اے چاپ ءُ چیچلو پہ کئے ءَ

 چمشانک

:::جمیل مھراب

گدار:  "اے چاپ ءُ چیچلو پہ کئے ءَ "

ندکار: منیر احمد بادینی

بنی آدم وتی چماں پچ کنت اگاں نز کنت، کسہ ءُ کارست آئی ءِ برے چمدیست ءُ برے مارشتی دنیا ءَ سر کش انت۔ پد ءَ ھمک نبشتہ کار ھمے کسہ ءُ سرھالاں وتی دوستگیں تھرے ءَ نبیس ایت انچو کہ منیر بادینی ءَ وتی گچین کتگیں تھر گدار کتگ ءُ آئی ءَ تنیگا 130 گدار نبشتہ کتگ ما امیت داریں آ انگت گیشتر نبیس ایت۔ اگاں باند ءَ روچ بلوچے کہ لبزانک ءِ وانگ ءَ در کپیت ءُ گدارانی نیمگ ءَ چک جنت گڑا اود ءَ منیر بادینی ءِ سازیتگیں موسماں الم دوچار کپ ایت۔

گدار "اے چاپ ءُ چیچلو پہ کئے ءَ" 137 تاکدیم انت آئی ءِ نہاد 200 انت آ 2016 ءَ فہد پبلشنگ  کمپنی آرچر روڈ کوئٹہ ءَ ،چہ پبلیش بیتگ۔

گدار گیشتر وتکلامی تکنیک ءَ انت آئی ءِ بنکی کارست "من" انت کہ آئی ءِ نام (مراد) انت ۔ مراد ءِ زند راجکاری ءِ تہ ءَ گوستگ ءُ آ سرداری گَلانی ھلاپ انت آ گوں کدرت جان ءَ،  ءُ مڈل کلاس مردماں ھوار یک گَلے جوڑ کن انت۔

بلے آیانی ھمے پارٹی ءِ تہ ءَ اوں بازیں جیڑہ سر کَش انت ءُ آ تپاکی ءَ وتی کاراں کت نہ کن انت، بلکیں مستریں آیانی پروش آیانی یکے ءِ دومئیگ ءِ سر ءَ بے بیسہی بیت۔

گاجیان یک کار ءُ باری مردمے، مراد لوٹ ایت کہ آ گاجیان ءَ ھمے واستا دیم ءَ بیاریت کہ آئی ءِ لوگبانک رحیمہ ءَ گوں نزیکی شرتر کت بہ کنت۔

مراد کہ ھر وھد ءَ کراچی ءَ پہ کارے ءَ روت گڑا آ گاجیان ءِ لوگ ءَ داریت بلے آ چہ راجکاری کاراں گیشتر گوں رحیمہ ءِ دیدار ءَ ھدوناک انت۔

"کراچی ءَ من یوک ءَ پہ رحیمہ ءِ ھاتر ءَ نشتگ اتاں ءُ تاں یک ھپتگ ئے پہ رحیمہ ءِ دیدار ءَ نشتگ اتاں کہ اے دراھیں ھپتگ منی چم ءُ نیکہ دل چہ رحیمہ ءِ دیدار ءَ سیرآپ بوت، بلکن ءَ منی ایناری ءُ تھنی گری چہ ساری ءَ گیشتر بوت"

(تاکدیم 55)

 آئی ءِ وتی لوگبانک ماھجان ھچ دوست نہ بیت۔ بازیں سالاں رحیمہ ءِ مھرانی بندوکیں مراد وتی مھر ءِ ھبر ءَ گوں رحیمہ ءَ کت نہ کنت بلے وھدے آ رحیمہ ءِ کر ءَ وتی مھر ءِ ھبر ءَ کنت گڑا رحیمہ اوں ھمے ودار ءَ بیتگ کہ کدی مراد گومن وتی مھرانکی ءَ درشان بہ کنت۔

مراد ءُ رحیمہ ءِ مھرانکی واکیات گدار ءِ تہ ءَ باز زیبا انت۔

"من دیست کہ آئی ءِ لنٹ لڑان بوت انت ءُ آئی ءِ چم ھمار بوت انت ءُ آئی ءِ بدن ءِ بو گوں آئی ءِ پچانی بو ءَ ھنی ءُ عطر ءُ زبادانی بو ءِ تہ ءَ ھوار سوار من ءَ الاھوش کرت ءُ نوں من وتی لنٹان آئی ءِ لنٹانی سر ءَ ایر کرت ءُ آ وتی ھر دوئیں دستاں یلہ دات چشکہ نوں آ چٹاں چٹ منی بوتگ ات ءُ من آئی ءِ !"

(تاکدیم 52)

 بلے ندکار دیمتر ءَ رحیمہ ءِ کارست ءَ چیرترین ات ءُ واکیاتاں گیشتر راجکاری ءِ سُر ءُ پرانی نیمگ ءَ بارت۔ بلے گدار ءِ تہ ءَ انچو اوں گمان بیت کہ ھمے راجکاری جیڑہ اوں باز جاہ ءَ انچو گونڈ زرتگ انت کہ وانوک آ سرپدی ءَ لوٹ ایت آئی ءَ نرسیت۔  بلے گدار ءِ نزآرگی ءِ تہ ءَ اوں زیبائی ءُ تاھیر وانوک ءَ رسیت۔

گڈسر ءِ مراد لوٹ ایت کہ آ کریمداد  ءَ وتی پارٹی ءَ در بکنت۔ آ اے ھبر ءَ گوں کدرت جان ءَ کنت، بلے کریمداد مراد ءُ رحیمہ ءِ ھبراں سرپد انت  ءُ آ مراد ءَ گشیت اگاں تو من ءَ چہ پارٹی ءَ در کت، گڑا من تئ رازاں روتاکاں دیاں، گڑا مراد لاچار بیت ءُ کریمداد ءِ درکنگ ءِ جاگہ ءَ وتی راجکاری کاراں دزکش بیت۔

گدار ءِ گالردانی تہ  ءَ باز جاہ ءَ زیبائی اوں ھست باز جاہ ءَ تکرار اوں گندگ بیت۔ گدار ءِ نبشتہ ءِ رھبند وانگ وَ بیت بلے نوک وانوکے ءَ الم وانگ ءَ گران گمان بیت۔ پہ جوانیں ساچشتکاری ءَ منیر بادینی ءِ درور نیست بلے وتی ساچشتانی پلگارگ ءُ آیانی زبان ءُ بیان  ءِ تہ ءَ زیبائی آرگ  ءَ آ وھد نہ دنت، ھمے واستا آئی ءِ گدارانی وانگ ءَ بازیں جوانی گندگ ءَ رند اوں لھتے نزوری سھرا بیت۔

******