اسرائیل ءُ فلسطین ءِ جیڑہ (گُّڈی بھر)

نبشتہ کار۔۔۔۔۔۔۔۔۔۔۔۔۔۔۔۔۔۔ ماران بلوچ

⚫"ھماس" ءُ "فتح" ءِ میان ءَ تپاوت

فتح چُش کہ یک سیکیولر ءُ نیشنلسٹ آرگنائیزیشن یے، اِیشی ءِ مول ءُ مراد فلسطین ءِ تھا یَکمُشتی جوڈ کنگ ءُ اَمن ءُ اِیمنی آرگ انت، بلے حماس یک مذھبی گل یے ءُ ایشی ءِ مول ءُ مراد فلسطین ءُ اسرائیل ءِ سرجمیں ھند ءُ دمگانی آزات کنگ اِنت۔ 

فتح پارٹی اسرائیل ءَ را مَنّیت ءُ گْوشیت کہ باھدیں یو این قرار داد ءِ رِد ءَ فلسطین ءِ سرجمیں زمین واتر عرباں دِیگ بِہ بنت، بلے حماس اسرائیل ءِ وجود ءَ را نہ مَنّیت ءُ گْوشیت کہ "اسرائیل" مسلمانی زمین ءِ سر ءَ زوریں ریاستے جوڈ کنگ بوتگ، حماس ءِ گْوشگ اِنت کہ یہودی اد ءَ چہ در بیا انت۔ حماس یو این ءِ قرار داد ءَ ھم نہ مَنّیت۔

اے دویں گَلّانی میان ءَ سیاسی اختلافات امینچو باز انت کہ دو ھزار شش ءِ گچینکاری ءَ حماس گزہ ءِ  گیشتریں سیٹاں کَٹیت، ھمے سبب ءَ  اِیشانی میان ءَ وت ماں وتی جنگ بِندات بیت۔ مزنیں کَچے ءَ لس مھلوک جَنَگ ءُ کُشگ بنت۔ اے جنگ ءِ سبب ءَ فتح پارٹی غزہ ءَ چہ دراھگ ءَ لاچار کنگ بیت ءُ حماس سرجمیں غزہ ءِ پٹی ءَ وتی سرکارے جوڈ کنت۔

انوگیں وھد ءَ غزہ ءِ سرجمیں پٹی ءَ حماس ءِ حُکمرانی انت ءُ ویسٹ بینک ءِ ھند ءُ دمگاں فتح پارٹی حُکمرانی کنگ ءَ اِنت۔ 

سک باز چُشیں سیاسی عمل بوتگ کہ دواِیں گَل یکجاہ کنگ بِہ بنت، بلے اے دُرسیں عمل ناکام بوتگ انت۔ یک بلائیں سببے ھمیش انت کہ اِیشانی یکجاہ نہ بوھگ ءُ ناتپاکی ءَ چہ لس مھلوک سک باز تاوان ورگ ءَ انت۔

⚫غزہ پٹی ءُ ویسٹ بینک ءِ انوگیں جیوگرافی

غزہ، چاریں نیمگ ءَ چہ یک بندیں ھندے۔ یک نیمگے ءَ میڈیٹررینیم زِر(Mediterranean Sea) اِنت کہ آود ءَ اسرائیل ءِ نیوی ھرچ وھد ءَ ساڑی انت، دومی نیمگ ءَ چپ ءُ چاگر ءَ اسرائیل اِنت ءُ سیمی نیمگ ءَ مصر ءِ سیمسر انت۔

مصر ءِ سیمسر ھم سکیں لشکر کشیں جاہ یے کہ آود ءَ سالانی سال یہودی ءُ عربانی میان ءَ جنگ اِنت۔

دگہ ویسٹ بینک ءِ کہ گپ بیت گڑا سرجم ءَ اسرائیل ءِ توکی نیمگ ءَ کپیت، چیا کہ یو این ءِ داتگیں زمین سرجم ءَ اسرائیل ءَ قبضہ کُتگ اَنت ءُ آود ءَ اسرائیل ءَ زوریں سِٹلمنٹ جوڈ کتگ، یہودی آورتگ ءُ آباد کُتگ انت۔ بِزاں کہ فلسطین سرجم ءَ اسرائیل ءِ دست ءَ اِنت۔

🔴اسرائیل ءِ تاکت

انوگیں دور ءَ ھما مُلک یک مزنیں تاکتے گْوشگ بیت کہ آئی ءِ گْور ءَ نیوکلیر سِلاہ بِہ بیت۔ اسرائیل عربستان ءِ تھا یک ءُ تھنا ایں مُلک انت کہ آئی ءِ گْور ءَ نیوکلیر سِلاہ ھست۔ ایشی ءَ ابید آئی ءِ گْور ءَ دُگنیا ءِ شرتریں جنگی بالی گُراب ھست انت۔ دگہ آئی ءِ گْور ءَ آئرن ڈوم سیسٹم (Iron Dome System) ھست، بِزاں کہ نزیک ءُ گْور ءَ چہ ھرچ میزائلے کیت، آئی ءَ جھل ءِ کپگ ءَ نیلیت، پیسر ءَ بُرز ءَ تراکینیت۔ اے سسٹم تھنا دگنیا ءِ چندیں مزنیں مُلکانی کِرّ ءَ ھست۔  ھمے سبب اِنت کہ عربستان ءِ تھا کس اسرائیل ءَ پُروش دات نہ کنت۔ یہودیانی کِرا زَر ءُ مال ءِ ھم ھچ کمی نیست، اسرائیل ءِ اِکانومی ھم سک بز شر اِنت۔ ایشی ءَ ابید دگنیا ءِ ایدگہ مزنیں تاکت چُش کہ امریکا، پرانس ءُ ایدگہ مزنیں مُلک ھرچ وھد ءَ آئی ءِ پُشت ءَ اوشتاتگ اَنت۔

⚫انوگیں جاورھال

انو۔۔۔۔بِزاں کہ چیزے روچ ساری وھدے "حماس" اسرائیل ءِ سر ءَ اُرش کنت ءُ پد ءَ اسرائیل اُرش ءِ جواب ءَ غزہ ءِ پٹی ءَ بمباری بندات کنت۔ امریکا اولی مُلک بیت کہ اسرائیل ءِ پُشت ءَ اُوشتیت، امریکا ءِ صدر کیت ءُ گوشیت اگاں ایدگہ عرب مُلکاں یا کہ ایران ءَ اسرائیل ءِ سر ءَ اُرش کُت گُڑا امریکا ھُشکین دست ءَ نہ نِندیت۔

 گوشنت کہ "امریکا" ھر سال اسرائیل ءِ لشکر ءَ سک باز کُمک کنت۔ ایشی ءِ سبب ایش انت کہ اسرائیل عربستان ءِ تھا آئی ءِ مفاداں بِہ رَکّین ایت۔

چیزے سال بیت عرب مُلک بِزاں سعودی، یو اے ای ءُ بحرین ھم اسرائیل ءَ گوں نزیکی کنگ ءَ انت۔ نو عرب زان انت کہ اسرائیل یک انچیں تاکتے، آئی ءَ ما پہ جنگ پُروش دات نہ کن اِنت۔ مرچی باند ءَ ھرکس وتی ملک ءِ بارُوا جیڑیت، دگہ مسلمان بزگ ءُ لاچار انت، اے آیانی مسلہ نہ انت۔ عربانی اے نوکیں ڈپلومیسی ءَ کہ ما گندیں، گڑا زانگ بیت کہ دیمتر ءَ فلسطین ءِ جیڑہ گیشتر نزور تَرّ ایت ءُ آیوکیں روچاں بوت کنت دُگنیا ءِ نکشہ ءَ فلسطین نہ مانیت۔

ایران، قطر ءُ دگہ بازیں مُلکے "حماس" ءِ اُرش ءِ پشت پنائی ءَ کنگ ءَ انت۔ حماس ءَ مالی ءُ فوجی کُمک کنگ ءَ انت۔ گْوشنت کہ اے رندی حماس ءِ نیمگ ءَ چہ سک باز تیاری کنگ بوتگ۔۔۔لبنان ءِ تھا حزب اللہ نامیں جھادی گلَے، آئی ءَ ھم اسرائیل ءِ سر ءَ اُرش کُتگ۔ الجزیرہ ءِ مرچیگیں رپورٹ ءِ رِد ءَ اے جنگ ءِ تھا اَنگت سئے ھزار ءُ پَنچ سَد فلسطینی کُشگ بوتگ ءُ دومی نیمگ ءَ چاردہ سَد اسرائیلی کُشگ بوتگ۔

مستریں درد مردم ءَ ھما وھد ءَ  بیت، ھال کیت کہ یک نادُراہ جاہ یے سر ءَ بمباری کنگ بوتگ ءُ پنچ سد مردم کشگ بوتگ۔۔۔بلے چی کن ئے، گوشنت کہ 

"Everything is fair in love and war".

اسرائیل ءُ فلسطین ءِ جنگ ءِ روانی اُوشتگ ءِ وڑ ءَ نہ اِنت، ھر دو سئے سال ءَ الم مزنیں جنگے بیت، ھزارانی کچ ءَ لس مھلوک مِریت۔ اِینچو مھلوک ءِ مِرگ ءَ پد ھم دگنیا ءَ ھچ سُدّے پرنیست۔ 

راست گْوشنت، چوناھی ءَ جنگ ءُ اخلاقیات دو جُتائیں چیز انت، جنگ لوگی مسلہ یے نہ اِنت کہ اخلاقیات ءِ بنیاد ءَ ھلاس کنگ بیت، بلکیں جنگ مفادانی ھاتر ءَ کنگ بیت۔۔۔مفاد ھست ا‌نت، جنگ ھست۔۔کے مِرگ ءَ انت؟:چنچو مِرگ ءَ اِنت، مسلہ نہ کنت۔۔۔۔۔چاریں باریں اے جنگ داں کدی ھمے وڑ ءَ روان کنت ءُ لس مھلوک ءَ را چِنچو تاوان رسیت۔۔۔