عطا شاد ءِ پُرآشوبیں ساہ کندن
جاوید بلوچ
مئے چاگردءَ انچو سما بیت کہ لہتیں کار یا لہتیں چیز گیشینگ بوتگ۔ بزاں آ کار ایوک چندیں مردم یا چندیں ٹولیانیگ آں ءُ پہ دگراں آہانی سُرینگ یا در جنگ ءِ ھچ رزا نیست۔ ھمے سبب انت کہ سید گنج نوکیں دروشمءَ آرگ مہ بیت، نبشتہی راہبندءِ سرءَ گپ جنگ نہ بیت ءُ زبان ءُ زبانءِ سرا کارکنگ ءَ ھم چو میتگءِ میر ءُ واجہ کارءِ وڑءَ اگاں سیاست، اھوالکاری، چاگردی کارے کنگ لوٹ ئے گڑا واجہءِ دُمبُل الم دارگی انت۔ اگاں ناں گڑا رزا نیست۔
ھمے سبب انت کہ نوں یک نودربرے ھر وڑیں سرھالے زوریت گڑا چہ اشییءَ گیش کہ آئیءَ وتی بُنگپءِ درجنگءَ پہ چے وانگی انت؟
چے پَٹ ءُ پول کنگیگ انت؟
چے آسر درکئیت ءُ پدا وھدے کہ اے نبشتانکےءِ دروشمءَ دیمءَ کئیت گڑا دیم ترءَ کجام کجام تکءُ پہناتاں کمک یا مو دَنت تاکہ نبشتہی سپر دیمءَ بہ جُنزیت؟ بلے اے جُستاں گیشتر اے ھئیالانی تہا شیکو کنت کہ کے کے اشییءَ منیت یا نہ منیت۔
پمیشکہ یک نودربرےءَ پہ کار گران بیت بلے نودربر بوئگ انچو کہ گرانیں زمہ واریے ھمے وڑءَ سِکگءِ ھم راہ ے۔
اتا ءُ آشوب یک انچیں سرھالے کہ ناں زبان ءِ ٹیکہ دارے گپے کُت کنت ءُ ناں لبزانکی ٹولی ے فتویٰ ءِ دات کنت۔
بنی آدمءِ راج دپترءَ چُشیں بے کساس درور مارا دست کپیت کہ اودءَ زوراکیں راجاں یا بُگش کہ طبقاتی نظامءِ پیداگیراں ھردیں کہ جاگہے زور گیری کُتگ گڑا اودءِ مردم بھر بھر کُرتگ انت ءُ آئیانی سرءَ ھکمرانی کُتگ۔ بلے بازیں دہر گوزگءَ پد ھم انسانی ھئیالانی آجوئی، بزگی ءُ بے وسی، لگتمالی، کُشگ، چست کنگ ءُ بیگوا کنگءِ نظامءَ زوراکءِ گوں زوراکءَ ءُ بزگءِ گوں بزگءَ سیادی بُر ات نہ کُتگ۔ مرچی ھم مھکمیں دیوال ءُ آہنی سیم سرءِ ھر دوئیں نیماں بزگیں مہلوکءِ امیتءِ سوت یک انت ، بھر ءُ بانک کنگءَ ابید ھم فیض احمد فیض ءِ پربند "ہم دیکھینگے لازم ہے کہ ہم بھی دیکھینگے" یکیں وڑءَ درشان کنگ بیت۔ ھمے وڑءَ اتا ھم یک انچیں گُلزمینےءِ جامند بوتگ کہ آئیءَ ھم وتی مردمانی چی ہانٹ گوں وتی گُشاں اِشکُتگ انت، زواراکءِ بے سوبیں جھد چمءِ وت دیستگ انت وھدے آ ھئیالانی کُشگءَ پہ سراں گُڈگءَ اَت۔
یک زانتکارےءِ گُشگ انت کہ "ھما وھدءَ تا راہشون وت شُدیگ مہ بیت آ گُژنگیءِ بزگیءَ سما کُت نہ کنت" پمیشکہ اتاءِ ساہ کندن چہ ھما آسءِ تہا گرستگ، ھما پاہوءِ ساد ئے چُک اتگ، ھما بیگوائیں بچءِ ودارءَ نشتگیں ماتءِ ودار ئے دیستگ ءُ نو ساہ کندن جوڑ بوتگ کہ سرجمیں جہانءِ بزگی، جھد، آشوب ءُ انسانی ھئیالانی آجوئیءِ زرمبشءِ نمائندگیءَ کنت۔
ساہ کندن ازرائیلی زوراکیءِ دیمءَ پلستین ءِ سُتکگیں ڈگاراں بگر تا مرچیگیں روچءَ برماءِ جمہوری نظامءِ پروشگءُ فوجءِ زور گریءَ پہ لس مہلوکءِ ھاترءَ یک آشوبی لچہ ے۔
ساہ کندن بلوچیءِ "بیلا سیاؤ" انت کہ ادا فاشسٹ نظام ءِ ھلاپءَ یک زرمشی آشوبی سوتے۔ ساہ کندن قانودءِ کتابءِ ھما آرٹیکل انت کہ اودءَ بُنکی انسانی ھکانی، ھئیالانی آجوئی، تران ءِ آجوئی، زندگ بوئگءِ آجوئی ءُ اگاں درستانی سرا بندش جنگ بہ بیت گڑا گریوگءِ آجوئیءِ سوت انت۔ چیاکہ
ساہ کندن ءِ چم پاچی ءُ بے وانکی ءَ استنت زبان
چمّے بہ بیت پہ گِندگ ءَ
گوشے بہ بیت پہ اِش کنگ
امبروز ءِ گْراں باہندیں آشوب
عاقبت اوبادگاں پہ ساعت اَنت ساہ کندن ءِ
بگندئے پمیشکہ وھدے بنی آدم کہ ماتءِ لاپءَ چہ پیداگ بیت۔ آ وھدءَ آ ھچ نزانت ناں وتءَ ناں مات، ناں اے دنیا ءَ بلے زہرشانی کنگ ءِ ھک آئیءَ گوں وت گون ءُ کئیت۔ ءُ وتی انہگتیں چاگردءِ بدل بوئگءَ گوں، وتءَ بے وار سما کنت گڑا ھمے عملءِ ھلاپءَ گریوگءِ دروشمءَ مزاحمت کنت ءُ وتی زہرشانیءَ ریکارڈ کنائینیت۔ اگاں ھمے نوک پیداگ بوتگیں نُنک مہ گریت گڑا آئیءِ مات، بَلُک ءُ مردم درست پریشان بنت ءُ ھمے سما کن انت کہ اے ھُشکیں ساہداری ڈبے نہ انت کہ پیداگ بوتگ؟
ھُشکیں ڈب بوئگ ھما انت کہ وتی چمانی دیمءَ آدمءِ اوبادگاں بزگیءَ بگندئے ءُ وتءَ کور بکن ئے، ارواہءِ چی ہانٹاں اِش کنگءَ ابید ھم کرّ بہ بئے۔ پمیشکہ ساہ کندنءِ توکءَ اتا گُشیت
گند اَنتءُ بے روک اَنت چمّ
کرّ اَنت بلے گوش اِش کننت
ساہ اِنت ءُ بیگْواہ اِنت زند
گند کہر ءُ مہر ءِ آدمی گستائی ءَ
ارواہ ءِ چیہانٹاں سر ءَ زرتگ جہان
کَرّ اَنت تئی گوش ءُ منی گُنگ اِنت زبان
تو چو بدل زرتیں زبان ءِ منّت ءَ بے باورئے
من چو زمیں جُمبانی کہریں نیّت ءَ پیداوراں
ساہ کندن عرب اسپرنگ آشوبءِ ھما "اِرحل" انت کہ آئیءَ عربستانءِ نقشہ مٹ کُت۔ یا ھما اولی بُرزیں توار انت کہ ھک ءُ ناھکءِ میانءَ لکیرءَ ساپ ساپءَ پدر بکنت۔
انسان ھما وھدءَ تا بے وس ءُ بے واک نہ انت دانکہ گریت بکنت چیاکہ گریوگءِ شور ھم زوراکءِ وابءَ ھرام کنت ءُ آئیءِ مگزاں جُشین ایت ءُ آ ھچ بر آرامءَ نشت نہ کنت بلکیں آئیءِ جاور آئیءِ زوراکی ءُ طاقت، پہ آئیءَ ھچ کُت نہ کن انت ۔ ساہ کندن بلوچ اھوالکاریءِ کماش واجہ یوسف عزیز مگسیءِ ھما فریادءِ بلوچستان انت کہ زوراکیں برٹشءِ بندشاں چہ چیروکائی بلوچستانءَ بھرءُ بانک بیت یا عطا شاد وانگ جاہءِ ھما کتاب جاہ انت کہ اودءَ بنی آدمءِ راج دپترءِ عجیبیں عمل گندگءَ کئیت وھدے سلحہ ءُ تُپنگاں گوں اُرش کنگ بیت پہ کتابانی دزگیر کنگءَ۔۔۔۔ ءُ ھمے کتاب کہ دزگیر کنگ ءُ پدا بیگوا کنگ بنت ھمیشانی تہا یکے ءِ نبشتگیں لبز الم اے وڑءَ ھم گُشگءَ بنت کہ
من آدم ءِ اوبادگاں
مہرانی حقیں وارثاں
راستے کہ تئی سوب ءَ منا مَرگی کتہ
شاتئے کہ تئی زوراکی ءَ مرچی پدا زند ءِ یلیں بچّے جتہ
بچّ اجوئی
بچّ ایمنی
بچّ گُلزمین ءِ دیدگ ءُ زرد ءِ مُراد
بچّ غم جتیں بنیادم ءِ رکّینگءَ جہد ءِ مُراد
بچّ دیر مانیں شادہ ءِ شوہازگ ءِ مُزد ءِ مُراد
بچّ زند ءِ مہر ءِ مُجّتی ارمان
مستاگی عذاب ءِ آسر ءِ
تو پہ سرانی گُڈّگ ءَ زند ءِ ھیالان کُشئے؟
پہ سِندگ ءَ داشت کنئے؟ پُلّاں چہ بو تالانی ءَ؟
اتا ءِ ساہ کندنءِ آشوبیں سوت اھوالکاری، انسانی ھکءُ اُگبال، راجی زرمبش، جمہوری نظام ءُ جمہوریتءِ سوت انت کہ سرجمیں انسانانی نمائندگیءَ کنت۔
 |
No comments:
Post a Comment