سر جھل ءَ ءُ لاپ بُرز ءَ
جاوید بلوچ @JavedGwadari
یک اکسے۔ اکسءِ تہا لاگر ءُ گُژنگیں مردے بندی جاہےءَ بندیگ انت۔ بندیگ جاہءِ جالیاں چہ ڈن یک نانے کپتگ ءُ بندیگ جاہءِ کلیت(چابی) ھم۔ بندیگ نانءِ نیمءَ دستءَ شھارگءَ انت بلئے کلیتانی نیمءَ اناں۔
امیت انت کہ اے اکس گیشتر مردماں دیستگ۔ شُد ءُ گُژنگیں راج ءُ مردمانی بابتءَ بازیں کسہ ءُ گپ ھم ھست انت۔ کمیونزم ءُ سوشلزمءِ منوکانی نبشتانک ءُ گُشتن ھم بلئے ھمے کسہءَ اگاں راستیءَ چارگ لوٹ ئے گڑا وتی نزیکءَ بچار۔۔۔۔
گوستگیں روچاں پاکستانءِ نامی ایں لئیبی شاہد خان آفریدی وتی کمکی گلءِ نیمءَ چہ گوادرءَ راشن بھر کنگءَ اتکگ ات۔ رمضانءَ گیشتر مردم زکات ءُ ھئیرات کن انت کہ اے نیکیانی ماہ انت بلئے درد ھما وھدءَ بیت کہ وھدے تؤ گندئے کہ سرجمیں ملک ءُ جہانءَ گوادر نامان انت۔ ادءِ دیمرئی ءُ کاراں میڈیا جکسینتگ بلئے شھرءِ مزنیں کساسےءَ مات ءُ گوہا، زالبول ءُ کماش پِرتکگاں پہ باچکائے آرت ءُ ڈبوکے روگنءَ۔۔۔۔
شست ءُ دو اربءِ سی پیکءِ وارس چہ شُد ءُ گُژن یکے دومیءِ چکءَ کپگءَ آں۔۔۔۔ ءُ ھمے اکس سوشل میڈیا ءَ شنگ انت۔ ھؤ چیا کہ مئے لاپ چہ مئے اگلءُ ھوش ءُ سرءَ چہ بُرزترءَ انت ءُ اے لاپءِ اودءَ سرکنگءَ پہ مزنیں زرے ھرچ کنگ بوتگ، منسوبہ سازی کنگ بوتگ تاکہ کلیتاں پیسر چم نانءَ بہ گند آں۔ ھستیں مزنیں منسوبہانی تہا جاہ منند وتی ھک، روزگار ءُ شریکی ءِ جاگہءَ پنڈوک جوڑ بہ بنت۔
گوادرءِ وڑیں شھرےءَ پہ آپ ءُ لینءَ زہرشانی کنگءِ اکساں ءُ ھالاں تؤ ملکی میڈیاءَ دات نہ کن ئے کہ چہ اشییءَ بنامی بیت، وانگءُ جان سلامتیءِ نیستیں آسراتیانی سرا تؤ گپ کُت نہ کن ئے کہ چہ اشییءَ یک ھرابیں دیمے پدر بیت بلئے تؤ پنڈگءُ ھئیراتءِ کاراں ناں ایوک وت بھرزور ئے بلکیں اکس ھم کش ئے ءُ ھما اکساں وت شنگ ھم کن ئے ءُ دگہ اکس گراں ھاس لوٹائن ئے ھم۔ چیاکہ ادا ھمے ربیت ءُ کلچر لس مہلوکءِ تہا عام کنگی انت کہ پنڈگءُ ھئیراتءِ زیرگءَ ھچ ھرابی مان نیست۔ اے یک کمکے۔۔۔۔
بلئے ھمے کمک ھندی لئیبیاں پہ ملکءِ مزنیں ٹیمءَ لئیب دارگءِ ھاترءَ دئیگ نہ بیت کہ آ مستریں کارے۔ گوادرءَ بلکیں سرجمیں بلوچستانءَ لاپانی سرا یک مزنیں سندےءَ کار بوئگءَ انت ءُ اے کارءَ ھلار کنگءِ ھاترا سوشل میڈیاءِ سرجمءَ کمک زورگ بوھگءَ انت۔ پرایشیءِ ھاترءَ وتساچیں ٹولی، ادارگ، گل ءُ ایکٹویسٹانی سرا مزنیں سندےءَ کار بوھگءَ انت کہ آ اسل جیڑہانی چیر ترینگءَ پہ آہانی کشءَ دگہ پنڈگءُ ھئیراتی، کمکی، چاگردی ءُ دگہ انچیں وتساچیں کار کنگ بہ بیت کہ چہ اشاں پدا لاپ بُستر ءُ سر جھل تر بہ بیت۔
یک رندے شالءَ شاہ دربرجاہءَ یک مراگشے جم دارگ بوتگ ات ءُ مراگشءِ سرھال سی پیک ءُ ورناہانی کرد ءِ وڑیں نامے ات۔ ھال پُر ات۔ ملکءِ مزن نامی ایں سیاسی، سرکاری ءُ زانتکاریں نام تلوءِ سرا نندوک اتاں۔۔۔۔ آہاں وتی گپ جت انت ءُ گُڈسرا جُست ءُ پسوہانی بھر بوت۔ اے بھرءَ ھمے کہ جُست اتاں ءُ جُست کنوک اتاں پکہ ءُ رژنائیں رنگےءَ پدر بوت کہ جُست پیسرءَ دئیگ بوتگ انت ءُ مائک ھم ھماہانی نیمءَ شُت کہ آہانی جُست ھمے راہبندانی ردءَ اتاں۔ بازیں گون کپتگیں سنگتےءَ دست چست کُتاں پہ جُستءَ بلئے مائک نئیتک داں لہتیں سنگتاں زہر کُت ءُ پاداتکاں۔۔۔۔
ھمے وڑ یک رندے گوادرءَ، گوادرءِ یک نامی ایں وتی منّاں سیاسی ءُ چاگردی سروکے ءَ یک پکنکے داتگ ات کہ اودءَ من گون کپتگ اتاں۔ ورگ ءُ چرگ بوت ءُ ھلاس بوت گڑا مائکے لوٹائینگ بوت ءُ اسپیکرے آرگ بوت۔ ھمے گُشگ بوت کہ نوں گوادرءِ جیڑہانی سرا گپ ءُ تران بیت ءُ واجہ آہانی پسوہاں دنت۔ گڑا یک یکءَ جُست کنوک پاد اتکاں ءُ ھمے جُست کنوکانی تہا پیرینانی ھمرائیءَ نودربر سیاستءِ کامریڈ، شھرءِ اھوالکار ءُ دریاوردانی سروک ءُ دگہ بازین ئے گون ات گوں، وھدے جُستءَ لگ اتاں انچو سما بیت کوہنیں پیگمبری دہرءِ تامرے پِر انت ءُ فرعون بادشاہءِ دیوان انت کہ ھرکس پاد کئیت بندات گوں درود ءُ سلامءَ کنت "سلامتی واجہ پہ ترا ءُ تئی گوستگین ءُ آؤکیناں" گڑا پدا توسیپ ءُ ستہانی پُل ءُ ھؤر رچگ بندات بوت۔۔۔۔۔ اے میانءَ گوادرءِ بزگیں دریاوردانی چہل، پنجا سالی بزگی، بے آپی، بے وانگی، بے آسراتی، بے روزگاری ءِ جنجال انچو گار بوت انت کہ نہ گُش ئے گوادرءِ گپ بوھگءَ ات گُش ئے زاناں مغل شاہی دربارءَ بادشاہءِ ورگانی ھرچ دئیگ بوھگءَ ات۔ بزاں واجہءِ دربار واجہءِ ورگ گڑاں واجہءِ "نمک ھلاری" ءُ بس۔
ھمے جاوراں گندئے گڑا زانگ بیت کہ سر اگاں بُرزءَ بیت گڑا جُست کنت، جیڑ ایت، گندیت بلئے لاپ بزگ ایوک ورگ لوٹیت ءُ داں توکءِ ورگ ہضم مہ بنت نہ گُریت۔۔۔ لاپءَ چے کار گوں جیڑگءُ جُست کنگءَ۔۔۔۔ پمیشکہ گندگءَ کئیت کہ لاپانی تعمیر ءُ تکمیلءَ نا ایوک شریں چاگردے سازگ بوتگ بلکیں پہ آئیءَ کمک ھم رسیت۔ لاپ وھدے سکاں ھالیگ بہ بیت گڑا آ بنداتءَ نان پٹیت اگاں آئیءَ نان کم کمءَ رست وَ ترھیت ءُ ھچ نہ گُشیت بلئے ھردیں ھلاؤش ءُ گُرسءَ گپت گڑا جناور جوڑ بیت۔۔۔ ءُ آ وھدءِ نوبت نئیت چیاکہ ھئیراتی، چاگردی ءُ کمکی ادارگ ھست انت۔
No comments:
Post a Comment