تھاریں شپ پہ بلوچ راج ءَ

نبشتانک: حفیظ بلوچ

مرچی ما گندگ ءَ ایں بلوچ راج سرجم ءَ زوراک ءِ ھلاپ ءَ توار چست کنگ ءَ انت ۔ شال بہ بیت یا کیچ بہ بیت ما گندگ ءَ ایں زورگیر  مئے مردماں گار ءُ بیگواہ کنگ ءَ انت ۔بلوچ ءِ کُشت ءُ کوش  بلوچستان ءِ ایردست کنگ ءَ پد بندات بوتگ ۔لھتیں روچ بیت اداراھاں بلوچ ءِ چکچینی ءِ تہ ءَ ترندی آرتگ۔ مردم ءَ دروگیں میڑ ءَ شھید کنت ءُ دور دنت پدا ھمے گوش ایت کہ من سرچ آپریشن ءَ لھتیں دہشتگرد کشتگ ۔بلے ما دومی نیمگ ءَ گندگ ءَ ایں اے ھما مردم انت پیسرا آوار جنگ بوتگ اَنت ھما مردماں دروگیں میڑ ءِ نام ءَ دنت۔

 بلوچ راج زوراک  ءِ پالیساں شریں وڑے ءَ سرپد اِنت۔ مرچی ما شھید بالاچ ءِ گھار ءَ پنچ روچ ءَ گیش اِنت کہ مرچی شھید بالاچ ءِ لاش شھید پدا چوک ءِ نیام ءَ ایر انت سرجمیں بلوچستان ءِ مھلوک شھید بالاچ ءِ واستا توار چست کنگ ءَ اِنت ۔اے جون گھگیری  ءِ نشانی اِنت۔اے چوک ءِ سر ءَ ایوک ءَ بالاچ ءِ جون نہ بوتگ پیسرا ھم زوراک ءَ مئے مردم کشتگ ءُ دور داتگ انت۔ بالاچ ءِ کھول ءِ مردمانی وڑا ناکو مھراب ءِ ھم دو کسانیں نماسگ زوراک ءِ تیرانی آماچ بوتگ ۔ ناکو مھراب ءِ دو کسانیں نماسگانی جون شھید  پدا چوک ءَ آرگ بوتگ اَنت ءُ زھرشانی کنگ بوتگ بلے  انصاف دیگ نہ بوتگ ءُ گیشیں زھرشانی ءِ ھاترا شال ءَ شتگ اَنت انساپ ءِ لوٹ کنگ ءَ ۔ ما ھمے گندگ ءَ ایں کہ زوراک وتی پندلاں روچ پہ روچ مٹ کنگ ءَ اِنت۔  ترندیں پالیساں آرگ ءَ اِنت  بلوچ ءِ چکچینی گیش بوان اِنت  ۔

دومی نیمگ ءَ اسلام آباد ءَ مئے مات ءُ گوار تھاریں شپانی نیم ءَ کیمپ جتگ ءُ نشتگ اَنت ۔ وتی گاریں چکانی واستا ھما کہ ریاست ءَ وتی کوٹیانی تہ ءَ بندیگ کرتگ اَنت. اے ریاست ءِ وت جوڈ کرتگیں پالسیانی تہ ءَ مان اِنت کہ بلوچ ءَ کُش ءُ دور بہ دئے. اے تھاریں شپ ءَ  زندگیں مردم یک ساھتے گوازینت کرت نہ کنت۔  جَل ھما ماتانی بچّاں بات کہ سالانی سال تھاریں کوٹیانی تہ ءَ بندیگ  اَنت ۔ اے وڑ وڑیں آزار دیگ بوگ ءَ اَنت ۔ یک زندگیں انسانے کٹ ءَ درتگ اِنت۔

 مرچی اسلام آباد ءِ دگانی سر ءَ مئے مات ءُ گھار  وتی توار ءَ زالمانی گوش ءَ سر کنگ لوٹ انت ھما کہ مردم گری  ءِ ٹاپار ءَ جن اَنت۔ بلے اے استان ءَ بلوچ ءِ واست ءَ انساپ ءِ کانود نیست اِنت۔اسلام آباد ءِ سردی ءِ موسم  ءَ کس نشت کرت نہ کنت سلام مئے مات ءُ گھاراں کہ چہ بلوچستان ءَ اتکگ انت وتی گار ءُ بیگواھیں مردمانی شوھازگ ءَ انت ۔ مئے کھول ءِ لوٹ ھمیش اِنت کہ مئے مردماں آجو بکن ۔ بلے زالمیں زورگیراں چہ ما چے امیت بکن ایں۔  کھول ءِ مردمانی گوشگ ھمیش اِنت  ما ریاست ءَ چہ ھچ اُمیت نہ کنیں ۔ ما ادا وتی بلوچ راج ءَ لوٹ کن ایں کہ زوراک ءِ ھلاپ ءَ وتارا مھکم بہ کنت ۔ وتی توار ءَ چست بہ کنت ۔

ما دومی نیمگ ءَ گند ایں کجام ھم  زورآوریں  استان بہ بیت آ ایردستیں راج ءِ  سر ءَ وتی زلم ءُ زوراکی ءَ یکشل ءَ برجم کنت ۔ کجام ھم ایردستیں راج ، آ راج ءِ گوما اے زلم ءُ زوراکی کنگ بنت۔ بلے ایردستیں راج ءَ بے توار بوگی نہ اِنت ۔ یک چیزیں مارا مارگی اِنت کہ زورکیانی بگیری ءَ  ما کُلّیں بلوچاں یکجاہ بوگی اِنت توار چست کنگی اِنت دم برگی نہ اِنت تہ ھما وھد ءَ مئے راج ءِ  لوٹ سرجم نہ بوتگ اَنت ۔ اے تھاریں شپانی نیم ءِ نندگ گران اِنت بلے بے مُز نہ اِنت اے تھاریں شپ باندا یک نوکیں سھبے ودی کنت۔ تھاریں شپ بلوچ راج ءَ پہ یک نوکیں مستاگے ءُ اے مستاگ ءِ مُز بلوچ راج ءِ شادھی روچ اَنت۔