پوریا گرانی روچ ءُ دریا وردیں پوریاگر
جاوید بلوچ @JavedGwadari
 |
| اکس: ھمل سالار |
اے نبشتانک گوستگیں سال ءِ پوریاگرانی روچءِ نبشتہ کنگ بوتگ
یکم مئی گُشگءَ و جہانی پوریا گرانی روچ انت ءُ اے روچءِ مول ءُ مراد جہانءِ پوریا گراں ھوار شکاگوءِ پوریا گراں سہریں دروت پیش کنگءِ روچ انت بلے این جی اوزانی پیداک کتگیں اکس کشی ربیدگءَ اے روچ ھم لہتیں موم بتی والا، پریس کلبانی دیمءَ کوکار کنوک ءُ سوشل میڈیاءَ یک پوسٹے دئیگءَ ابید دگہ ھچے نہ انت۔
پہ نام مئے گچین بوتگیں راہشون ءُ راج کاراں کاگدی بل ءُ قانود ھم پاس کتگ کہ پوریا گرانی ھک منگ بہ بنت بلے اشانی کارمرز کجا ءُ چون بیت ءُ اے بابتءَ پوریا گر چنچو سرپداں کولءِ شاعر "ھچ مہ گُش گُنگ بہ بو زبان منی” ، یک ھمے وڑیں قانودی بلّے بلوچستان اسمبلیءَ دریا وردیں پوریاگرانی بابتءَ ھم بوتگ کہ نو ھچ شک نیست کہ رمیزاں گپتگ بلے پاس بئیگءِ نامءَ نہ زانت۔
پوریا گر ءُ دہکان کارءِ گالاں و ما گیشتر اِش کُن انت بلے اے میانءَ دریا ورد ءِ نام مدام بیگواہ انت، پوریاگر اگاں دہکان کارے کشت ءُ کشاری کنت گڑا آئی جندے زمین ءُ آئیءِ گچین کتگیں سروکءِ زمینانی کساس چنچوک انت۔۔۔۔ ہرکس زانت۔
بلے ھئیر آ پوریا گرانی بابتءَ کاگدیں بِلّے پہ نام قانودے است بلے یک انچیں بد بھتیں مہلوکءِ ھم است کہ آ چو زور آوریں واجہ کارانی فیکٹریا کار کنوکیں پوریا گرءِ وڑءَ بار کشی کنت، چو دہکانءِ وڑءَ ہید ریچیت بلے انگت قانودی پوریاگریءِ پجارءَ چہ زبہر انت، دریاوردی ملکءِ معیشیت ءُ رو آ ءَ بگر داں تیاب دپءِ مہلوکءِ مزنیں کساسءَ روزگار انت بلے پوریا گر منگ نہ بیت۔
ءُ درستاں گیش ابہکہی ھبر اش انت کہ انسانی ھکانی نام گپتیں ٹولی، کواس ءُ زانتکاراں بگر ھمے دمگاں چہ ووٹ روپوک ھم اے بابتءَ گپ جنگءِ تکلیپ نہ کن انت، ھمروچ اےدریا ورد کہ سہبءَ مہلہ وتی لاپءِ شوہازءَ زرءَ درکپ انت گڑاں مزن واجہ کارانی گُجو گوں بندش جتگیں ماہوراں پیسرءَ چہ مائیگانی نسل کُشی کنگءَ اَنت، وتی ماتیں زرءَ سنٹ بئیگءَ چمے وت دریا ورد گند انت بلے وائے بے وسی۔۔۔۔ اگاں دارگءِ جھد بکن انت گڑاں قانودءِ دیمءَ ملامت بنت ءُ چوناءَ بلوچستان سرکارءِ فیش ریزءِ وڑیں ادراگ اشاں داشت نہ کن انت گڑا بزگیں دریا ورداں ھچ بنے نیست۔
بلے ھؤ پوریاگرانی یونیئانی وڑاں دریا ورداں ھم پہ ھشکیں نام لاتیں گل است کہ دریاوردانی سیادی ءَ چہ گیش واجہ کاریں سیاست دان ءُ گچین بوتگیں نمائندگانی گیشتر وپاداریءَ کن انت، اے گلّانی سروک ھما چالاکیں ٹولی انت کہ رپک ءُ ھیلہءَ زبر انت ہردوئیں نیمگءَ دستءِ مں پاتءَ انت۔
گُش انت کہ وھدی زمانگءَ سردار، وڈیرہ ءُ چوہدریاں مردوم وتی بندیگ کتگ انت یا پہ چندیں زرءَ بہا زُرتگ انت ءُ سرجمیں سال چو جناور کار گپتگ انت، اے دہرءَ ھم دریاورد ھمے وڑ کمپنی ءُ سیٹھانی بندیگ انت کہ آ اشاں پہ وام یک انجنے، ماہور یا کمو زردئینت ءُ وتی زر زُرتیں گلامءِ وڑءَ کار گِر انت بزاں دریا وردیں مید سرجمیں ھمر کار کنت ءُ سیٹھ آئیءِ مائیگاں وتی دلءِ مئیلءَ پہ بستگیں نیادءَ بہا زور ایت اگاں مید مکن بکنت گڑا سیٹھ گوں وتی آ دگہ زرکاریں ٹولیاں اشییءِ بائیکاٹ کن انت ءُ چُش اے چہ لاپ ءَ کپیت۔
اے زوراکیں سیٹھ ءُ کمپنی ناں ایسٹ انڈیا ءِ وڑیں زور گپتاں ءُ ناں حملءِ جیہندءِ زرپہازیں جنگءِ زر دُزیں پرتگیزی بلکیں گیشتر ھمے گچین بوتگیں نمائندگ ءُ آہانی سیاد ءُ وارس کہ ما چہ آہاں دریا وردانی ھکانی رکینگءِ قانود جوڑ کنگءِ امیت وار انت۔
گوستگیں روچاں جیونیءِ دریا وردانی زالبولاں زہر شانی کتگ ات کہ زرءِ سرءَ سرکاری بندش ھلاس کنگ بہ بیت بلے اے زہر شانی کسءَ کمار ھم نہ کت، ھمے وڑءَ سُر بندنءِ دریا ورداں ڈپٹی کمشنر پہ کلاگ گشیت کہ شما باز چُک چیا پیداگ کتگ کہ آ لاک ڈاؤنءَ ھم لاپ لوٹ انت۔
اگاں دریا ورد قانودءِ ردءَ پوریا گر منگ بہ بنت گڑا آ ھم بازیں ھکانی واھند بنت، آ پہ جان دراہی ءُ درمان واجہ کارانی لوگءِ دپءَ پنڈگءَ نہ رؤ اَنت، آہانی چُک ھم گیشتر وانگءَ پہ سرکاری کوٹہءَ داخلہ زرت کن انت، آ ھم وتی وڑءَ وتی یونیئنز جوڑ کُت کن انت چہ واجہ کارانی دَزچُکیں ٹولیانی رَد دئیگءَ چہ رَک اِت کن انت، یک سیٹھ ءُ کمپنیےءِ زر زرتیں گلامے نہ بنت بلکیں وتی روزگارءَ پہ قانودی ردءَ برجم داشت کن انت۔
No comments:
Post a Comment