وان گوگ، نبشتہ کار: ھاشم عثمان

نبشتہ کار; ھاشم عثمان ؔ

چہ نکش کشی کنگ ءَ  پیسر نادرْاھی  ءُ تہنائی ءِ آماچیں  ازمکار  ءَ وھد ے 1881  ءَ  نکش کشی کنگ بُنگیج کُت گڑا بے مثالیں کار اتاں کہ درچک  ءُ دار ، مردمانی سُرپُر ، آزمان  ءُ زمین ، گوات  ءُ جمبر ، جنین  ءُ مردین  ءُ شپ  ءُ روچ   ءُ ھمے رنگ ءَ نکش ے کتگ اِتاں کہ گُشے ھمے درْچک  ءُ دار گوں رنگاں ساہ دار انت  ءُ ھُدا ءِ جوڑ کتگیں ابرم را ازم ءِ تہا آؤرتگ ے ءُ وتی ھکّ ے ادا کتگ ۔ 

ازمکار ونسنٹ ولیم وان گوگ 30 مارچ 1853 ءَ  ودی بوتگ کہ یک پد باتن درانگاز ( Impressionist ) ایں ازمکار ے بوتگ۔ وشتریں گپ اش انت کہ وان گوگ  ءَ سال 1881  ءَ  پیسر بزانکہ چہ نکش کشی کنگ  ءَ  پیسر ایندگہ ازمکارانی کارمند بوتگ بزانکہ وان گوگ ءَ یک مزنیں مدّت ے آرٹ ڈیلر ے ءِ پجّار کار کُتگ پہ ھمے ھاترا آئی  ءَ  وتی زند  ءَ بازیں جاہ ے سپر ھم کتگ۔ بلے ھمے سال  ءَ  رَند ایوک داہ سال ءِ  تہا دو ھزار یک سَد ( 2100) نکش کشی ے جوڑ کتگ  ءُ  ھمے کارانی تہا ھشت سَد ءُ شَست (860) نکش کشی آئل میڈیم  ءَ جوڑ ے کتگ انت  ءُ ھا دگہ میڈیم  ءَ انت۔ کارانی تہا سیلف پورٹریٹ ، مردمانی سُرپُر ءُ ندارگاں گوں ڈالیں رنگاں  ءُ آزمان ے انچو جوڑ کتگ کہ گُشئے کسمانی رُژن ے رنگانی تہا ھوار انت۔ وان گوگ باز بااثریں ازمکار ے کہ آئی  ءِ  کاراں انچیں اثر ے دؤر داتگ کہ جدید ازمی دنیا  ءَ مروچی آئی پد گیری بوگ انت۔

وان گوگ ءِ  اولی عشق چو عشقِ لاحاصل ءَ گوْست کہ آ وھد ءَ وان گوگ ءَ  بیست  ءُ  یک سال اَت گوں ارسلہ ءَ کہ نوزدہ سال ءِ شر رنگیں جینک ے اَت ،  عشق ے بوت  ءُ  چیز ے سالاں چہ پد ارسلہ ھوں چہ آئی ءَ سِست۔ کاروبار ءِ پڑ ءَ ھم ونسنٹ وان گوگ سکّیں بد بھت ے اَت  ءُ  مردماں گنوک، سُست جان ءُ ناکامیں مردم ے لیک اِت۔ پہ ھمے ھاترا پگری ءُ تب ءِ اڑ ءُ جنجال بزانکہ ڈپریشن ءُ گریبی ءَ سک بیوار کتگ اَت کہ آئی ءِ نمدیانی تہا پدّر انت کہ پہ وتی کستریں برْات تھیو وان گوگ کہ یک آرٹ ڈیلر ے بوتگ، نبشتگ انت ے ( تھیو وان گوگ  ءَ  ونسنٹ وان گوگ باز دوست بوتگ وھد ے کہ آ بیران بوتگ گُڑا تھیو ھم نفسیاتی ناراھیانی آماچ بوتگ  ءُ شَش ماہ  ءَ  رند بیران  بوتگ) بلے انگت وتی جُہد ے برجاہ داشت ، ھمے وھد  ءَ  پال گوگوئن  ءِ  پجّیگ  ءَ  یکیں کارجاہ  ءَ ھوار اِت انت گڑا یک ویل ے مدام وان گوگ ءِ سر ءَ  شِرّ اَت کہ بے ھوش ءُ بے سار بوتگ چہ ھمے بے ھوشی ءُ بے ساری ءَ آئی ءَ گوں چاکو  ءَ  وتی چپی ( left ) گوش سِست، وتی گوش ءِ سِندگ ءَ گوں پال گوگوئن ھم  سِست  ءُ جُتا بوت بزانکہ دلگران بوت  ءُ یک بر ے پدا وان گوگ تہنا بوت یک نمدی  ءِ تہا وان گوگ نبشتہ کنت  ھمے نمدی کہ پہ تھیو  ءَ نبشتگ انت ے گشیت من اناگہ بے سار باں  ءُ ھوش کہ منا کئیت منی دپ رنگاں گہیتگ انت۔ اے ھال ءِ تہا وان گوگ پدا گیش تہنائیانی آماچ بوت۔ انچوشکہ من گشتگ اَت وان گوگ ءِ کار بے مثال بوتگ انت ءُ اشانی تہا چیز ے کارانی سرھال چوش انت ۔

, روچ پول Sun Flower, وتی جند  ءِ نکش انت self Portrait, استالیں شپ Starry Night, اوتاک The Bedroom, بادام ءِ درچک ءِ کشار Blossom Almond tree, تود ءِ درچک The Mulberry tree , گُل (یک داب ے  ءِ گردیں پولانی باگ ے )  Irises, شپ ءِ کیفے The Night Cafe  ءُ  گندم  ءِ  ڈگار  ءُ گُراگ The Wheatfield with crows گوں اے نکش کشیاں ھوار ھما نا سرجمیں کار ھم امسٹرڈم  ءِ شہرستان  ءَ وان میوزم  ءَ داں مرچی پہ نمائش ایر انت  ءُ  چیز ے بہا بیتگ بلے وان گوگ  ءَ  وتی دہ سال  ءِ نکش کشی ءِ سپر  ءَ ایوک وتی یک پینٹنگ ے وت بہا کتگ ءُ مروچی آئی مرگ ءَ  پد دنیا  ءِ  چہ درساں گیش نہاد  ءَ باہ بوتگیں نکش کشیانی لڑ ءَ وان گوگ ءِ نکش کشی ھم ھوار انت۔

وان گوگ ءَ مزنیں وھد ے سینیٹ ریمی ءِ بیمارجاہ ءَ نادرْاھی ءَ  گوازینتگ، چہ بیمارجاہ ءَ در آیگ ءَ پد ہومیوپیتھک ڈاکٹر پال گیجٹ ءَ ھم دوا ءُ دارگ کتگ بلے ڈپریشن  ءُ  تہنائی ءَ نہ مرّینت ءُ 27 جولائی 1890 آورز ءِ Auvers  نزیک ءَ دیہات ے  ءَ درچکانی  تہا ھمے ڈگار  ءَ وھد ے نکش کشی The Wheathfield with crows  بزانکہ گندم  ءِ ڈگار  ءُ گُراگ کہ آئی ءِ گُڈی نکش کشی انت پینٹ کنگ ءَ پیسر اجبتیں تب ے بوتگ  ءُ  نبشتگ ے " من چہ اؤدا واتر کنگ ءَ رند، پدا کار ءَ اِتاں۔ ماراِت برش چہ منی دست  ءَ  کپت۔۔۔بلے گَم  ءُ تہنائی  ءِ درنگازی کنگ   ءَ منا ھچ پرواہ ءُ زور نہ بوت ۔"  ءُ نکش کشی ءِ  پینٹ کنگ ءَ  رند وتی دل ءَ چہ جہل تِیر ے جت ے ءُ  وت کُشی ے کُت کہ اے وھد ءَ اُمر ے ایوک سی ءُ ھپت 37 سال اَت۔ 

"I would rather die of passion than of boredom"

(Vincet Van Gogh)