جھنڈی ءِ پشت کپتگیں دود
نبشتہ کار: جی ایم بلوچ
ھر یک چاگردی ءِ ، راجے ءِ وتی دود ءُ ربیدگ بنت۔ دنیا ءِ ماں ھر کنڈ ءَ بچاراں ھما جاہ ءِ جا منندیں مردمانی وتی دود ءُ ربیدگ انت۔
ھمے رنگ ءَ چیزے انچیں دود است انت کہ آ تہنا بس تیاب دپی دمگاں برجم دارگ بنت ءُ آ دگہ اچ جاگہ ءَ مارا گندگ ءَ نیا انت . انچش کہ 'جھنڈی' ءِ رسم کہ ائید ءِ وھد ءَ تْیاب دپی دمگاں مارا گندگ ءَ کئیت . اے دود چہ کرناں برجم دارگ بیتگ بلئے اے رسم سجھیں جاہاں ھلاس بیتگ اگاں چیزوکے میتگاں است اِنت گڈا اے متیگاں اشی ءَ وتی رنگ مٹ کتگ آ وڈ نہ انت کہ پیسرا بیتگ بلئے گنز ءَ اے دود انگت ھما وڈ است انت ءُ ھما وڈا برجم دارگ بیگ ءَ انت.
جھنڈی چی یے ءُ چون برجم دارگ بیت؟....
وھدے شھبان ءِ ماہ بیت گونڈل رواں جنگل ءَ دار ءُ ڈنگر کاراں یک جاہ یے مچ کناں پدا رمضان بیت گڑا رمضان ءِ 27 بگر داں 29 ءَ ، دو دار لک کن انت یکی ءَ دَور کہ جال ءَ انت ءُ دومی دارا پلمن گشں اَنت کہ برزا اِنت۔
چک رواں لوگ پہ لوگ ءَ سریگ پچ گراں پدا ھمے داراں گوں ساد بنداں ءُ پدا ساداں سریگ درنجداں کہ اشیا گشاں 'جھنڈی' (اکس ءَ بچار ات) ھمے رسم داں 29 ءَ برجم دارگ بیت بلئے اے سریگ ھر روچ سہب ءَ لوگ پہ لوگ ءَ پچ گرگ بنت ءُ بیگاہ ایر گیجگ ءُ لوگاں سر کنگ بنت۔
پدا وھدے ائید ءِ شپ بیت چُک(گونڈل) یک جاہیے مچ بنت تیل ءُ ٹائر کار انت ( اے ٹائر سجھیں سال ءَ یک جاہ کتگ انت اِش ءُ تیل ھمے سئیں روچاں پچ گپتگ انت ئے کہ جھنڈی لِک بیتگ انت) اے سجھیں شپ ءَ اے ٹائراں ماندار انت داں بانگواہ بہ بیت وھدے ملا بانگ دنت گونڈل رواں یک جاہ کُتگ ایں دار ءُ ڈنگراں ماندار انت اشاں ماندارگ ءَ پد درست رواں تْیاب ءَ جان شود انت ھمدا اے رسم ھلاس کنگ بیت ءُ ھر یکے رؤت وتی لوگا ائید ءِ نماز ءِ تیاری ءَ کنت۔
No comments:
Post a Comment