حب لبزانکی میڑہ

 حب لبزانکی میڑہ

مہراج گلام

حبءَ ماں 7 فروری یک شمبےءِ روچءَ یک لبزانکی مراگشے برجم دارگ بوت کہ آئیءِ سروکی حب لٹریری فورمءَ کُت۔ مراگشءِ تہا چہ دور دورءَ علم دوست ءُ دگے بازیں لس مھلوکے اتک بہر زُرت۔ مراگشءِ بےبہائیں مھمان بانُک جماعتی بلوچ اَت، بانُکءَ مراگشءِ بندات بئیگ ئے پِت بُرّ اِت ءُ مراگش بندات بوت۔ مراگشءِ تہا جُتا جُتائیں سرھالانی سرا گُپءُ تران کنگ بوت۔ اولی بہرءَ Role of Student in Societal and Educational Development سرا غنی بلوچ، ایڈوکیٹ عمران بلوچ، ایڈوکیٹ شاہ زیب ءُ آھانی ہمراہداری کنگئے واستہ موڈیریٹرءِ دروشمءَ وقاص عالم انگاریہ ءَ اے سرھالءِ سرا تران کُت۔

 ھمے وڈءَ دومی بہرءَ Books and Literature، سیمی بہرءَ History of Lasbela, چارومی بہرءَ A Talk to Academician سرا واجہ ظفر معراجءُ آئیءِ ھمراہ داری ئے واستہ موڈیریٹرءِ شکلءَ ڈاکٹر حسین مگسیءَ سرھالءِ سرا تران کُت۔ اے درمیانءَ آؤکیں مردمانی واستہ آرٹ اینڈ انٹرٹینمنٹ ھم کنگ بوت۔ مراگشءِ تہا Book Fair ھم ھوار اَت کہ بازیں نودربراں ءُ دگہ علم دوست اِیں انساناں جوانیں رنگےءَ کتاب زُرت۔مراگشءِ ھلاسیءَ گوں بلوچی کلچرل ناچ "دو چاپی"ءَ گوں بوت۔ گُڈسرءَ سرجمیں بہر زُرتگیں وجہاہاں کِتاب سوگات دئیگ بوت ءُ آ ایچ ایل ایفءِ سنگتاں سوگات کُتنت۔

کتابءُ لبزانکءِ سرا تران کنانءَ انچو کہ اسحاق ھاموش صاحبءَ گُشت کہ' ماں حب شہرءَ یک بلاھیں مُدتےءَ پد نا بلکیں اولی رند ایں کہ اے وڈیں تعلیمی چاگردے زاھر کنگ بوتگ ءُ اے مراگش برجم داشتگ'۔ اسحاق ھاموش صاحبءِ گپانی ردءَ  حب لٹریری فورمءِ ہم ہمے جُہد بوتگ کہ آ یک ناآشنائیں چاگردےءَ چہ وابءَ پاد بہ کنت کہ دُگنیاءَ چُشیں جیزے ھست اِنت ءُ ما وتءَ بےبھر کنگ اِنت چیا۔ اے بےبہائیں بھرءِ گرگءِ واستہ تاں اے وڈیں مراگش جم دارگ المی اِنت۔ گُڈا حب لٹریری فورمءِ سنگتانی جُھدءَ رنگ آورتءُ آ سوبمند بوتاں اے وڈیں مراگشےءِ جم دارگءَ۔

 انچو گُشاں کہ چاگرد انسانءِ مستریں وانگجاہ اِنت۔ نودربرے بیت یا رھشونے یا لس مھلوکے آ چہ چاگردءَ رنگ زوریت۔ یک واب کپتگیں چاگردےءَ آگاہ کنگ پہ آئیءِ نودربرءُ آ دگے مھلوکانی واستہ یک دگہ انکلابے کاریت۔ دُگنیا مرچی ماھءِ سرا رستگءُ ما زمینءِ سرا پشکپتگءُ مانگیشِتگیں۔ جیڑھاں گوں دُچار کُتگ وتءَ۔ ہمے یکیں چیز کہ مارا آ دگے راجانی برابریءَ کاریت آ "علم" اِنت، علمی چاگرد اِنت ءُ اے چیزاں پدا ہمے وڈیں علمی مراگش کاراں۔ نودربراں دلبڈی دیاں ءُ آھاں علمی چاگردےءِ تہے روگ ئے سکینءَ دیاں۔ حب لٹریری فوررمءِ اے گامگیج پہ نودربراں یک جوانیںءُ بےبہائیں سوگاتے ءُ ما امُیت کن ایں کہ اے گامگیجءِ روکیں چراگ مُدام اے تہاریں چاگردءَ رُژنا کنگئے جُہدءَ کنت۔  

   منت وار : مہراج گلام

 @MG_baloch