپ جت گُڑا وت ءَ دوزہ ءِ آسءَ چہ رکینت نہ کن اَنت.
راستیں اِش اِنت کہ سوشل ساہنس ءِ کورس ءِ کتاب، میڈیا ءُ ھاکماں مئے ہمے وڑا "زہین سازی" ءُ پِگر کنٹرول کُتگ کہ بقولِ اُردو والہانیگ ءَ ما "شاہ دولہ ءِ مُشک" جوڑ بیتگ اِیں ءُ مئے پِگری رُدوم چہ اسکول ءُ کالج ءِ زمانگ ءَ چہ کنٹرول ءُ اوشت ءِ آماچ کنگ بیتگ۔ مئے ھیال ءَ راجدپتر، سیاست، نیک راہی ءُ چاگرد ءِ بابت ءَ ہرچی کہ ما کورس ءِ کتاباں ونتگ ہمے راست اَنت۔ دُنیا ہمیش اِنت۔
راست اَنت کہ پِگری ھساب ءَ ما چات ءِ پُگل ایں۔
مئے وت گڑیں مُلکی ءُ قومی دانشورانی یک مزنیں نادُراھی یے اِش اِنت کہ ہپتاد ءُ پنچ سال اِنت آ اِد ءِ نِندوکیں بازیں قوم ءُ نیک راہی فرقہانی مردماں زور یک قومے جوڑ کنگ ءِ نام ءَ یک زبان، یک دین ءُ یک کلچرے ءِ منوگر جوڑ کنگ لوٹنت۔ اے "ڈاہیورسٹی"ءَ نہ من اَنت۔ سرکاری دانشور وتی زاتی نپ ءُ سیت ءِ ھاترا مرچی ہم اے گپ ءَ سرپد بیگ ءِ کوشش نہ کنت کہ اے ہمے یک رنگی پگر ءَ بنگالی جتا کُت اَنت۔
دُنیا ءِ ایندگہ راجاں 1948 ءَ اے گپ دربُرتگ ءُ انسانی ھکّانی منگّ نامہ ءِ سرا دستخط کُتگ ءُ داتگ کہ انسان آزات پیداک بیتگ۔ زبان، رنگ، دود، نیک راہی ءُ جینڈر ءِ نامءَ آہی ءَ کمتر سرپد بیگ، پرک ءُ پیر کنگ ءُ گُلام دارگ جُرمے قرار دیگ بیتگ۔ انسانی ھکّانی منوگریں ریاستاں وتی شہریاں اے انسانی، آہینی ءُ قانونی ھکّ داتگ اَنت کہ آ وتی وتی زباناں گپ بجن اَنت، وتی مزہبی پریکٹیس ءَ بکن اَنت یا اگاں کسے کنگ نہ لوٹیت آ مہ کنت۔ اے آھانی زاتی معاملہ اَنت۔ ریاست ءَ گوں آھانی نیک راہی کاراں دست داوا نیست۔ ریاست ءِ کار وتی دُراھیں شہریاں چہ ٹیکس گِرگ ءُ پدا ہمے ٹیکساں آیانی سرا کار مرز کنگ ءُ آیاں یک وشھالیں زندے ءِ واہند کنگ اِنت۔
اے راست اِنت کہ مئے بازیں وانندہیں مردمانی ریڈیکلیں پِگر ءِ سبب وانگجاہانی کتاب، میڈیا ءُ ھاکم ءُ سرکاری دانشورانی پروپگنڈا ءُ زہین سازی اِنت۔ بلے چُش پرچا بیت کہ ہمے کالج، یونیورسٹی ءُ ہمے روایتی چاگرد ءِ تہ ءَ لہتے رُژنا پگری ءِ منوگر ہم پیداک بنت؟ پرچا لہتے مردم وتی گوست ءِ ونتگ ءُ دربُرتگیناں ببا دنت؟ آھاں "اَن لرن" کنت؟ ءُ نوکیں پِگرے ءِ واہند ءُ منوگر بیت؟ ایشی ءِ سبب ہما انسان ءِ نوکیں ماحول اِنت کہ آہی ءَ رسیت۔ نوکیں کتاب اَنت کہ آ وانیت ئے۔ آ وتی دماگ ءَ جُست ءُ شکّ پیداک کنت پمشکا آ گیشتر وانیت۔ ریشنل بیت۔ آہیڈیاہاں چکاّسیت۔ ڈوگما ءُ سِتکّءَ یلہ کنت۔
مہے نیم قباہلی چاگرد ءَ وانگ ءُ زانگ، جُست ءُ ھاسکر سیاسی ءُ نیک راہی بحث ءُ تران چہ بُنگیج ءَ گُٹ گیر کنگ بیتگ اَنت۔ تو مرچی ہم مُلک ءِ کُجام ہم چاہ واری ھوٹلے ءَ برو۔ اے گپ زرور دیوال ءَ نبشتگ " سیاسی اور مزہبی گفتگو سے پرہیز کریں" اے مئے اسل ھاکمانی پہ وتی مھلوک ءَ ہپتاد ءُ پنچ سالی زہین سازی ءِ آسر اِنت کہ لس مھلوک چہ سیاست ءَ نپرت کنت۔ سیاست ءُ سیاسی راھشوناں نپرت کنگ ءَ گوں اسل ھاکمانی ھاکمی گوں جوانی ءَ کسّ ءَ چیلنج نہ کُتگ ءُ داں روچے مروچی آھانی واجہی برقرار اِنت.
مئے مُلک ءَ تو شاعری بکن، آزمانک ءُ گِدار بہ نویس، ڈرامہ ءُ ساز ءُ زیمل بکن ترا کسّ ہچ نہ گُشیت. بس شرت ہمیش اِنت کہ تئی شاعری ءُ ڈرامہ غیر سیاسی بہ بنت۔ سیاسی ادب ءُ سیاست کنگ اے مُلک ءَ دُژمانے جوڑ بیتگ۔
دانکے مئے وانندہیں کلاس اسکول ءُ کالجی کتاباں چہ ابید سیاسی، ادبی ءُ چاگردی سرھالانی سرا ریشنلیں کتاب نہ وان اِیت، وت ماں وتی مجلساں عقلی بحث ءُ تران ءُ جُست ءِ کلچرے ودی نہ کنت، وتی کُہنیں پِگر ءِ ھلاپیں زانتکاراں گوں نہ نِندیت، آھاں گوں شرّیں وڈے ءَ بحث ءُ تران نہ کنت ءُ نوکیں ھیال در نہ بارت تنا وھدی مئے چاگرد ءِ پِگری رُنگ راھاں چہ دراھگ باز مُشکل اِنت۔
No comments:
Post a Comment