مارا پہل کن واجہ دشتیاری

 مارا پہل کن واجہ دشتیاری

نبشتانک: وسعت اللہ خان                            

رجانک: جاوید بلوچ                               

مِرگءَ وَ درست یک روچے مِر انت بلئے لہتیں مردم چہ امیتءَ گیش زندگ بنت۔ سباء دشتیاریءَ ھم مِرگءَ دیر کُت۔

آئیءَ ھرکسءَ کُشتگ بلئے اِشتاپی نہ کُشتگ۔ آئیءِ کُشندہاں آئیءَ راہءَ آئگءِ باز مُہلت دات بلئے سباء جزباتی یے بوتگ پمیشکہ ھوشءَ چہ گیش دلءِ گپ ئے زُرتگ انت۔  آئیءَ اے گپ نہ پہم اِت کہ داتگیں مُہلتءَ چہ گیشتر نَپ بہ زور ایت۔ گیشیتگیں ھدءَ در مہ اِت ءُ بلوچانی ھکّانی گپ جنگءِ ڈاہ ءُ شورءَ بند بہ کنت۔

شاہ دربرجاہ آجوئیں ھئیالانی ردوم جاہ زانگ بنت بلئے اے یک روبرکتی لیکہے۔ ادا چُش نہ انت۔ ادا آجوئیں ھئیال ءُ شِرک کنگءَ ھچ تپاوت نیست۔ ھمے ھاترءَ اگاں کسے آجوئیں ھئیالانی منوگرے گڑا ھمودا بُروت کہ اودءَ چاگرد ءُ ریاست ھردوئیناں اوپار کنگءِ سِکت مان بہ بیت۔ یک گیشینتگیں ھدےءَ جیڑگءِ رزا دئیوکیں ریاستےءَ چو ھچ بر اوپار کنگ نہ بیت۔ شاہ دربرجاہءَ ایوک ھما وانینگ بہ بیت کہ آ ریاستءَ گُشتگ۔

سباء ءِ کُشندہءَ آئیءَ اے ھم موہ دات کہ آ وتی سرکاری نوکری ءِ ھدءُ اویلانی راہ بنداں بہ زانت۔ وتی پنشن، ریٹائرمنٹ ءُ دیمرئیءِ ھئیالءَ بہ داریت۔ پدا ھم اگاں ھکّءِ گپ جنگءِ اینچو شوک انت گڑا شاہ دربر جاہءَ یلہ بہ دَنت ءُ ھمے پڑءَ ایر بہ کپیت۔

واجہ دشتیاری! تؤ پہ بلوچی لبزانکءَ 21یکمی کرنءِ ردءَ آرگءَ پہ ھر کارے کُتگ ما آہانی کدرءَ کن انت۔ تئی 24 ءَ گیش کتاب ھم ھمے ریاستءَ چاپ بوتگ انت۔ انگت اشییءَ تؤ وتی راجءِ ھکءُ واھگانی دژمن لیک ئے۔

ما گَل ایں کہ تؤ بلوچی لبزانک، راجدپتر ءُ ربیدگءِ سرا ھر زبانءَ بوتگیں کار جم کُتگ انت ءُ یک لکھءُ نیمءَ گیش کتاب ءُ ڈاکیومینری آں گوں ظہور شاہ ہاشمی کتاب جاہ جوڑ کتگ کہ اشییءِ مزنیں بستارے ھست۔ اگاں تؤ وتی بچتگیں زند ھم ایوک پہ ھمے کارءَ بہ دات ایں اے ھم کسانیں کارے نہ ات۔

واجہ سباء! تؤ مزنیں مردمے ات ئے تؤ وتی مزنیءِ ھئیال وَ بہ داشتیں۔ مزنیں مردم کدی کینٹینءَ گوں وتی شاگرداں نِندیت ءُ گپ ءُ ھبر کنت، زہرشانیاں ھوار بیت، مچی آں تران کنت ءُ لس مردمانی وڑءَ نعرہ ءُ کُکار کنت؟

زاناں ھر گپ کنگ المی انت۔ تؤ گُشتگ کہ راستءِ دیمءَ اوشتگءِ جُرت بہ بیت۔ زاناں ھرچ راستیں گپءِ گُشگ المی انت۔ اگاں اے کار المی انت گڑا آ دگہ تئی ھمرا ءُ ھمکار چُش پرچہ نہ کن انت۔ زاناں آ نہ گند آں کہ تؤ ھرچیزءَ گندگءَ اِت ئے؟

واجہ سباء! تؤ وَ گواستانک ونتگ ات۔ زاناں تؤ نہ زانت کہ یونانیاں گوں سقراطءَ چون کُت، نازیاں گوں وتی ھئیالاں دگری داروکیں زانت کار چون گار کُت آں، چینی ءُ روسی کمیونسٹاں پہ نامیں لبرل استادانی چے ھال کُت۔ امریکہءَ میکارتھی ازم ءِ زمانگءَ آجوئیں ھئیال داروک کجا کجا چیر نہ بوت آں۔

بوت کنت اے دوریں گپ تئی پہمءَ میا انت۔ بلئے تؤ بے ھال ئے کہ 25 مارچ 1971 ءَ وھدے ڈھاکہءَ سرچ آپریشن بوت گڑا درستاں پیسر اودءِ ڈھاکہ شاہ دربر جاہءِ استادءُ پروفیسر گوں تیراں ڈلگ بوت انت۔ گندئے تؤ ڈھاکہ ءِ میوزمءَ ایر ایں ھما جُل کہ ھونءَ میچل انت بچار ات ایں کہ آئیءِ سرا علم ءُ زانتءِ ھون تالان بوتگ انت۔

تؤ بازیں وھدےءَ کسءَ رد دات نہ کُتگ ات کہ ما وَ ایوک وانوک ءُ نبشتہ کنوکیں مئے گوں سلہ بندیں جھد کاراں ھچ کار نیست۔ شما چہ آہاں گیشتر بیم ناکیں مردمے۔ شُمئے وڑیں مردم لس مردمانی ھوشءَ سلہ دار کن انت۔ انچش کہ مارءِ جنگءَ پہ آئیءِ سر شیرچینگ بیت ھمے وڑءَ کومانی کُشگءَ پہ آہانی پگرانی ھلاس کنوکانی کُشگ ھم المی انت۔ پگر ھلاس گڑا مردم ھلاس، مردم ھلاس گڑا جیڑہ ھلاس۔

واجہ سباء! گندئے تؤ ھمے گپ بہ پہم اتین آں۔ راستے کہ تؤ زانتکاریں استادے بوتگ ئے بلئے تئی تہءَ ھوش نہ بوتگ۔ ءُ اے ایوک تئی جیڑہ نہ انت مزنیں مردم درست انچش بنت۔ پمیشکہ آ گپ نہ کنگءِ اوپارءَ چہ در کاینت۔

واجہ سباء! تئی مرگءَ ما ھم رنجیگ انت بلئے اے رنج چہ تئی زندگ بوھگءَ انگت کمتر انت۔ بلئے پدا ھم وتی مرگءَ مئے لاچاری بزان ءُ مارا پہل کن چیاکہ مارا ریاست ھم دیمءَ برگی انت۔