بلوچ ازم کار

 بلوچ ازم کار

ذولفقار علی ذولفی                          

چیزے روچ انت بلوچی پلمانی ازم کار واجہ احسان دانش ءِ اکسے سوشل میڈیا ءَ چکرّگ ءَ انت ـ اے اکس ءِ تہا واجہ دانش دگے یے سرا نشتگ چپس بہا کنگ ءَ انت ـ لہتیں مردماں افسوز کتگ کہ بلوچ ازم کار ءَ ھچ ارزش نیست آ بزگ کئیت چپس بہا کنت داں کہ پہ وتا چُنڈے نانے شوھاز کُت بہ کنت ـ یک سوشل میڈیا پیجے ءَ (منی دل ءَ "گوادر ءِ توار" ءَ) ویڈیو یے ٹھینتگ ءُ افسوز کنوک ایر جَتَگ اَنت ـ پیج ءِ رد ءَ احسان دانش کار ءَ انت ءُ کار کنگ عئیب نہ انت ـ

منی ھیال کمّو دگہ وڑ انت ـ دنیا ءَ ازم کاری وت یک کارے ـ دور مہ رو ھمے سندھ ءُ پنجاپ ءِ ازم کاراں بچار کہ ھمے ازم ءِ پشت ءَ آپ لاپ اَنت ـ مئے ازم کار پرچا دگے سرا بہ نند ایت چپس بہا بہ کنت؟ ـ چپس بہا کنگ بدیں کارے نہ انت،  کار کنگ وت یک شریں عملے بلے یک مردمے ءَ اگاں ازمے ھست ءُ آ ازم وت مارکیٹ ءَ بہا بیت کنت گڑا آ پرچا بئیت دگہ کارے بہ کنت؟ ـ

بلوچستان ءَ اگاں دگہ ھچ نیست پدا ھم "پی ٹی وی بولان" نام ءِ ادارہ وَ ھست ـ اے ادارہ ءَ ڈرامہ اڈ بنت ـ بلوچی ءُ براھوی ڈرامہ ھم اڈ بیت ـ اے ڈرامہانی گیشتریں ازم کار کراچی ءُ پنجاپ ءَ چے کاینت ءُ رومن بلوچی اسکرپٹ ءِ گوما ڈائیلاگ گوش اَنت،  چنکے زر گر اَنت ءُ پشت ءَ مان دینت،  رو اَنت ـ مئے ازم کار نشتگ چپس بہا کنگ ءَ انت ـ باید زنڈ لاپیں وزیر گزیر کڈن کنگ بہ بنت کہ بولان پابند کنگ بہ بیت آ بلوچ ازم کاراں کار بہ دنت ـ ملک مئے،  زر مئے،  کار درآمد کنگ ءَ انت،  چوش چون؟ ـ 

کراچی ءَ درزنانی ھساب ءَ باسکوپ اَنت ـ اے باسکوپانی گورا پہ پیش دارگ ءَ پلم نیست ـ بلوچ پرچا باسکوپی پلم اڈ نہ دینت ءُ ھمے باسکوپانی گورا بہا نہ کن انت؟ ـ کراچی ءَ زاناں چنچو پنجاپی ھست؟ ـ چہ بلوچاں وَ گیشتر نہ انت نا بلے اے باسکوپ پنجاپی پلم پیش ھم دار انت ءُ اے پلم سوبین ھم بنت ـ ھمے رنگ ءَ شال ءَ ھم باسکوپ ھست ـ بھرین،  مشکت ءُ دگہ عربی شھراں ھم باسکوپ ھست پدا اے شھراں بلوچانی ھم بلاھیں کساسے نشتگ ،  اگاں بلوچ کمّو زھمت بہ کشّ اَنت اے باسکوپاں گوں گپ بہ کن انت آ الّم بلوچی پلماں گر انت ـ باسکوپ ءَ وتی زر ءَ گوں کار انت،  اگاں آ گند ایت بلوچی پلم بہا بیت آ الّم پلم ءَ پیش دار ایت ـ

لیاری،  ملیر،  گولیمار ءُ کراچی ءِ اے دگہ بلوچ ھندانی تہا اگاں پلم ءِ مارکیٹنگ کنگ بہ بیت،  پوسٹر جَنَگ بہ بنت،  ماں سوشل میڈیا ءَ پروپیگنڈہ کنگ بہ بیت،  مھلوک چہ آیاں سان زور ایت ءُ پلم ءِ چارگ ءَ رؤت ـ

ایشی ءَ چے بلوچ ازم کار ءِ ھم لاپ سیر بیت ءُ بلوچی باسکوپ ھم دیمروی کنت ـ احسان دانش رنگیں پھتہ ئیں ازم کار باید وتی ازم ءِ سرا کار بہ کنت نے کہ دگے سرا چپس بہا بہ کنت ـ احسان دانش ءِ چپس بہا کنگ پہ بلوچی باسکوپ ءَ لجّی گپ بہ بیت ـ