جنین ءِ سرگوست۔ گوادر ءِ توار

 جنین ءِ سرگوست

اشرف رقیب                                 

اکس: میران ھسا

 من یک جنین آدمے آں۔۔منی امر انی سی ءُ ھشت سالیں۔۔بلئے کسے منی دیم ءَ بگندیت آ منا پنجاہ سالءَ برزءِ جنین آدمے  سمجیت ۔۔پرچا کہ منی دیمءَ انچیں کرچک استیں کہ منی نہ بیتگاں ۔۔بلئے منا دیگ بیتگاں۔بلکیں انچیں گم ھم منا دیگ بیتہ کہ منی بہتءَ نبشتہ نبیتگاں بلئے زور منا داتگ انت ئے۔۔من چی بگشاں بنی آدم ءِ رسم ءُ رواجاں  میاریگ بکناں یا وتی بہتءِ سرا بہ گریواں۔۔نی من گریت ھم نہ کناں ،  پیسرا باز گریتگ وتی بہت ءِ سرا۔

 کدی کدی منی ارسانی بدل ھون بیتگاں۔۔بلے ھمائیءِ کہ من ٹینگ یا نفر (آئیءَ منا جنین کدی ھساب  نہ کتگ ) بیتگاں آئیءَ منی اے ھون رنگیں ارساں مکرےءِ نام داتگ ات۔۔ گڑا منا وتی ارس پہ ریچگءَ شات نہ بیتگاں۔۔اودا کہ تئی ارساں قدر مبیت۔۔تئی جندا ھم عزت نہ بیت

آ روچی منی امر سیزدہ سال ات کہ منا مات ءُ پتاں سیر دات۔۔زندے توامیں وشیانی روچ ھما یک ات ءُ ھرچی کہ پیسرا من گوازینتگ ات۔۔۔ زاناں منی امرءِ درائیں وشی مات ءُ پتانی لوگءَ ھلاس بیتگ اتاں۔۔پمشکہ سیرءَ رند من بید چہ گم ءُ درداں ھچ پیمیں وشی نہ دیت۔۔

آ شپ ءَ کہ منی سیر بیت من بازیں ارمانے  وتی دلءَ ایر کت ،  من وتی دلءَ گوشت وھدے منی لوگ واجہ شپءَ منی گورا کیت وپسگءَ گڑا بازیں گپے گوں آئیءَ کناں۔ وتی دلءِ درستیں گپاں جناں کہ ما چتو وتی زندگیءَ گوازین ایں ۔۔۔ چی کنیں چے نہ کنیں۔۔۔ بلئے وھدے کہ آ اتک آئیءَ منا سلامے ھم نہ دات ءُ شت  ءُ  تھت ءِ سرا دراج بیت۔۔۔ من گوشت بلکیں کیت منی سریگ ءَ لیٹینیت گوں منا وش وشیں گپ جنت بلئے ناں آئیءَ منی دلءِ توامیں واھشتاں آس پریتک۔۔۔

ھمے وشیانی ودارءَ من واب کپتاں۔۔منی چم اوں ارس ات آں۔

وھدے شپ نیمء کہ من گران واب اتاں اتک ءُ منا لگتے جت اش۔۔۔ 'پادا وتا وڑ ءُ گیگ کن' چو جانورانی پیمءَ منا گرءُ چیل کت ئے۔۔۔منی ھچ تکلیف آئیءَ نہ چار اِت۔ منی بدن ٹکر ٹکر ات بلے آ ظالمءَ ھچ ھبرءِ ھیال نیست ات۔۔۔

ھما شپءَ چے من زانت کہ منا مات ءُ پتاں یک جانورےءِ دستہ داتگ۔ نی من بزاناں منی کسمت۔۔۔گڑا اے مردءِ کار بیتہ منا وتی بسترءِ بھت کتگ آئیءَ۔ نہ منی تکلیف چار اِتگ انت نہ بزگی۔۔۔ھر شپ ھمے وڑا گوزان ات۔۔۔

 دل بند بیتہ کہ من ءُ مردین ھوریءَ نندیں ورگ وریں دیوان کنیں بلئے اے درو واب ءُ ھیال بیتگاں۔۔۔یک روچے ھم اشییءَ نہ گوشتگ کہ بیا گوں منا ھور ورگ ور۔۔۔نہ کدی منی کشءَ نشتگ ءُ گوں منا دیوان کتگ۔۔

اشی ءَ منی ڈنءِ ترگ ھم بند کتگ ات ، نہ سیاد ءُ وارثانی لوگءَ اشتگ اِش نہ دگے بازارےءِ روگءَ اجازت بیتگ۔۔۔ اگاں کدی کدی منا ناکوزتکیءَ ڈک داتگ من وش اتک ءُ جوڑی ئے کتگ گڑا آ روچءَ منا گوں زایاں بار داتگ اِش۔۔۔ 'چل پت۔۔رنڈی۔۔کہبگ'۔۔اے درو منی نام بیتگاں کہ پہ منا منی مجازی ھدایا بستگاں۔۔لہتیں گپ و گوشگ ھم  نہ بیت۔۔آیاں نہ زبان زرت کنت نہ دپ کشت کنت۔۔۔

برے برے  دلءَ گوشتگ کہ اے لوگءَ یلدئے برو پہ وتءُ دیم ، ھمودا کہ اشیءِ نام ءُ توار ھم مہ بیت۔۔بلے چے بکنیں ھزار درد ھزار گم ہر کجا کہ بریں ھمراہاں۔۔۔اگاں سونءَ بگراں ءُ مات ءُ پتانی لوگءَ بہ ننداں گڑا اے دنیا بزگیں مات ء پتاں ترگءَ نیلیت تئی جنکءَ وتی سون گپتگاں ۔۔زاناں دگے مردے چماں کتگے۔۔یا دگے عاشقےءَ بڈ اِتگ۔۔وڑ وڑیں بہتان بنداں۔۔

گوں بہتءَ جنگ نہ بیت ۔۔بلکیں جنین آدمءَ و بہت نیست ، اے بیچارگ دگرے بہتءِ سرا وتی زندگیءَ گوازینگیں۔۔داں برو بہ مریت۔۔انچش کہ آئیءَ وتی نامءَ لوگ نیست۔۔یا مات ءُ پتانی لوگء کپتگ یا مردے لوگءَــجنینءِ نامءَ کس لوگے ھم نہ کنت۔۔۔

کس آئیءِ درداں نہ زانت ۔۔آ ھرچ ھبرءَ میاریگ انت۔ھرچی کہ پہ آئیءَ مجازی ھدا لوٹیت ھما وڑ آئیءَ کنگی ایں۔۔

ھؤ برے برے منا ماتءَ جست کتگ منی چک تئی مرد  گوں تو چونیں؟ من چی بگوشتیں۔۔ھچ گشت نہ کتگ بس چم ارساں پر بیتگاں۔۔دل ھالیگ بیتگ۔۔بلے وتی گم نہ ماتءَ گوشت کت نہ آریپیں پتا۔۔من چے بگوشاں وتی مرد باروا۔۔۔چشیں گم نہ بیتگ کہ منا نہ داتگ اِش۔۔چشیں وشی یے نہ بیتگ کہ چہ من پچ نہ گپتگ اِش۔۔ھو۔۔بس من مردگ مردگ ءَ گشتگ شریں۔۔وھد گوازگیں۔۔

آسمانءِ ھدایا ھم منا چک نہ داتگ۔۔ اے ھبرا ھم دل سک وشیں کہ چک پرچا گوں منا بزگ بباں۔۔جنین ءِ عجیبیں زندگی یے سجیں زندگیءَ مردءِ ھذمتءَ بکاں۔۔۔ہر وڑیں گلامی بکاں۔۔ بلے عزت نیست ۔۔بیت کنت لہتیں جنینءِ زندگی وش گوازگیں۔۔ھما جنیں آدم ءِ زندگی وش گوزیت کہ مرد آئیءَ وتی جنین بے سمجیت نہ کہ وتی مولد۔۔۔

گوں برزءِ ھدایا ھمے دعایا لوٹاں کہ منی وڑیں بہتءَ ھچ جنیں آدمءَ مہ دئے۔۔۔۔