یک سرھالے ءِ سرا چون نبشتہ کنگ بیت؟
ھال کاری، اھوالکاری یا نبشتہ کاری کساس یک وڑیں لبزاں کہ اشانی سیادی گوں نبشتہ کنگ ءَ انت بلے ھؤ ھر یکےءِ تک جُتا انت۔ بزانکہ لبزانکی نبشتانک ءُ اھوالکاری نبشتانک یک و نہ بنت چیاکہ ھردوئینانی وتی راہ بند ھست انت۔ بلے ھالکاری ءِ سیادی گوں درستیں پڑاں وڑے ناں وڑےءَ الم ھست۔ پمیشکہ کجام ھم یک سرھال یا بُن گپےءِ سرءَ ھال نبشتہ کاریءِ بُنکی راہبند زورگ بیت کنت۔
اھوالکاریءِ تہا وانینگ بیت کہ ھر ھما بُن گپ کہ ھمروچی ایں چِست ءُ ایراں چہ جُتا بہ بیت آ یک ھالے ءُ ھر ھال یک نوکیں سرپدی ے۔ بلے ھر سرپدی ھالے نہ بیت۔ ءُ پہ ھالءَ گیشتر ھمے درور دئیگ بیت کہ اگاں کُچکے مردمےءَ بہ وارت اے ھالے نہ انت بلے اگاں مردمے کُچکےءَ گٹ بہ پاچیت اے یک ھالے۔ اے درور ھمے بُرزءِ داتگیں درورءِ رندپدیءَ کنت کہ ھر بُن گپ ءُ سرھال کہ ھمروچی ایں چست ءُ ایراں جُتا بہ بیت۔ ھالے گُشگ بیت۔
ھالءِ شوہاز کنگءَ پہ یک راہبندے کارمرز کنگ بیت کہ آئیءَ پنچ ڈبلیو ءُ یک ایچ ے (5Ws and 1H) گُش انت۔ اے پنچ ڈبلیو اسلءَ انگریزیءِ آب ڈبلیو ءَ چہ بندات بوتگیں پنچ جُستاں۔ بزاں کہ
What?
where?
when?
who?
why?
ءُ ھمے وڑءَ یک ایچ چہ ایچءَ بندات بوتگیں جُست How? انت۔ بزانکہ کہ اھوالکار وتی ھالءِ شوہاز کنگ ءُ سرجم کنگ ءِ ھاترءَ ھمے جُستانی پسوہاں شوہاز کنت ءُ پٹیت۔ اگاں آئیءَ اے جُستانی پسو رست انت گڑا آئیءِ ھال سرجم ایں ھالے۔
اھوالکار وتی سرھال ءِ درجنگءِ ھاترءَ ھمے ششیں بُنکی جُستانی پسوہاں درجنت۔ کہ چے؟ چون؟ کجا؟ کدی؟ کئی؟ ءُ چیا؟ اگاں اے جُستانی پسو دسکپت انت گڑا بس ھال یک سرجمیں ءُ پکائیں ھالے گُشگ بیت۔ ھما اھوالکار یک راستیں ءُ جوانیں اھوالکارے زانگ بیت ءُ ادارگ ھم شرپدار زانگ بیت۔
اے ششیں جُست ایوک ھالءِ پَٹگ ءُ شوہاز کنگءِ ھاترءَ گوں اھوالکاریءَ بندوک نہ انت بلکیں چونائیں نبشتانک، سرھال، پٹ ءُ پولکاریءَ پہ بُنکی راھبندے کہ نبشتہ کارءَ باز آسراتی دنت۔
کسے ھم یک سرھالےءِ سرءَ چیزے نبشتہ کنگ لوٹیت گڑا یک برے وتی سرھال یا بُن گپءَ شریءِ سرا وت بزانت۔ پدا آئی ءِ شوہازءَ در بہ کپیت کہ آ چے گُشگ لوٹگءَ انت۔ کئے انت آئیءِ سرھال یا چے انت؟ چون آئیءَ گیشین ایت؟ کجا انت؟ کدیگین انت؟ ءُ پرچا یا چیا آ چُش انت؟
اگاں اے بُنکی ششیں جُستانی پسوہانی درگیجگءَ نبشتہ کار سوبمند بوت آ شریں ھالکار، پولکار ءُ نبشتہ کارے بوت کنت ءُ وتی گچین کُتگیں سرھالءِ بابتءَ دربُرتگیں الم ءُ زانتاں وتی وانوکاں سر کُت کنت ءُ اے دہرءَ یک شوکیں بلاگرے بوت کنت یا فری لانس نبشتہ کارے ھم بوت کنت۔۔۔۔
ءُ یک شریں نبشتہ کارےءَ پہ شریں وانوکے بوھگ ھم سک المی انت۔ ایوک اے واستہ اناں کہ آ وانیت آئیءِ زانت گیش بیت ءُ گیشتر سرپد بیت بلکیں اے ھاترءَ ھم کہ آ وتی نبشتانکءَ نبشتہ کنگءَ رند کم چہ کم دو برءَ وت بہ وانیت تاکہ ھر وڑیں ردیاں چہ پاک بہ بیت۔
No comments:
Post a Comment