گوادر: گلءِ دیوان، ازمءِ کسہ
گوادر ءِ توار
بام سار گَلّءِ نیمءَ بلوچی دستونک ءُ رجانک کاریءِ پڑءِ مزن نامیں شائر واجہ غین نون گُلءِ یاتءَ چار شمبے 17 فروریءِ بیگاہءَ عبداللہ عاصم فُٹ بال لئیبی پٹءَ مراگشے برجم دارگ بوت۔ اے مراگشءِ ڈُبہ چاکر کتاب جاہءَ زُرتگ ات۔
مراگشءِ بنداتءَ غین نون گلءِ زند ءُ شائریءِ سرا جاوید مولا بخشءِ توارءَ ریکارڈ کُتگیں توار بند گوں اکساں جوڑ کُتگیں تامُرک مزنیں پردہءِ سرءَ پیشدارگ بوت۔ اشییءَ ابید انور شاہ ءِ جوڑ کُتگیں اے آر دادءِ توار گُلءِ یات ءُ ترانگانی بابتءَ ریکارڈ کُتگیں تامُرک ھم مزنیں پردہءِ سرءَ پیشدارگ بوت۔
مراگشءِ اولی بھرءَ واجہ اے آر داد، ڈاکٹر رحیم مہر ءُ بلوچیءِ ورنائیں شائر عالم سیفءَ گُلءِ بابتءَ وتی نبشتانک ونت آں۔ دیوانءِ جار چینیءِ زمہ واری اعجاز زاکرءَ گون ات ءُ اولی بھرءَ بلوچیءِ ورنائیں گُشندہ سمیر رحیم ءُ عارف ازملءَ گوں وش گُٹیءَ گُلءِ شئر ھم ونت آں ءُ دیوان وشنود کُت۔
دیوانءِ دومی بھر ساز ءُ زیملی بھرے اَت کہ اے بھرءَ مزن نامیں گُشندہ واجہ سلیم بلوچءَ گُلءِ شئر جَت انت ءُ دیوان گیشتر زیبا کُت۔
مراگشءَ مزنیں کساسےءَ بلوچی زبانءِ شائر، نودربر ءُ لس مہلوکءَ بھر زُِتگ ات۔ زانگ بہ بیت کہ ازم کسہءِ اے دومی مراگش بوتگ کہ گُلءِ نامءَ جم دارگ بوتگ چد ءُ پیسر ازم کسہءِ مراگش واجہ اے آر دادءِ شرپءَ برجم دارگ بوتگ۔
ازم کسہءِ اے مراگش 'گلءِ دیوان' چہ ازم کسہءِ یوٹیوب
چینلءَ تچکائی ھم پیشدارگ بوتگ۔
No comments:
Post a Comment