تهنّا اهسان یا مُچ بلوچ؟
رگام بلوچ
منی گپ چہ سرھال ءَ بِنا بیت ۔۔۔۔۔ اِشی ءَ شُما یک جُست یے سرپد بئے یا گوش جنیں گپ یے، بلے جیڑه ءَ ما الکاپی ءَ سرپد نہ بوھگ ءَ آں۔
اھسان دانش بلوچی ءِ یکّیں ازمکار اِنت کہ ما آئی ءَ گندگ ءَ یاں بلے دگہ سد دو سد دگہ بلوچ ازمکار ھست کہ آ پہ نانءِ چُنڑےءَ بزّگ اَنت من ءُ تو سرپد نیاں زاناں؟
گپ کہ بلوچی ءِ کئیت گُڑا شُد، بزّگی، بے روزگاری، دِلپروشی کیت گوںے پرچا کہ اے داں مارا وهداں همراه ینت، اِشاں تو گوں هِچ بلوچ ءَ جُتا کُت نکنئے ۔
مرچی اگاں پہ اھسان ءَ چار بلوچ آواز چِست کنت یا دگہ یکے چار نبشتانک لِکّ ایت ءُ اگاں اهسان ءَ روزگارے بہ رسیت ھم گڑا آدگہ شُدیگیں بلوچ ازمکاراں چون کنئے؟
اهسان وَ یکے ۔۔۔۔۔ بلے دگہ بلوچ اِزمکار کُجا ماڈیاں نِشتگ اَنت زاناں؟ آ زاناں کُجا بِنک بیلنسانی واجہ اَنت؟ آلانکہ بہ بنت بائدیں۔
منی جیڑه اِش نہ اِنت کہ راج پرچا اھسان ءِ توار بوهگ ءَ اِنت...... منی جیڑه اِش اِنت کہ راج پرچا مُچ بلوچ ازمکارانی توار نہ بوھگ ءَ اِنت؟
اهسان ءَ وت ءَ زاهر کُتگ پمیشکہ من ءُ تو زاناں کہ آھی ءَ زلورتیں بلے دگہ ھزاراں بلوچ ازمکار پہ شُد، دلپروشی ءُ بے وسی زندگ گوازینگ ءَ اَنت آیانی توار کئے بیت؟
پدا لھتیں بلوچ ھم گیشیں کن انت " بہ بَکش اھسان جان مارا تئ کَدر نیست " اے وڑیں گپّانی لِکّوک هم چُنڈے نان پہ بزّگی ورگ ءَ اَنت!
گپ اهسان ءِ اِزمکار بوهگ ءِ نہ اِنت گپ آئی ءِ بلوچ بوهگ ئیگ اِنت اهسان ستر مزنیں ازمکارے بہ بیت بلے ھستیں یک بے چارگیں، بے وسیں بلوچ یے ناں؟ ناکہ آئی ءَ سینیما یے هست، ناں آئی ءَ هستیں وهد ءِ ایڈوانس تامُر جوڑ کنگی کیمراه ءُ دگہ سامان۔ آئی ءِ پد پہ روڑانی سر ءَ چِپس بہا کنگ بیت ۔
اسلا ما باز برا بیھال باں ۔۔۔۔۔ ما بیھال باں کہ مئے درُستانی جیڑہ یکّین اَنت.... مئے درُستانی جیڑه شُد، بزّگی، بے وسی ءَ بِنا بنت ءُ همودا هتم بنت چیا کہ ما چوں نادراہ ءِ دپتر ءِ بسات کُتگ ..... ما وتی جیڑه ٹوکن ءِ سرا کُتگ اَنت.... مرچی اهسان ءِ ٹوکنءِ نمبر اِنت آئی ءِ جیڑه هتم بیت یا نہ بیت بلے پُشت ءَ دگہ ٹوکن یے الّم پُجّیت!
ما شر رَوگ ءَ ایں..... بلے یکّ یکّ ءَ روگ ءَ ایں۔۔۔۔۔۔ پمیشکہ اے بری تھنّا اهسان ءِ توار مہ بئے ۔۔۔۔ بلوچی تُامر باسکوپ ءِ بہ بئے ۔
No comments:
Post a Comment