حب ءِ لوٹ، یونیورسٹی

 حبءِ لوٹ، یونیورسٹی

                       معراج غلام  

حب شہر، بلوچستان ءِ صنعتی شہر زانگ بیت۔ مستریں صنعتی شہر بوھگءَ چہ ابید انگتہ حبءِ مھلوک زندءِ آسراتیاں چہ بےبہر اِنت۔ اگاں ما حب شہرءِ وانگءُ زانگءِ سرا تران بہ کن انت تاں ہزاراں جُست مئے ذہنءَ چِست بنت۔

حبءَ بس یک کالجے ھست اِنت کہ آ ھم شریں زانتءِ دیئگءَ پُشتءَ کپتگ۔ حبءِ نودربر گیشتر دگہ شہراں سپر کناں پہ گیشیں ءُ جوانیں زانتءِ دربرگءَ۔ اے جیڑگی گپے کہ حب، 175376 گیش مردمءِ لوگ اِنت اودا ایوکءَ یک کالجے چیاءُ نودربراں شریں وڈےءَ زانت دئیگ بوھگءَ نہ انت پرچا؟ حب شہر، منی زانتءِ ردءَ اولی شہر اِنت بلوچستانءِ کہ اودئے وانگجاہ گیشتر زرّی 'پرائیوٹ' اَنت۔ اِشانی وجہ اِش اِنت کہ سرکار بےسوب بوتگ کہ آ اے شہرءَ سرکاری جوانیں وانگجاہ بدنت گوں شریں آسراتیاں۔ 

یک ءُ دو روچ بوتیں کہ چندیں نودربراں اے مشورہ کُتگ کہ آ ماں حب شہرءَ یک شاھدربرجاہےءِ لوٹءَ گوں سرکارءَ کناں۔ حبءِ نودربر ھرروچ پریشانیانی آماچ بنت ھردیں کہ آ کراچیءُ اُتھلءَ پہ گیشیں زانتءِ واستہ رواں۔ کراچی بیت یا اُتھل، نودربر اودءِ روھگءَ باز وھدءَ دَگ ویلانی آماچ باں ءُ بیران باں۔ 2014ءَ ماں بلوچستان ءِ سروزیر جام کمال ءَ اے گپ جتگءَ کہ آ اُتھل شاہدربرجاہ ءِ شاکے 'کیمپسے' کاریت ماں حب شہرءَ جوڈ کنت پہ حبءِ مھلوکءِ واستہ بلے، بدبھتیءَ چہ اے کار تاں روچ مرچیءَ انگہ کنگ نہ بوتگ۔

نودربرانی لوٹ اِنت کہ سرکار پہ آھاناں یک شاہدربرجاہے جوڈ بہ کنت کہ آ اُودا آرامیءِ گومءَ ونت بکناں۔ ھرروچ ماں دگہ شہراں سپر کنگءَ پہ گیشیں زانتءِ واستہ جنکیں نودربرانی واستہ بلاھیں جیڑھے۔ پمشکہ ماں جمہءِ روچءَ 6:00PM تاں شپءِ 12:00AM ءَ یک ٹویٹر کیمپئنے جم دارگ بوئگءَ انت ٹویٹر ءَ اے جیڑھءِ پدر کنگءِ واستہ کہ حب شہرءَ اشَد الم اِنت کہ یک شاہدربرجاھے بہ بیت۔ دُگنیاءِ کُجام بی جاھءَ علم دوستے ھست، آئیءَ گوں دزبندی اِنت کہ آ اے جُنز ءَ بہر بہ زوریتءُ اے جیڑھءِ پدر کنگءَ پہ حبءِ نودربرانی ھمکوپگ بہ بیت۔

#HubNeedsUniversity