احسان دانش گریبے نہ انت۔ ہیروے
جاوید بلوچ
احسان دانش یا اے وھدءَ بلوچ زھگ ءُ زالبولانی دپءَ نامداریں کارست ماسی دلیان یک بلوچ ازمکارے۔ یک بلوچے ءُ بلوچستانءَ جاہمنند انت۔ بلوچستان دگنیاءِ گریب تریں دمگاں یکے۔ ادا پدمنتگی، بے روزگاری ءُ بے ایمنی انت۔ اڑ ءُ جنجال سک باز انت بلئے آہانی توجیل سازی نیستی ءِ بروبر انت۔ ادا گُشگ بیت وانندئیں مردمانی کساس ایوک 44 درسد انت(بلوچستان ایکسپریس ءِ نبشتانکے ءِ ردءَ) ءُ آ ھم ھما کہ ایوک امینچو ونتگ اِش کہ کمو اردو وانگ ءُ وتی لَنکُکءِ جنگءِ جاگہءَ دزنشانے جت کن انت۔ بلوچستانءِ ھر ضلعءُ شھرءَ ہائیرایجوکیشنءَ سر بوتگیں نودربر ءُ ورناہ لنکُکانی سرا ھساب بنت بلئے پدا اوں ھمے نودربرانی مستریں کساس ماسٹر کنگءَ پد ھم بے روزگار انت۔
بلوچستان یک گنجیں زِرےءِ واھند انت کہ ادءِ جاہمنند باریں داں چنچو پُشت چہ زِرءَ لاپ گِرگ ءُ ورگءَ بیتگ انت بلئے نی وتی یدار ءُ ماھوراں زیر انت زِرءَ رواں بلئے پدا ھُشکیں دستاں کاینت۔
بیروزگاری ءُ بے آسراتی ءُ بزگی بلوچستانءِ پجار جوڑ بوتگ انت بلئے انگت ھم ادا ورنا وانگءَ آں۔ وتی ماتی زبانءَ نبشتہ کنگءَ آں۔ ازمکاری کنگءَ آں ءُ دیمءَ جُنزان انت۔
سوشل میڈیاءَ یک اکسے وائرل انت ءُ یک ویڈیوے۔ ءُ ھرکسءَ پہ وتی دانشوریءَ گوں یک کیپشنے داتگ ءُ شنگ بوہان انت۔ گیشتر نبشتگیں لبزانی تہا گریبی، بزگی ءُ یک سرکاری نوکری یے دئیگءِ لوٹ بوھگءَ انت۔ ءُ پدا اے اکس کئیگ انت؟ ھستیں وھدءَ بلوچی ازم ءِ پڑءَ نامداریں ازمکار، بلوچی یوٹیوبءِ تہءَ نامدارتریں سیریز ماسی دلیانءِ مستریں کارست واجہ احسان دانش ئیگ انت۔ اھسان یک بلوچ ازمکارے ءُ بلوچی ازمءِ دگنیاءَ اے وھدءَ گیشتر نامدار تریں سیریز ماسی دلیانءِ کارستءَ کنوک انت کہ 35 ہزارءِ کدّءَ سبسکرائبر آئیءَ ھست۔ اے سیریز اپلوڈ بوئگءِ یک کلاکےءِ تہءَ چار، پنچ ہزار ویوز گپت۔ لوگانی تہءَ زالبول ءُ زھگ ھمک ہپتگ پہ اشییءَ ودار کن انت۔ اے سیریز بلوچی کامیڈی دگنیاءِ "دی کپل شرما شو" انت۔
بلئے مئے تہءَ لہتیں سادہ ءُ لہتیں موقع پرستیں چالاکاں ھمے کارست، اھسان دانشءِ یک اکسے انچو وائرل کُتگ کہ آئیءِ تہءَ گریبیءَ ابید دگہ ھچ نیست۔ اے اکسے وائرل کنگءِ ھمرائیءَ لوٹ چے انت۔۔۔ ھمے کہ یک واجہ کارے اھسان دانشءَ یک چپراسی یا نائب کاسدیءِ نوکری یے بہ دنت ءُ اے آجوئیں پگرےءِ واھندیں ازمکار پہ پانزدہ یا بیست ہزار کلدارءِ پگارے ءُ ہشت کلاک ڈیوٹی دئیگءَ یک واجہ کارےءِ وازمند ءُ احسانانی چیرءَ بہ بیت؟
زاناں ھمے واجہ کارءَ ترا وانگ ءُ زانگءِ آسراتی داتگ؟ تئی زالبول ھمک روچ دگّانی سرا پہ پِٹے آپءَ ٹائر بُن دئینت، آپ رَستگ؟ ورنا نشاءِ آماچ انت۔ جنین، چُک مات بوھگءِ وھدءَ کراچیءِ راہءِ نیمءَ مِر انت۔ زندءِ بُنکی آسراتی نیست انت۔ آ رستگ انت کہ اھسان ءَ یک نوکریگیءِ رسگءَ آئیءِ زند وشھال بیت۔
اھسان بلوچ ازم کارے ءُ اشیءِ ھمرائیءَ یک پِتے، مردینے ءُ مھنت ءُ کارکنوکیں ورنا یے۔ آ ازمکاری ھم کنگءَ انت ءُ کار ھم کنگءَ انت۔ انچیں کارے کنگءَ انت کہ کسی منتے پر نیست۔ وتی چُکاں وت گوں وتی مھنتءَ لاپ دئیگءَ انت ءُ منءَ ءُ ترا گوں وتی ماتی زبانءَ وشنود ھم کنگءَ انت۔ چدءُ وشتریں وش بھتی کجام بیت؟
اگاں منی ءُ تئی ھمے اکسءِ شنگ کنگءَ چہ یک واجہ کارے یا سرکاری ادارگےءِ سروکے اھسانءَ بہ لوٹائینیت یک کسانوکیں نوکری یے بہ دنت، ہشت کلاک ڈیوٹی بہ گپت گڑا اے ازمکار وتی ازمءَ برجا داریت یا وتی ڈیوٹیءَ روت ءُ وتی رزقءَ ھلار کنت؟ ءُ پدا داں زند ھمے مارشتءِ سائگءَ بہ بیت کہ شھرءِ پِلاں واجہءَ دو وھدءِ لہتیں روچاں راشن دات، کمو زر یا یک نوکری یے۔ اھسان ءِ دست ءُ پاد سلامت انت آ کارءَ انت۔ ھما جاگہءَ کہ یک درکومیں درآمدےءِ ریڑی انت ھمائیءِ کشءَ اھسان نِشتگ۔ جنتءِ بازارءَ رؤکیں ھر بلوچ زالبول کہ ماسی دلیانءَ زانت ھمدا روت چیز گپت۔ میتگءِ زھگ ھمدءَ رواں چپس گِر انت ءُ اے کار باریں دگہ چنچو ورناہاں ھمے سکینءَ دنت کہ چون وتی اندرءِ مردم زندگ دارگ بیت ءُ ھلاریں کار کنگ بیت۔
ھمے شھرءَ چنچو اے وڑیں مردم درکئیت کہ اھوالکاریءِ نامءِ سرا یک ءُ دو واجہ کارءِ زر زُرتگیں گلام انت۔ اھسان ھم انچش بہ بیت؟ چنچو اے وڑیں نودربرانی نامءِ سرا سیاست کنوک ھست کہ آہانی کار سوشل میڈیا ءَ نالائکیں مردمانی توسیپ کنگءُ پہ آہاں کار کنگ انت؟ یک بلوچ ازمکارے ھم انچُش بہ بیت؟ چنچو اے وڑیں ایکٹویسٹ ءُ چاگردی ءُ لبزانکی کارانی کارندہءِ نامءِ سرا بلیک میلر ھست کہ آہانی کار ٹولیانی تہءَ مردماں بھر کنگءُ ذاتی نپ ءُ سیت کشگ انت۔ یک بلوچ ورنائیں مھنت کشیں ازمکارے ھم انچش بہ بیت؟
اھسانءِ زند پہ زیبائی، مھنت ءُ کار گوزگءَ انت بلئے اگاں لوٹ اِت کہ ادا ازم دیمرئی بکنت ءُ ازمکار گوں ازمءَ بندوک بہ بیت گڑا پہ آئیءَ ازم وانگءِ ادارگ، یونیورسٹی ءُ اکیڈمیانی لوٹ بکن چیاکہ ھر ازمکارءِ تہءَ اھسانءِ کدّءَ اوپار، مھنت کشیءِ تھمبل مان نیست گڑا آ ادارگانی تہءَ بہ رُودایت ءُ دَر بئیت۔ گوادرءَ پہ ازمکاراں چے ھست؟ یک ریڈیو پاکستانے کہ پنچ سال بیت آئیءَ وتءَ یک جنریٹرے نامءَ نیست۔ دو سے اکیڈمی کہ ادا اوں جاگیرداری ءِ نظام جوڑ بوتگ ءُ پدا ھم پہ بزگی زندگ انت۔
اھسانءِ اکسءِ تہءَ ھچ بزگی ءُ گریبی درا بوھگءَ نہ انت بلئے ھؤ مھنت، کار ءُ یک شوکیں بلوچ ہیرو ءِ زائر انت۔ گریبی اسلءَ مئے لاپانی ھمرائیءَ اگلءُ ھوشءِ تہءَ انت کہ ھچ وڑءَ در نہ ات۔ گریب و بے روزگار بیت۔ یک شوکیں ازمکارے کہ ھم ہپتگ مارا وشنود کنگءَ انت پدا وت کار ءَ انت چون بے روزگار بیت۔
No comments:
Post a Comment