فائیو جی نٹ ورکءِ سرا ترانے

 فائیو جی، نٹ ورکءِ سرا ترانے

 سجاد اسد

من ھردیں کہ بیگاہانی وھدءَ ھوٹل ءَ پہ چاہ ءِ ورگءَ شُتاں گڈاں الّم سنگتے یا دِگہ انَچیں مردمے ءَ گوں منی دیوان بوت، من لوٹ اِت کہ آھاں چہ سرپدی بہ زور آں ءُ ہرچیزے کہ وت زاناں، آھاں درشان بکناں. 

مروچی کہ من ھوٹل ءَ گوں سنگتاں نِشتگ اِتاں گُڈاں آ گپ ءَ اِتنت کہ دُنیا زانت، سرپدی، نوکیں تکنیک ءُ ٹیکنالوجی ءَ گوں بے کساس دیمءَ روان اِنت. مُدام ما رسانک دَراں سئیل کن ایں کہ ٹیکنالوجی چِنکس دیمروئ کنگ ءَ اِنت. بنی آدم ءِ ہما کُلیں کار، کاگد ءُ نِمدی، گپ ءُ ھالاں کہ ماہانی ماہ پُجارینگ ءَ لگ اِتگ نوں سیکنڈ ءُ مِنٹانی تہا سرجم بَنت۔

 ہمے سنگتّاں 5G ءِ بابت ءَ وت ماں وتءَ گپ ءُ تْران(مکالمہ) کنگ پدا بُنگیج کُت.

"حمل! تو وتی اولی موبائل کدی زُرتگ ؟ تئ اولی موبائل ءَ کُلو (میسج) ءِ آسراتی مان اَت؟ کدی تو اولی رندا موبالءِ سرا دیم پہ دیمی گپ( video call) جتگ؟ شمۓ دمگ ءَ نِٹ سُست اِنت یا تیز اِنت؟" 

درستیں جست  ءُ پُرس، گپ ءُ گال منی دوئیں ہمراہانی نیام ءَ بوھگ ءَ اِتنت ءُ آ جہد کنگ اِتنت کہ آ من ءَ ھم ہمے گپ ءُ تْراناں گوں ھوار بِہ کن اَنت. بلئے منی چم گوں بار والا ءَ سک اِتنت کہ کدی باریں چاہ یےِ بیار اِیت ءُ من بہ نوشان یے دانکہ منی سرءِ درد کم تر ببیت۔

"دگنیاءِ لہتیں ملکاں 5G لانچ (launch) کُتگ. تو سر پد ۓ؟" ھمل ءَ منءَ ٹوہینت ءُ جست کت.

"من وَ انگت نہ زاناں کہ اے G ءِ جند چی یے ءُ تو من ءَ 5G ءِ جست ءَ کنگ ءَ ئِے." من پسو دات. 

"ھاھاھا اے بزگ ءَ گوں دگنیا ءَ چے کار. اِشی ءِ  دگنیا، مال ءُ متاہ ہمے کوپ ءِ چاہ ءُ ٹال ے سگریٹ اِنت."

بابا ءَ منی نیمگَ ءَ اشارا کُت ءُ گْوشت. 

من بچکند اِت ءُ چہ بار والا ءِ آؤرتگیں چاہ ءَ گُٹے وارت. 

"بیا من ترا گوْشاں گوں کہ G چی یے ءُ 5G  چی یے." 

حمل ءَ منءَ گْوشت۔ من اناگہہ آئ ءَ را چاراِت ءُ آ گپ ءَ جنان اَت. 

"موبائل ءِ connect کنگ ءِ نیٹورک ءُ تکنیک اولی رند ءَ analogue بوتگ کہ اِیشی ءِ رپتار  kbps2.4 بوتگ. بزاں اے سکیں سُستیں تکنیکے کہ تہنا کال (call) ءِ واستہ اِنت. بلۓ اِیشی ءَ رند کہ موبائل ءِ connect کنگ ءِ تکنیک ڈیجیٹل کنگ بوت ءُ اِیشی ءِ رپتار گیش کنگ ءُ 0.1 kbps بوت. SMS ءِ آسراتی (سہولت) اَتک۔ نام ایر کنگ بوت 2G( بزاں دومی جنریشن۔) 2G ءِ ھاسیں گپ ایش اِنت کہ گوں اِیشی ءَ بازیں موبائل کنیکٹ کنگ بوتنت. "

من ھمے دیوان ءِ تہا اناگاہ ءَ ھیال کُت کہ منی چم چاہ ءَ سک اِتنت ءُ بابا ءِ چم من ءَ. بلۓ ھمل ھمی G ءَ گوں انَگت سرءُ لینڈ اَت ءُ مارا سرپدی دئیگ ءَ اَت.

آ گْوشگ ءَ ات کہ 2G وَ ھِچ ئےِ نہ انت اے دُنیا ءِ تہا. نوکیں دُنیا ءِ تہا مزنیں آشوبے 3G ءَ آؤرتگ کہ ایشی ءِ رپتار 0.1 kbps ءَ چہ 2mbps ءَ سر بوت بزاں سک تیز بوت ءُ 3G ءِ یک ٹاورے ءَ 100 گْوانکو (موبائل) ءَ گیش یکّیں وھدءَ کنیکٹ کُت ءُ رپتار ئےِ ھم ھچ کم نہ بوت۔ موبائل انٹرنیٹ اسل ءَ 3G ءِ ہمراہی ءَ اتکّگ. 

"ساھتے گپ ءَ مہتل کن."

من بابا ءَ را گْوشت، پدا سگریٹے روک کُت ءُ کَشگءَ لَگ اِتاں. بلۓ نگبہتیں بابا کجا زاناں دم کَنت. آ انگت رپٹگ ءَ اَت کہ 4G ءِ رپتار 5mbps اِنت  ءُ 400 موبائل یک ٹاورے کنیکٹ کنت. 

بابا ءَ بلائیں ساھے کَشّ اِت ءُ کرسی ءِ سرا شری ءَ تِکہ ئےِ دات ءُ پدا گپ ئےِ بِندات کُت. 5G دُرستانی پِت اِنت. اِیشی رپتار  20480mbps ءَتک شُت کَنت۔ 5G ھزاراں موبائل یکیں وھدا کنیکٹ کُت کَنت۔ 5G آٹومیٹو (automotive ) گاڑیانی تہا کارمرز بیت ، پیکٹری ءُ لوگانی تہا کار گِرگ بیت. تو بِہ سمج 5G زِند ءِ ھر بہر ءَ ہوار بیت۔ 

مَن سگریٹ پُردان ءِ تہا کُشت، وتی موبائل چہ ٹیبلءِ سرا چِست کُت ءُ گُشت. منی سر ھِچ پِر نہ بیت. گُشئے من وابانی دُنیا یے ءَ اوژناگ ءَ بوتگ اِتاں چیاکہ مۓ میتگ ءَ نہ G ھست نیکہ 5G.