"حق بہ دئے زرمبشت" ءِ پلہ مرزی ءَ "گوادر ءِ توار" ءِ نام پچین نمدی یے
دیدگیں جاوید جان۔۔!! دروت ءُ درہبات ئے، امیت کشاں کہ یکشی پیم تئی نیمگ ءَ وشی بیت ءُ منی ھال ءَ تو سرپد ئے کہ من ءَ یک رنگی وش نہ بیت بچار کہ کدی گوں یک وڑیں جنزال ئے ءَ سر ءُ پٹاں،
منی بیلی ءُ گوادر ءِ توار ءِ کارمستر۔۔۔!!!
دیریں دل ءَ بیتگ کہ تئی واب ءُ حق بہ دئے زرمبشت ءِ سر ءَ چیزے بہ نویساں بلے منی قلم ہمراہ نہ بیتگ ءُ دپ ءَ ہم پہ گشگ ءَ نہ گپتگ مرچی ہمیشیں ترا نمدی نویسگ ءَ آں کہ لہتیں گپ تھنا پہ نویسگ وش انت، دیم پہ دیمی گپ دراج روان کنت ءُ وتی بنکی جست ءَ گار کنت، جست تھنا یکے کہ گپانی نویسگ ءَ پد تو ئے وت در بگیج، بگندے جستے و مہ بیت بلے بازیں مردمے ہمے نیام ءَ مان گیش اتگ پمشکہ من ترا نمدی نویسگ ءَ آں ۔۔۔
صحافت ءِ نودربر۔۔۔۔!!!
تو و سھیگ بئے تیز گامیں زمانگ گوں وتی تیزی ءَ دیما جنزان وتی پاداں جہان ءِ کنڈ کنڈ ءَ ایر کنان انت، چیز چہ وتی روایتی رنگاں پرشان ءُ نوکیں رنگے ءَ دیما آیگ انت، دنیا روچ پہ روچ ٹیکنالوجی ءِ نیمگ ءَ سپر کنان انت کہ اناگہ ءَ ترا ہم سما بوت کہ تو ڈیجیٹل چینلے اڈ بہ دئے یے کہ اوداں بلوچ ءُ بلوچستان نوکیں رنگے ءَ ڈیجیٹل دنیا ءَ پیش دارگ بیت چشکہ تو وت کراچی شھدربرجاہ ءَ چہ صحافیات ءِ تہا ایم فل کنگ ءَ ئے تاں اے درد ءَ چتو گیش کئے مار ات کنت، "گوادر ءِ توار" ءِ نام ءَ تو وتی جھد بنگیج کت کہ آ بلوچستان ءِ اولی ڈیجیٹل چینل ات کہ کسانیں وھد ءِ تہا بازیں مردماں دوست داشت، بلوچستان ءِ تہا چشیں چینل و پیسر ءَ ہم است ات بلے اے چینلے لوٹ ءُ تئی واب گوادر یا بلوچستان ءِ تہا انچیں ڈیجیٹل چینلے ءِ بندات ات کہ ہچ وڈیں سیاسی گلانی پلہ مرز مہ بیت، پہ بے وسیں بلوچستان ءَ ہما آواز بہ بیت کہ وھد ءِ دنزاں چیر تر اتگ۔۔۔۔
جاوید جان۔۔۔!!!
تئی جھد انگت آبسرے ءَ سر نہ ات کہ گوادر ءِ تہا "حق بہ دئے" ءِ نام ءَ یک زرمبشتے دیما اتک کہ آئی ءِ سروک جماعت اسلامی ءِ صوبائی جنرل سیکریٹری ءُ لس دریا وردی ءِ بچ مولانہ هدایت الرحمان ات ۔۔۔ تیز گامیں وھد ءِ ہمرائی ءَ آئی ءِ زرمبشت گوں تیزیں گاماں شاھگان بوان بوت ءُ آئی ءَ گوادر ءِ پجی ءَ سرجمیں مکران وتی پنجگاں پتات، ہمے نیام ءَ نئیکہ تھنا آئی ءَ گوادر ءِ تہا مردینانی مستریں ریلی کش ات بلکیں جنین ہم یکجاہ کت ءُ مزنیں کچے ءَ روڈانی سر ءَ کش ات انت کہ چد ءُ پیش گوادر ءِ تہا چشیں چست ءُ ایر نہ بیتگ ات، چاران چاران آئی ءَ گوادر ءِ تہا مستریں نندانک ہم وتی نام ءَ کت کہ چک ءَ بگر داں کماش ماہے ءَ آئی ءِ ہمرائی ءَ روڈانی سر ءَ وپت انت(انو ہم چشیں نندانکے برجاہ انت)، بلے آ تھنا مولانہ نہ ات آئی ءِ ہمراہ گوادر ءُ مکران ءِ لس بلوچ ءُ دریا ورد ات انت، نندانک ءِ میان ءَ بلوچ ءِ مزن شانیں لیڈر ءُ بی ایس او ءِ واکدار مستی خان ہم گوں کپتگ ات کہ جزباتی نعرہانی پشت ءَ گرگ ءُ بند ہم کنگ بیت، اگاں من بہ گشاں مارا حق بہ دئے زرمبشت ہچ نداتگ تا رد بیاں بلے ھیر مارا حق بدئے زرمبشت ءِ سر ءَ گپ جنگی نہ انت کہ آ وت مزنیں سرھالے بقولِ اے آر داد دگہ رند ءِ گپ جنیں۔۔۔
سنگت۔۔۔!!!
چشکہ ما ءُ تو ہردو نودربریں بلے تو چمن گیش دنیا دیستگ ءُ تئی پڑ صحافیات انت ءُ من لبزانک ءِ نودربرے پمشکہ سیاست ءِ بازیں چیزاں مان گیشاں کہ اوداں تو مناں شریں وڑے ءَ کمک کن ئے، مردنی من و تئی پرے جھد ءَ سک گل اتاں کہ چشیں وابے نودربرے ءَ چمان کتگ ءُ ڈیجیٹل دنیا ءِ رند ءَ کپتگ، آئی ءِ دیواناں نشتین ئے یا کہ آئی ءِ نبشتگین بہ وانتیں آں، ہرکجا چیزاں مٹ کنگ ءِ جھد ءَ ات بلے اے ہما موسم ات کہ گوادر ءِ تہا چک چک چہ ملا ءَ سان زورگ ءَ ات ءُ ہمائی ءِ پلہ مرز جوڈ بوھگ ات، سیاست نوکیں رنگے ءَ دیما اتکگ ات کہ مولانہ ءَ غیر سیاسی گلے حق بہ دئے زرمبشت ءِ نام ءَ دیما آرتگ ات ، بلے آئی ءِ بنگیجکار وت جماعت اسلامی ءِ مردم ات ءُ دیم ءَ اوشتاتگیں ہمراہ ہم چہ سیاسی گلاں رستگیں مردم۔۔۔
اگاں حق بہ دئے زرمبشت سیاسی گلے نہ انت تاں چی یے؟
آ پرچی مردماں چہ ووٹ لوٹگ ءَ انت کہ آئی ءِ بنداتی زمانگ ءَ ووٹ ءِ گپ نہ جتگ ات؟
تئی ءُ "گوادر ءِ توار" ءِ واب ہم چشکہ ہچ وڑیں سیاسی گلانی پلہ مرز نہ ات بلے گشے نو آ سیاسی گلانی پلہ مرز جوڑ بیتگ، روچ پہ روچ "حق بہ دئے زرمبشت" ءَ نزیکی کنگ ءَ اِنت ءُ آئی ءَ کووریج دیگ انت، نو انچو سما بوھگ بیت کہ شما وتی واب یکر ءَ کتگ ءُ حق بہ دئے زرمبشت ءِ زھرشانی ءُ نندانکانی نیام ءَ نوکیں راہے ءَ در کپتگ ات، ہردیں کہ منی وڑیں نودربرے یا گوادر ءِ توار لوٹوک وال ءَ روت داں ہوداں گیش ءَ گیش حق بہ دئے زرمبشت ءَ گندیت، چش پرچی؟
گوادر یا بلوچستان ءِ تہا بازیں سیاسی گل است انت کہ پہ نام روچے ہزاراں چیزاں نزیکی کن انت بلے آیانی ھال گوادر ءِ توار تہا گندگ نہ بیت، چی تو وتی واب شمشتگ یا و پہ کزدن اے کار ءَ کنگ ءَ ئے داں منی وڑیں بازیں مردمے ہمے میانءَ مان گیش اتگ کہ تو واب دگہ دیستگ بیتگ انت ءُ گوادر ءِ توار دگہ نیمگے سپر کنگ ءَ اِنت۔۔۔
جانی۔۔۔۔!!!
امبری کہ کراچی ءَ آیگ ءَ بئے تاں گوادری حلوہ ءِ جاہ ءَ گوادری میسو بیار کہ مئے بچک ہمایاں ھب تر انت، مردنی منی جند ہم ہمایانی لوٹوک انت، دگہ پتو سلامتی، زند ءِ بہاراں بات ئے
تئی شاگرد ءُ سنگت
زید رحمت
گلشن اقبال، کراچی
17 دسمبر 2022
No comments:
Post a Comment