گوادر آل پارٹیز ءِ دھرنہ ءُ پدا دھرنہ ءُ دھرنہ ءِ سرا دھرنہ۔۔۔ لوٹ چی اَنت؟

 گوادر آل پارٹیز ءِ دھرنہ ءُ پدا دھرنہ ءُ دھرنہ ءِ سرا دھرنہ۔۔۔ لوٹ چی اَنت؟

گوادرءَ داں ھمک مردمءَ ھوش کنت دیوالانی سرا لوٹ ھمے نبشتہ انت کہ مرچی ھم بوھگءَ آں۔ لوٹ کنوک ھم ھمیش انت۔ لوٹانی پیلو کنگءِ دعویٰ کنوک ھم ھمیش۔ سرکارانی بھر ھم ھمیش انت ءُ چاگردی گُشاد کار ھم ھمیش۔۔۔۔ بلئے ھئیر ھمے وڑیں لوٹ ءُ مردمانی بابتءَ سنگتےءَ کسہے آرتگ ات کہ۔۔۔۔۔

بیت یک بادشاہے۔۔۔۔ بادشاہءَ رَیَّت ءُ مُلکے ھست اَت۔ بلئے بادشاہ ءِ ریت ءُ آہانی سروک درست بگا اِت انت۔ (بگا ھارانی سنگت شُلّگ ءُ دمبُرتگیں یا نابودیں مردمءَ گُش انت)، گڑا بادشاہءَ اوپار نہ شُت کہ اے چونیں مُلکے۔۔۔ اے منی چونیں ریاستے۔۔۔۔ کہ کسے روچے وائے ھم نہ کنت۔ کسے توارے بُرز نہ کنت کہ من بزاناں من بادشاہے آں ءُ منءَ یک سسٹمے ھست۔

بادشاہءَ اوپار نہ شُت ۔ بادشاہ ءَ زانگ لوٹ اِت کہ منءَ پد، منی ریت ءُ مہلوکءَ سروکے ھست اوں یا اناں۔۔۔۔ گڑا پہ چکاسگءَ بادشاہءَ وتی کابینہ لوٹائینت ءُ وتی نزیکیں وزیر پرمات انت کہ شما وڑے بکن اِت داں من بزاناں کہ منءَ یک سسٹمے ھست۔ منءَ مہلوک ھست ءُ پدا منی مہلوکءَ جھلءَ مردم ھست۔ داں منءَ پد منی مہلوکءِ جاور چون بیت ءُ منی ھستیءَ منی مہلوک منی ھلاپ کجام وھدءَ چے چے کُت کنت۔ وزیراں وت مں وت سوڑگ کُرت ءُ گامگیج زورگ بنا کُت۔

وزیراں مُپت ءُ ناھک ھر چیزءِ سرا ٹیکس جت۔ گران نہادی بیت۔ وردن، تیل، ٹرانسپورٹ دروست گران کنگ بوت بلئے مردماں گوش نہ سُرینت۔ بادشاہ گوں وزیراں سک ھئیران اَت کہ اے چون؟ منی مردم زندگیں مردماں ناں؟ آہانی تہءَ پگر ءُ سنچ ھست اوں یا اناں۔۔۔۔ بلئے ھچ۔

انگت دیمءَ بادشاہءَ جار پرینت کہ آپی آپءَ مہ رو انت۔ کاری کارءَ۔ کس دریا ءَ مہ رؤت۔ بس یک ءُ دو کلاکءِ کہ من رزا دئیاں ھمے وھدءَ روگءِ رزا انت۔ نادرہ جاہاں دوائی ءُ درمان چیر دات انت۔ وانگ جاہ بند کُت انت۔ ھما کہ آہاں وانگءِ ھُب ھست اَت آ چُک گار کُت انت۔ تُرس ءُ بیم ھر نیمءَ شنگ شانگ کُت۔۔۔۔ بلئے انگت اوں ھچ۔

بادشاہءَ نی گنتر اوپار نہ شُت گڑا بادشاہءَ وتی سپائیاں ھکم دات کہ اینچو گامگیجانی زورگءَ رند ھم جاور چُش انت گڑا نی چُش کن اِت کہ ھرکس ھمے گیشینتگیں وھدءَ کہ ڈنءَ در کئیت یا دریا ءُ روزگارءَ روت گڑاں آہاں روگ ءُ آھگءِ وھدءَ بہ دار اِت ءُ چمپل بجن اِت۔

بادشاہءِ ھکم منَّگ بوت۔ ءُ ھرکس کہ چہ لوگاں دَر اَتک ءُ پدا واتر اَتک آہاں وارت چمپل کلاگوشاں۔۔۔۔

یک روچے نہ گوست کہ مردم مُچ بوہان بوت انت ءُ روانکے کشگ بوت دیم پہ بادشاہءِ ماڑیءَ۔۔۔۔۔ بلئے نیم راہ ءَ پدا روانکءِ سروکاں وتی روانکءِ دیم تر اینت ءُ اتک آں شھرءِ یک کُنڈےءَ نشت انت ءُ وتی زہرشانی بندات کُت۔ یک برے وَ بادشاہ سک ھئیران بوت کہ روانکءَ وتی دیم آنگو پرچا ترینت۔۔۔۔ بلئے پدا آئیءَ اوپار نہ شُت گڑا وتی وزیرے دیم ئے دات کہ برو اشانی جیڑہاں جُست کن کہ شما روانکے کشتگ ءُ ادا ننداک داتگ؟

گڑا بادشاہ ءِ نمائندگ اتک زہرشانی کنوکیں مہلوکءِ سروکاں بادشاہءِ نامءَ کلوہ دیم دات کہ "بادشاہءَ بہ گُش تؤ کہ مارا چمپل جَنَگءِ ھُکم داتگ وَ شر انت بلئے گوں تؤ دزبندی انت کہ وتی چمپل جنوکاں گیشتر بکن اے پُج اِت نہ کنگءَ آں اگاں ناں مئے زہرشانی دیمءَ تُرند تِر بیت"۔

#گوادرءِتوار