بلوچ گوستانکءِ ٹیکہ دار

بلوچ گواستانک ءِ ٹیکہ دار

رگام بلوچ

@SalaamEllahi

من ءَ مزنیں مُدتے بیت کہ گوستانک ءَ گوں هاسیں دوستی یے ھست همے هاتر ءَ من وتی BS ءِ ڈگری ءَ هم چه گوستانک History ءِ توک ءَ کنگ ءَ انت_

 یکّے وَ گوستانک ءِ جِند بِہ تچک نه انت، پدا بلوچ ءِ گوستانک گنتِر.... باریں من ءَ چِہ هوپ ءَ گپتگ اَت که وتارا چُشیں گپچّلے ءَ دور دات.... بلے چوش بیت_

من که بلوچ گوستانک ءِ سرا نبشتگیں کتاب وانان کُت اَنت په درور میر گُل خان ءِ" بلوچستان کی تاریخ "ءُ لهتے شوندات چه  شاه محمد مری ءَ گُڑا منی دل کپت کہ اے دوئیں بلوچ ءِ گوستانک ءَ جتائیں رنگے ءَ نبشته کنگ ءَ اَنت_

میر گل خان نصیر وتی کتاب " بلوچستان کی تاریخ " ءِ ته ءَ بلوچاں دُز ءُ ڈُنگ زاهر کنت، آ بلوچاں " بہروپیا ءُ ڈاکو " گُشیت _

من اے گپ ءَ اجب هیران بوتاں کہ گُل خان نصیر کہ اے پیم بلوچ گوستانک ءَ بیان کنگ ءَ اِنت اے ایر برگی گپ نہ اَنت ءُ انچوش کہ من ءَ منی ڈگری هم اے گپ ءِ رزا ءَ نہ دنت کہ من گوستانک ءِ گپّاں ابید شونداتاں کبول بِہ کناں-

پدا زوت آں من یک بلوچ Historian ءُ بلوچستان یونیورسٹی ءِ هسٹری ڈیپارٹمنٹ ءِ پروفیسر " فاروق بلوچ " ءِ کتاب " بلوچ اور ان کا وطن " ونت _

 فاروق بلوچ ءَ وتی کتاب جوانے رنگے ءَ نبشتگ اَت آهی ءِ کتاب زانشی رنگے ءَ نبشتگ اَت پمیشکا پمّن ارزان بوت کہ من آهی ءِ گپّانی سرا تپاک بِہ کناں_

فاروق بلوچ ءِ کتاب ءِ وانگ ءَ رند اے گپ من زانت کہ میر گُل خان نصیر ءَ وتی کتاب چہ انگریزانی شونداتاں نبشته کُتگ، آئی ءِ گیشیں گپ انگریزانی بوتگ اَنت انگریزاں هما پیم کہ بلوچ ءِ گوستانک لِکّ اِتگ هما پیم گُل خان نصیر ءَ هم لِکّ اِتگ انچو سما بیت که گُل خان نصیر ءَ گیشیں پٹ ءُ پول نہ کُتگ ءُ وتی کتاب نیم شلونگ ءُ دروگیں شونداتاں چہ نبشتہ کُتگ_

گُل خان گُشیت بلوچ عرب ءُ فارس آنی راج ءِ بهرے کہ بلوچستان ءَ اتکگ آ گیشتر گُشیت کہ بلوچ " سرانو "‍ اَنت_

ھمے پیمیں گپ پیسرا شاہ محمد مری ءَ هم نبشتہ کتگ کہ بلوچ عرب ءُ فارس ءِ بهرے ءُ سرانو انت بلے شاه محمد مری ءَ زوت اں اے گپ منّ اِت کہ انگریزانی گپ بیسہ کنگی نہ اَنت مروچاں شاه محمد مری وت پٹ ءُ پول کنت ءُ لِکّ اِیت_

فاروق بلوچ ءِ نبشتگیں گپ اے هاترا منّگی گپ اَنت کہ آهی ءِ پٹ ءُ پول "  شاه نامہ فردوسی " ایریڈوٹس، هنری کیسِنگر ءُ سکندر اعظم ءِ اهد ءِ نبشتگیں مواداں چہ کُتگ ءُ بلوچ ءِ گوستانک نبشتہ کُتگ ءُ منی دلجم کنگ ءِ واستہ آئی ءِ شوندات بس اِت اَنت ءُ من ءَ یکین اِنت که فاروق بلوچ ءَ بلوچ مات ءِ وارتگیں شیر هِلار اَنت_

اے کتابانی وانگ ءَ رند من زانت کہ بلوچ ءِ گوستانک یکبرے انگریزاں بُن داتگ ءُ گار کُتگ ءُ  وتگڑیں کِسہ ءُ توسیپ ءِ سرا بلوچ گوستانک اش پدا نبشتہ کُتگ کہ چٹ ردیں _‍

پدا بلوچ ءِ هون ءَ مان اِنت کہ کسے آئی ءِ کمّو توسیپ ءَ بہ کنت بلوچ آئی ءَ وتی ساه ءَ هم دنت گل خان نصیر ءُ دگہ بلوچ نبشتکار کہ آیاں انگریزانی شونداتاں چہ بلوچ ءِ گوستانک نبشتہ کُتگ آ درست انگریزانی توسیپاں رد داتگ اَنت ءُ آیانی گپ ءِ سرا راج هم دروگیں گوستانکے وارس کُتگ_‍

اسل ءَ گوستانک گُشیت اهدے ءِ بابت ءَ زانگ کہ لوٹ ئے درستاں پیش هما اهد ءِ سردار، بادشاه، میر ءُ معتبراں بِچار چیا کہ یک زالمیں سردارے وتی گوستانک ءَ وت نبشتہ کنت ءُ وت ساڈائیت ءُ آؤکیں نسل ءِ دیم ءَ وت ءَ شرّیں ءُ نیکیں سردارے لیک ایت _

انگریز مئے بدواه بوتگ اَنت آیاں بِہ نہ لوٹِ اتگ کہ ما وتی راستیں گوستانک ءَ سرپد بِہ باں پمیشکا مئے کمّو توسیپ کُتگ ءُ مارا عرب ءُ فارس آنی نماسگ کُتگ کہ شما سرانو اِت۔

همے پیم پُرتگیزاں هم بلوچ دُز ءُ ڈُنگ گُشتگ اَنت چیا کہ بلوچاں آ جتگ اَنت، آیانی زندگی هرام کُتگ بوتگ ءُ پُرتگیز هاکم بوتگ اَنت آیاں همّل هیرو ءِ جاگہ ءَ دُز ءُ ڈونگے گُشتگ بلے سد آپرین آیانی تہ ءَ لهتے ایمانداریں مردُمانی کہ روگ ءَ پیسر ماں هندوستان ءِ شهر گوا ( Goa)  ءِ یک باگے ءَ همّل ءِ بُت جوڑ کُتگ بلے آ بُت ءُ راستیں نبشتانک انگت لہتے چم پچیں بلوچاں سر نہ بوتگ اَنت منی دل ءَ،  چیا کہ آ انگت میر همّل ءَ یک دُز ءُ ڈونگے سرپد بنت بِگندئے اے مردُماں انگت گوستانک ءَ چہ سبک نہ زرتگ اے بائدیں سرپد بہ بنت کہ اے اهد زانش ءِ اهدے اد ءَ واجھی ءُ مھتری نہ مان ایت اے اهد ءَ زانشی گپ منّگ ءُ ساڈاھگ بنت، مھتر ءُ میر آنی گپانی سرا " جی واجہ، جی واجہ " کنگ ءِ زمانگ هتم اِنت نوں_

انچوش سد دو سد سال پیسر بلوچ ءِ گوستانک ءِ ٹیکہ دار انگریز ءُ پُرتگیز بوتگ اَنت مروچاں بلوچ ءِ گوستانک ءِ ٹیکہ داری ءَ بلوچ میر ءُ مھتبر کنگ اَنت بلے نوں گیش آیانی وتگڑیں گپ ءُ کسہ آنی سرا کس بیسہ نہ کنت_

هرچ پیم بہ بیت بلوچ اے دُگنیا ءِ کُھن تِریں دود مان " مھرگڑھ " ءِ پُشپد اَنت ءُ بلوچ گوَستانک ءِ تہ ءَ همّل نامیں کردارے بوتگ کہ پُرتگیزانی دپ ئےِ ماں هاکاں سک کُتگ اے گپاں من پہ جزبات نہ جَنَگ ءَ آں، بلکیں گوستانک ءِ نبیستگیں تاک اے چیزّانی گواھی ءَ دی اَنت _