بلیک اینڈ وائیٹ کنورسیشن۔ گوادر ءِ توار

 بلیک اینڈ وائیٹ کنورسیشن

شیرجان شوہاز                                 

@SheraanRind

"کِسہاں رنگ نیست۔ کدی کدی کِسہ بے زبان اوں باں۔ کدی کدی رنگی ئیں کِسہ اوں 'بلیک اینڈ وائیٹ' گندگ کائینت۔ بلے۔۔۔

گُڑا لھتے 'بلیک اینڈ وائیٹ' کِسہ پرچا سبز، شِنز، سُھر، زَرد بزاں رنگی ئیں رولہ ماںپوشاں؟"

اے دُرست آئیءَ اشتاپ اشتاپی ھما اولی گندوکیءَ گُشت آں بلے آ دمانءَ آئیءَ اے ھبرءِ زانت ھچ نیست اَت کے دیمے نشتگیں ریشی ئیں ورناءَ نویشتانک ئے کیسگءَ اِنت ءُ آئیءِ سرھالءِ جاہءَ سیائیچکاں گوں نَکش اِتگیں نالوکی اسکیچ ئے ءُ تیوگیں نبشتانکءَ بیدے ابیتکیءَ ھچ نبشتہ نہ اِنت۔ آئیءَ اے اوں سما نیستءَ کے دیمے بَچکءَ تہاری دوست بیت، ابیتکی، ھاموشی، سیاہ چاہ، سائیں پُچّ  ءُ ساھگ سک دوست بیت۔ آ دلمانگ اَت کے رنگانی لبزانکءَ بَچک آئیءِ دستءَ بہ گیپت ءُ آئیءَ رنگانی استیءِ ارزشتءَ بُہ گُشیت۔ آئی چم سک شوق اِتاں، آئیءِ چمانی رنگ گُش ئے گوادرءِ زِرءَ سبز اَت۔ آئیءَ وتی چپیں بُروانءِ سرا مُدام چہ لوگءَ دَراھگءَ پیسر وتی زُلفے کَش اِت ءُ لونجان کُت۔ کدی کدی آ سک تَنگ اَت پرچا کے وھدے آ لوگءِ نیمگءَ واتریءَ بے وھد کپت گُڈا آئیءِ گامانی گُشادیءَ آئیءِ زُلف کدی آئیءِ چمانی کونسءَ لتاراں بیت ءُ کدی آئیءِ رنگی ئیں چمءَ لَگ اِت۔ بلے آئیءَ اے ازابیءَ چے گیشتر وتی تب ءُ ھُب توامءُ تَونگر گندگ اتک۔

آ ودارءَ اَت کے وتی پَسّوءَ بِہ گیپت۔

بلے

بلے

ندارگ 'بلیک اینڈ وائیٹ' اِتاں۔

آ دوئیں سیائیں ٹیبلےءِ سرا نشتگ اِتاں ءُ آئیءِ دیما آئیءِ گِلہانی 'نوٹ بُک' ایر اَت۔ دو نیم کوپ چاہءُ جَگے آپ ایر اَت۔ پَنکاہ بند اَت۔ بلکیں اوں لئین نیست اَت۔

بَچکءَ کمو وتی راستیں نیمگ ءِ ریش کِچینتاں ءُ وتی عینک دیمءِ ایریں ھالیگیں گلاسءِ کشءَ ایر کُت ءُ تہنا گُشت، 

" رنگ چی ئے؟"

چَرے جُستءَ بگندئے آئیءِ ھیال تکانسری ءُ پرشتءُ پروشیءِ آماچ بیتاں بلے آئیءَ اے ھبرءِ اپسوس سک بئیگءَ اَت کے آئیءِ جُست پرچا اے وڈ بے رنگ گندگ بوتءُ پَسوءَ رنگ مان نیست اَت۔

بَچکءَ پدا اشتاپ اشتاپءَ کاگدے وتی کَشءِ کیسگءَ چہ کش اِت ءُ آئیءِ ایریں سیائیں 'نوٹ بُک' ءِ چیرا ایر کُت ءُ بچکءَ چاہءِ زَر اوں نہ دات آں ءُ دراتک۔

آئیءَ وھدے اے کاگد پچ کُت چار اِت۔ کاگدا ھچ مان نیست اَت بیدے سیائیچکاں گوں نَکش اِتگیں چندے لبز:

'رنگ'

'ھولی'

گُشان' 

'چَگرد پُل'

موزاتیگ'

ءُ پدا یک اسکیچ ئے آئیءِ جند ئیگ اَت بلے اگں کَسےءَ آ نہ دیستگ اَت گُڑا کسءَ نہ زانت کے آئیءِ اسکیچ اِنت۔

اسکیچءَ آئیءَ گُد گورا نہ اَت ءُ  نمدی ئے دستءَ اَت ءُ آ یک پادءَ اوشتاتگ اَت۔

۔

۔

آئیءَ بلائیں ساھے بالاں کُت چہ اودا پاد اَتک۔ آئیءَ اے رنج ھچ نیستگ اَت کے بچکءَ چاہانی زَرّ پرچا نہ دات آں۔

آئیءَ اسکیچ ءُ سیائیچکاں گوں نبشتگیں لبز ھمودا ٹیبلءِ سرا دور دات آں ءُ اشتاپ اشتاپءَ دیم پہ لوگءَ راہ گِپت۔

آ اشتاپی اَت بلے آئیءِ زُلف اے رندءَ چمءِ کونسءُ چمءَ نہ لگ اِت۔ آئیءِ زُلف نہ سُر اِت۔