جنین ماس*س گُلام نہ اَنت!

جنین ماس*س گُلام نہ اَنت۔

رگام بلوچ                                    

اکس: کاشف خلیل

 اے بٹاکبازی ءَ هرکس کنت۔ منی دل ءَ آ ناں علمی مردمے، ناں آ انسانے، ناں آئی گوَستانک ءِ تاک ونتگ اَنت ءُ ناں آ دَهر ءِ الکاپیں دلگوش کنوک ءُ چاروکے۔

جنین ءِ گُلامی ءِ گپ ءَ تیوگیں دگنیا ءِ سرپدیں ءُ علمی مردُم من اَنت، آ دگہ گپے کہ بلوچ ءَ سک دیراں پد وتی جنینانی گُلامی ءِ سماه بوتگ۔

بلئے همیشانی تہ ءَ هم مزنیں کچے ءَ اے منّ اِتگ کہ بلوچ جنین چو بلوچ مردین ءِ وڑا مستریں تاکتانی گُلام اِنت ءُ چُشیں سک کم مردُم بوتگ اَنت کہ آیاں اے گپ تیوگی ءَ زانتگ کہ جنین داں کرناں، مردینءِ واجهی نزام ءَ بِگرداں هرچیز ءَ کہ مردین ءِ دسترس هست جنین آئی ءِ پانچُلان اِنت۔

من بلوچ زانتکار ءُ ادبی مردُمانی منّوگراں اگاں آ اے لیکہ ءَ دارنت کہ بلوچ تیوگی ءَ مزنیں تاکتے ءِ گُلام اِنت تهنا جنین اِناں بلئے آیاں اے هم منّگ لوٹیت کہ بلوچ جنین مزنیں زوراکی ءِ گلامی ءِ همرائی ءَ لس لوگ ءِ، لس مردین ءِ هم گُلام اِنت۔

راستی ءِ نہ منّگ جاهلی یے ءُ بلوچ راج ءِ هرچ تک ءِ مردُمانی تہ ءَ اے جاهلی هست اَنت، همے مُچّی ءَ بلوچ جنین آنی جند هم هوار اَنت گوں۔ کہ آ چو پاکستانی سدف کنول ءِ وڑا وتی گُلام بوهگ ءِ منوگِر نہ اَنت! 

 جنینانی گلام نہ بوهگ ءِ سرا شال ءِ درور دیئگ بیت کہ شال ءَ بچار چینچو جِنک اتکگ وانگ ءَ، کراچی ءَ بچار بلوچ جنین وانگ ءَ یاں، کار ءَ یاں، اِزم ءَ گوں همگرنچ اَنت، سیاست ءُ راجکاری ءَ گوں همگرنچ اَنت۔

اے مردُم اسلا وتی جاھلیں لیکہ آنی سرا گیشتر اوشتگ ءِ واستہ وت ءَ همے چار ءُ پنچیں جنینانی درور ءَ دیئنت ءُ وت ءَ رد دیئنت۔

بلئے براتاں اے وڑ راستی ءَ گوں وت ءَ یک کِر کنگ ءَ چہ اے گپ چیر نہ بیت۔

اسلا جیڑہ اِش اِنت کہ بلوچ تنیگہ وتی کُھنّیں پِگر، ربیدگ ءُ زنداب ءِ یل کنگ ءَ تیار نہ اِنت، آیاں نہ الکاپ آزاتی ءِ بارا ءَ سرپدی یے هست ءُ ناکہ گُلامی ءِ پمیشکا آ چار جنین ءِ وانگ ءَ آئی ءِ آزاتی سرپد بنت، چار جِنک ءَ بے گُشان ءَ گندگ ءَ چہ آیانی کُھّنیں رَگ جہ جن اَنت ءُ بِنا بنت بٹاکبازی ءَ کہ" جنین ماس*س گلام نہ اِنت، بچار ادا اے کمّو آزات کنگ بوتگ اَنت، اِشاں وتی دودھ یل دات اَنت ءُ دگ آنی سرا ناچ ءَ اَنت۔"

جنین ءَ زاناں تئ ربیدگ ءِ ٹیکہ زُرتگ؟ بِچار سنگت اے اهد ءَ هرکس وتی شر ءُ هراب ءَ زانت، بلے اگاں کسے هراب ءَ زوریت ءُ گُمراه بیت ناں تو داشت ئے کن ئے ناں من ۔۔۔۔۔ مرچی ھزاراں بلوچ مردین بلوچ ءِ جند ءِ بدواه اَنت ۔۔۔۔ آ گُمراہ اَنت ناں؟ بلئے آیانی ھلاپ ءَ تو چے کنگ ءَ ئے؟ هچ ناں؟ همے واستہ کہ تئ دست نرسیت، تئ دست بلوچ جنکے ءَ رسیت بس!  کہ راہ رواجی آئی ءِ گُشان کپیت تئ ربیدگ گار بیت هاں؟ 

کمالیں گندئے؟ 

منی سر ادا پر نہ بیت کہ تو یک انچیں اهدے ءَ جنین ءِ گلامی ءِ نہ منّوک ئے کہ آھودا ھرچیز پہ سر زاھر بوھگ ءَ اِنت ۔۔۔۔ بلوچ جنین ءِ لوگ ءَ نندگ ءَ بِگر داں همنِپاد بوهگ ءِ سهت ءَ هم تو ئے مردین آهی ءِ سرا مستری کنئے ءُ تو انگت گُش ئے کہ بلوچ جنین گلام نہ انت ۔

چار سرپدیں ءُ وانندئیں بلوچ ءِ چُک شال ءُ کراچی ءُ پنجاپ ءَ وانگ ءَ کاینت تو گُشئے کہ بلوچ جنین گلام نہ انت ۔

بلئے تو اے بیھال بئے کہ بلوچستان ءِ پدمنتگیں دمگاں بلوچ جنین کُجام بزّگی ءَ گوں زندگی کنگ ءَ اَنت، آ کُجام هد ءَ داں ڈومیسٹک وائلنس ءُ ناهکّیانی تہ ءَ زندگی ءَ تیلانک دیئگ ءَ اَنت ۔ آیانی تہ ءَ مزنیں کچّے چہ علم ءُ زانت ءِ دُگنیا ءَ دور یک کُهنّ ءُ گئیتگیں چاگردے ءَ زندگی کنگ ءَ اَنت ۔۔۔ آ زاناں بلوچ زال نہ انت؟ آیاں زندگی کنگ ءِ هک نیست؟ یا آ بلوچ مردینانی شپانی هوس ءُ روچ ءِ زلورت آنی پورا کنگ ءَ پیداگ بوتگ اَنت؟ 

تو ئے بلوچ مردین، سرپدیں ءُ وانندئیں مردین ءِ بائد نہ انت کہ اے وڑیں لس جیڑھ یے ءِ نہ منّوک بہ بیت، پدا یک انچیں مانگ یے ءَ کہ ھرچیز پہ زاھری بوھگ ءَ اِنت۔

من زاناں تئ مجگ ءَ اے گپ چِست بوهگ ءَ اِنت کہ بلوچ مرچی وتواجہ نہ انت، ھمے واستہ مردین ءُ جنین دوئیں بزّگی ءَ گوں زندگی کنگ ءَ اَنت۔

بلے اے گپ ءَ بیهال مہ بو کہ تئ جنین مستریں زوراکی آں ابید تئ جند ءِ زوراکی آنی آماچ اِنت اے گپ ءِ درور اِش انت کہ ھمے جاورانی تہ ءَ بلوچ مردین ءِ مزنیں کچ یے ءَ ونتگ، نوکری گِپتگ، سور ءُ چُک آں ابید وتی زندگی گوں کمّو گھتریں رنگ یے ءَ گوازینتگ بلئے بلوچ جنین کُربانی ءِ پس کُتگ ءُ نوک ورنایی ءَ سور داتگ کہ ترا اُمیت مان نیست۔۔۔۔۔ مزنیں زوراکی ءِ چیرا توئے مردین ءَ ونت ءُ اهد ءِ همراه بوت ئے بلئے جنین تو لوگ ءَ نادینت! اگاں جاور شمئے دوئینانی گلامی ئیگ ءِ اِتاں گُڑا توئے مردین ءَ چونیا ونت؟چونیا تو لوگ ءَ چہ ڈن درتکئے؟  

جاور گلامی ءِ بوتگ اَنت بلئے تھنا پہ جنین ءَ! تو جنین برے مزهبی لیکہ آں گوں بستگ، برے بلوچ دودھ آنی چادر پر داتگ ءُ پشت کپینتگ ۔

ءُ یک گپ یے اِش انت کہ بلوچ ربیدگ ءِ سیمبولِک کنوک کہ آیاں مرچیگیں بلوچ جنینانی بے گُشان بوهگ ءِ سرا مسلا هست من ءَ بگُشاں کہ بلوچ جنین آنی تہ ءَ هزاراں جنین هست کہ ربیدگ ءُ دودھ یے ماں کوپگ ءَ کُتگ اَنت بلے آیانی کِرد چی اِنت؟ آیاں پہ راج ءَ چے زهم جتگ؟ بس تئ گلام بوتگ ءُ بلوچ دودھ یے پہازتگ انت؟ بس؟ 

بلئے ھمے چاریں بے گُشانیں بلوچ جِنک مرچی ڈاکٹر اَنت، نبشتکار انت، اِزمکار ءُ دگہ دگہ علمی پِڑاں ھوار اَنت ۔۔۔ کم چہ کم وتی گلامی ءِ هبراں وَ کن اَنت۔

بلوچ مردین ءَ مرچی اے گپ هرچ هالا منّگی اِنت کہ آئی ءِ جنین، مات، گُهار، نشار، تروزتک مردین واجهی نزام ءِ گُلام اَنت، لس لوگ ءِ، لس بچک ءِ گُلام اَنت۔

اگاں آ شرّیں ءُ جوانتریں باندات یے لوٹاں گُڑا اے گلامی ءِ رَویت آیاں نو هتم کنگ لوٹیت داں بلوچ گوں همے درتہ پُچّی ءَ، گژنگی ءَ وتی مردینانی هواری ءَ جنین ءَ هم بہ وانین اَنت، آیاں گیش مزهبی ءُ ربیدگی سانکلاں گوں مہ بند اَنت ۔