من جیڑ اتگ ۔۔۔۔ گوادر ءِ توار

 من جیڑ اتگ ۔۔۔۔

                                                           باسط بلوچ

من جیڑ اتگ۔۔۔۔۔ ترا نہ جیڑ اتگ ، تو و جیڑہ ئے نہ ئے بلے منءَ برے برے سما کپیت کہ تو جیڑ ئے ، من پہ اے نابود ایں مرد ءَ جیڑہ ئے آں ۔۔۔ تئی ھمے  وت سریں جیڑگ ترا لزتے و بکشائیت بلے اشی یے تہا آ کیپ مان نہ بیت ،،، چش کہ من ترا بہ جیڑ اتیں ءُ پدا تو ۔۔

بلے گپے زان ئے ۔۔۔ ترا اوں میار نیست ۔۔۔۔

من ھردیں کہ وتئی سنگتانی دیوان ءَ ننداں تاں اے دراہ انچیں جیڑہانی شکار انت ۔ آوانی جیڑہ ھم گوں یک مردمے ءَ بندوک انت ۔ آ چہ اے جیڑہ ءَ دیم جیڑ ات  نہ کنگ ءَ آں ۔ من جیڑاں کہ آہاں جیڑگ شمشتگ ءُ نی ھمے گپءِ بن داشتگ اش کہ ھمے جیڑہ ٹوہیں جیڑہ ئے ۔۔۔۔

من آواں چنچو سرپد کناں کہ جیڑہ دگے مچ انت اے جیڑہ ئے نہ انت کہ شما داں انی جیڑ اتگ ۔۔۔۔

بلے اے سنگت ھم ملامت نیاں ۔ مئے چاگرد ءَ را وتئی جیڑگے سلاہ دور داتگ آں ۔ ءُ اے دراہ چہ ھمے چاگرد ءَ چہ سبک زورگ انت ۔ اگاں چاگرد ءَ بہ جیڑ اتیں ءُ اے جیڑہ ءَ را کمار کرتیں تاں مرچی ما چوش نہ جیڑ اِت ۔۔۔

ھئو!! ترا اوں پمشکہ میار نیست کہ تو اوں ھمے چاگرد ءِ بہر ئے ۔ تو اوں انچیں جیڑہ ئے یے آماچ ئے ءُ تو اوں وتئی ھمراہاں گوں  ھوار بہ ئے تاں آوانی جیڑہ ھم بس ھمیش انت ۔ آ اوں چہ ھمے جیڑہ ءَ  برزتر جیڑ ات کنگ ءَ نہ آں ۔۔۔۔۔

منی سنگتانی ءُ تئی ھمراہانی نیام ءَ بس یک جیڑہ ئے اِش اِنت کہ تو گوں ھمراہاں ھوار جیڑگ بے ھال کتگ ءُ اے نیمگ ءَ سنگتانی تہا یکے تنی وھدی ھم جیڑگ ءَ انت ۔ ءُ باندہ  بگندئے وتی ھمراہاں ھم جیڑگ بہ پرمائیت کہ جیڑہ دگے باز انت ، تو و جیڑہ ئے نہ ئے ۔۔۔

ھاں!! البتہ یک موسمے من جیڑ اتگ ات کہ تو چی ءَ جیڑگءَ بہ بے ؟؟ ۔۔۔۔ ءُ ھمے جیڑگ ءِ تہا سما کپت کہ ترا چہ مستریں جیڑہ ھست ۔ تو و جیڑہ ئے نہ ئے ۔۔۔۔

زندگی چو یک شل ءَ رؤکیں کاروانے ، من ترا بہ جیڑ اتیں اوں زندگی ھمے داب ءَ جنز اتگ ات ءُ ھمے مہ جیڑ اتیں ھم ۔۔۔۔ 

نی ھمیش انت زند ءِ پد رنداں گوناں ءُ جیڑگاہاں۔۔۔۔۔۔

بلے اے گپ پہ تو ھژدری انت کہ تو بزان ئے کہ تو جیڑہ ئے نہ ئے ، جیڑہ دگے باز انت ۔۔۔۔۔