کاسگ چٹّی ءُ گلامی مارشت

کاسگ چٹی ءُ گلامی مارشت

رجانکار ;- سئید ساهل

هما وهد ءَ کہ دنیا ءَ گلامانی میان اُستمانی نیادی برجم دارگ بوتگ گڑا چہ سرجمیں دنیا ءَ جتا جتائیں رنگ ءُ بیه‍ ءِ گلام اِش آؤرتگ ءُ نیادی ءَ بها اِش کتگ اَنت .

یک دابیں گلام بها بُوگ ءَ رند گلامانی دگہ دو گَل جوڑ کنگ بوتگ ، یک گلّے هما بوتگ کہ آیاں واجهانی لوگ ءَ گلامی کتگ ، ءُ دومی گَلّ ءِ گلاماں چہ لوگ ءَ دَر ڈگارانی سر ءَ کار کتگ .

هما گلام کہ واجهانی لوگ ءَ بوتگ اَنت آیاں وتی واجهانی سراروک وارتگ اَنت ءُ گْور ءَ کنگ ءَ واجهانی کْوهنیں گُد ءُ پُچ رس اِتگ اَنت ، اِے داب ءَ آیاں وتارا هاسیں گلام لیک اِتگ ، ءُ هما گلام کہ  چہ لوگ ءَ در واجهانی ڈگارانی سر ءَ کار اِش کتگ آیاں گژن ءُ شُد ، موسمانی تْـرندیں سرد ءُ گرم ءُ وتی زوراکیں واجهانی زلم ءُ زوراوری وتی بْـرهنگیں جان ءَ اوپار کتگ اَنت ، بـلے چہ گلامی ءَ بـے کساس سوکیگ بوتگ اَنت ءُ چہ گلامی ءَ باز بد اِش برتگ .

یک رندے چوش بوت کہ ڈگارانی سر ءَ کار کنوکیں گلام چہ زلم ءُ زوراوری ءُ چہ بـے آمیدیں بهر ءُ بانگ ءَ بیزار بوت اَنت ءُ آیاں وتی آجــوئی ءِ بارو ءَ سسّا کت ، آ وت ماں وت همسنّت بوت اَنت ءُ شور ءُ سلاه اِش کت ، ءُ آجــوئی ءِ یک مراسایـے ٹهینت اِش ، کہ ما چے پیم ءَ چہ اِد ءَ دَر بہ رویں ءُ وتی دابیں گلامانی هکّ ءِ هاتر ءَ جنگ بکنیں ؟

ڈگارانی سر ءَ کار کنوکیں گلاماں اِے مراسا داں لوگ ءَ کار کنوکیں گلاماں سر کت ، ءُ آیاناں گْوشت اِش کہ مراسا ءِ رِد ءَ آ هم وتا جاڑی ءُ ساڑی بکن اَنت ، ءُ چہ آیاں جست اِش کت کہ شمئے شور ءُ سلاه چی اِنت ؟ تا کہ اگاں مراسا ءَ نزّوری یـے هست گڑا آ نزّوری دُور کنگ بیت .

لوگ ءَ کار کنوکیں گلاماں مراسا اِش کت ءُ آیاں هما دمان ءَ بـے چک ءُ پد ءَ اِے هال وتی واجهانی کِرّ ء‍َ سر کت ، هالانی رسینگ ءِ مُزّ ءَ آیاں یک وهد ءِ تازگیں ورگ ءُ نوکیں گُد ءُ پُچ داد رس اِت ، ءُ دومی نیمگ ءَ ڈگارانی سر ءَ کار کنوکیں گلامانی سر ءَ واجهاں گیشتر زلم ءُ زوراوری کت ، ءُ آیانی کار ءِ وهد هم گیش کت تا کہ آیاں آرام کنگ ءِ ، ءُ پدا سسّا کنگ ءِ وهد مہ رس ایت . . .

لوگ ءَ کار کنوکیں گلاماں بس پہ دو وهد ءِ ورگ ءَ وتی واجهانی کِرّ ءَ چاپلوسی کت _ آیانی دیم ءَ هچ وڑیں مزنیں مول ءُ مراد نیست اَت ، آیاں سسّا کت کہ داں کہ مئے واجہ هست اَنت گڑا ما چہ گژن ءُ شُد ءَ نہ مِریں .

زندمان ءِ هر پِڑ ءَ گوں شما هم لوگی گلام دُچار کپ اَنت ، ءُ آ بـے مول ءُ مراد ءَ شمئے مزنیں مول ءُ مراد ءَ ناسوب کن اَنت .