نائن الیون ءِ وئیل ءُ ھلاس نہ بوکیں کسہ

جاوید بلوچ

 مرچیءَ چہ بیست سال پیش 11 ستمبر 2001 ءَ امریکہ ءِ شہر نیویارکءَ پیش اتکگیں وئیلاں جہان نائن الیونءِ نامءَ یات کنت۔ نائن الیون نی ایوک یک رمسے نہ بوت بلکیں اے کرنءِ گیشتر اسر داروکیں وئیل انت۔ مرچی جہانءِ مٹ بوتگیں جاور ءُ ھاس مئے کش ءُ گوراں پدّریں نگیگی، جنگ، کُشت ءُ ھون ءُ مزنیں مٹی ءُ بدلیانی سیادی ھم یا وَ تچکءَ گوں ھمے نائن الیونءَ انت یا آئی ءِ اسر انت۔ بہ گندئے نائن الیون مہ بوت انت باز چیز اے وڑ نہ بوتگ ات کہ مرچی چش انت ءُ باز کارانی مرچی اے وڑ بوھگءَ گوں اے ھم پدر بیت کہ آہاں گوں نائن الیونءَ جوڑینگ بیت بلئے اسلءَ آہاں گوں نائن الیونءَ تچکائیءَ سیادی نیست۔

اے گپءِ تہءَ ھچ شک نیست کہ مئے کش ءُ گوراں بوتگیں جنگءُ بیم کاری، اوگانستانءَ پروش ءُ پروش ءُ جہانءِ لہتیں نزوریں ملکانی باڑہ ءُ میان استمانی پنڈگءُ کمک نائن الیونءِ برورد انت۔ بہ گندئے نائن الیون مہ بوت انت باز چیز دیمءَ نہ شتگ ات۔ اے وھدءَ مرچیگیں رمسءَ اوگانستان پدا ھما جاگہءَ انت کہ مرچیءَ بیست سال پیسر بوتگ ءُ اگاں نائن الیون مہ بوت انت اے سپرءَ بیست سالءِ دراجیں پندے بُرتگ ات۔ بلئے ھئیر اے بیستیں سالانی اوشت آماچ بوھگءَ گوں تچکائیءَ پمیشکہ گوں نائن الیونءَ سیادی نیست کہ جہان اے جیڑگءَ انت کہ چش چون بوت کنت؟ امریکہ ءُ تالبانانی دژمنی چی بوتگ؟ جنگ چے سببءَ بنا بوتگ؟ ءُ ھما کارانی کنگءَ امریکہ اوگانستانءَ اتکگ ات بزاں اسامہ بن لادن ءِ گرگءَ۔۔۔ آئیءَ پد نی ادا چی لوٹیت؟۔۔۔۔ 

اے ھمے جُستاں کہ اشانی نزیکی گوں مئے دمگءَ انت پمیشکہ مئے دلءَ گیشتر ھمے چِست بنت بلئے جہانءَ ءُ ھاس امریکہ ءَ دگہ ھم کسہ باز انت۔ نائن الیونءِ سال روچءِ بابتءَ جہانی میڈیا ستمبرءِ دومی ہپتگءِ بندات بوھگءَ بگر داں ماہءِ نیمءَ ھمک سال گچینی ایں پیچر، نبشتانک ءُ پیکج جوڑ کنت ءُ پیش داریت ءُ اے بری ھم انچش کنگءَ انت۔ اے دگہ ترانے کہ ایجنڈا سیٹنگ میڈیاءِ لیکہءِ تہءَ اے جہانی پزوریں ملکانی یک مزنیں سلہ یے کہ آہانی میڈیا چیزاں انچش پیش داریت کہ لس مردم آئیءَ وتی جیڑہ بہ پہم ایت۔ 

یازدہ ستمبر 2001 ءِ سہبءَ را نائن الیون پمیشکہ نہ گش انت کہ اے رمس، ماہ ءُ سال ءِ نام انت بلکیں ھمے رمسءَ دو بوئنگ بالی گراب767، اولی سہبءِ 8:45 منٹءَ نیویارکءِ جاڑیں ماڑیانی تہءَ یکے گوریچانی ٹاورءَ لگیت ءُ اے 110 تبکءِ ماڑی چندیں دمانانی تہءَ دُوت ءُ دنزانی مُجے جوڑ بیت ءُ دگہ یک بالی گرابے چندیں منٹاں پد زرباری ٹاورءَ گوں ڈُکر وارت ءُ اے ماڑی ھم انچش جھلاد بیت۔ اے چندیں منٹانی تہءَ 2606 مردم بیران بیت۔ لکھانی مردم اے ندارگءَ انچش گندگءَ بنت کہ آ واب گندگءَ آں۔ چے بوھگءَ انت؟ اشییءِ پسوءِ شوہاز ءَ  گیش ھرکس انچش ابہکہ بیت کہ گش ئے ھرکس چندیں ساہتانی واستہ سنگ ءُ سیاہ بیت۔ ھمے اولی ماڑیءِ چہل ءُ ہپتمی تبکءَ برونوڈ بلنجر نامیں مردمے کارءَ بیت وھدے اے کزاہ بیت۔ بلنجر ءِ مارشت نیویارک ءِمیوزمءَ نبشتہ انت۔ آ گُشیت من لہتیں بیم ناکیں توار اِشکُتگ ءُ آئیءَ پد منی چمانی دیمءَ تہار ءُ لُنج بوتگ

اے ھال یک منٹےءَ پد بزاں 8:46 منٹ ءَ سرجمیں جہان ءَ ھم انچش ابہکہ کنت۔ آ وھدءِ امریکہ ءِ سروک چارج بُش یک اسکولےءِ ترءُتابءَ بیت وھدے اے وئیلءِ بابتءَ سرپد کنگ بیت۔ ھمے وڑءَ دگہ یک بالی گرابے واشگنٹن ءُ چارمی  بالی پنسولیناءِ ھد ءُ اویلاں کپیت۔ اے وئیلانی زمہ واریاں القاعدہ زور ایت بلئے امریکہ ءِ لس شہری ءُ جہانءِ واستہ اے ھال پرے ھاترءَ ھئیران ءُ ابہکہی بنت کہ اے کزاہ سپر پاوریں امریکہ ءِ تہءَ بوتگ انت ءُ جہان ءِ ترند تریں سیول ایویشن ءِ راہبندانی سرا جُست ودی کن انت۔ 

اے وئیلاں پیسر القاعدہ وتی بازیں جار ءُ بیانانی تہءَ امریکہءَ شیوار بوھگءِ بیہار ھم دنت ءُ اسرائیل ءَ ھوار جہان ءِ بازیں ملکانی ھالتاک ھم مزنیں ارشےءِ بابتءَ  پیش گُشی ھم کن انت بلئے اے ارش اے وڑءَ بیت، سی آئی اے ءُ پینٹا گونءِ ھم سر چکریت۔ 

اے وئیلءِ ھلاس نہ بوکیں کسہانی تہءَ پد لہتیں کسہ سک نامدار انت۔ چش کہ امریکہ ءِ تہءَ نوکتریں ھالانی بابتءَ مہلوک مزنیں کساسےءَ ویب سائٹاں چار انت کہ ویب سائٹ کار کنگءَ یلہ کن انت ءُ لہتیں دروگ انچش شنگ بیت کہ روچءِ مرچی ھم اشانی منوک ھست انت۔ اے دوئیں ماڑیانی سرا بالی گرابانی ارش کنگءِ تامرانی گندگءَ ابید ھم مزنیں کساسےءَ مہلوک ھمے باور کنت کہ جاڑیں ٹاورانی تہءَ بمب پیسرا چی مان بوتگ ءُ ھماہانی ترَکگءَ چہ ماڑی کپتگ انت۔ ھمے وڑءَ یک مزنیں کساسےءَ مردم ھمے من انت کہ اے بالی گراب نہ بوتگ انت بلکیں راکٹ میزائلاں گوں ارش کنگ بوتگ۔

نائن الیونءِ تباہیءَ پد دوئیں ماڑیانی دوت ءُ دنز بوھگءِ سرا پٹ ءُ پول کنگ یک مستریں کارے بوتگ کہ اشییءِ تہءَ اے پولگ بوتگ کہ بالی گرابانی ڈُکّر ورگءَ چہ ماڑی چش پرچہ کپتگ انت؟ 

اے پٹ ءُ پول امریکہءِ ماڑیانی بندگ ءُ ابرمی وئیلاں چہ پھازگءِ ادارگےءِ نیمءَ چہ کنگ بوتگ۔ پولءَ چہ ھمے پدر بوتگ کہ ماڑیانی کپگءِ دو مستریں سبب بوتگ انت۔ یکے آس ءُ دومی جکسگ۔ ارش کنوکیں بالی گُرابانی تیل لہتیں سُتکگ بلئے لہتیں ماڑیاں گوں لگگءَ پد رتکگ انت ءُ تیل ماڑیانی تبکاں تالان بوتگ ءُ پدا آہاں آس لگ اتگ۔ ماڑی ءِ دیوالانی تہءَ اسٹیل بوتگ انت پمیشکہ بازیں گرمءَ چہ اسٹیل وتی جاگہاں سُر اتگ انت ءُ پدا بیم ناکیں توار ءِ جکسگءَ چہ دیوالاں اسٹیل یلہ داتگ انت ءُ بے ترتیب کپتگ انت۔

جاڑیں ٹاورانی کپگ ءُ تبائیءَ انچش کہ مسلمانانی تہءَ یک  ٹولی یے ھمے من ایت کہ اشییءِ پیش گُشی قرآن مجید ءِ تہءَ پلاں آیت نمبر ءِ پلاں جاگہءَ پیسرا چہ گُشگ بوتگ ھمے وڑءَ پرانس ءِ نبشتہ کار ءُ استالانی علم زانت نوسٹرا ڈیمس ھم نائن الیونءَ پد سک نامدار بوتگ۔ ڈیمس شانزدہمی کرنءِ پرانسءِ یک نبشتہ کارے کہ آئیءَ وتی نبشتانکانی تہءَ آؤکیں وھدانی لہتیں وئیلانی بابتءَ ھئیالنک ءُ آزمانکی دروشمءَ پیش گُشی کتگ۔ نائن الیونءَ پد نوسٹرا ڈیمسءِ کتابانی لوٹءِ تہءَ مزنیں گیشی یے اتکگ۔ بلئے زانتکار ڈیمسءِ پیش گُشی آں ھئیالی سرپد بنت کہ آ فکشن انت ءُ ھر وئیلءَ وتءَ پِیٹ کن انت۔ 

نائن الیون ءَ وتی تہءَ ءُ وتی ھمرائیءَ بازیں ھلاس نہ بوکیں کسہ ودی کتگ بلئے لہتیں کسہاں گوں تچکائی ءَ نان الیونءَ سیادی نیست۔ ھو، آ نائن الیونءِ اسرات بوت کن انت۔ اگاں نائن الیونءِ وئیل ءِ نپ ءُ سیتانی بابتءَ ھم پول کنگ یا جیڑگ بہ بیت گڑا امریکہ اینچکیں مزنیں تاوانےءَ پد ھم بے بھر نہ انت ءُ امریکہ ءُ امریکہءِ گپ زورکیں شاگرداں ھاس ارب ءُ اربانی مریداں ھم مزنیں نپے دیستگ۔ پہ اشاں نائن الیونءِ ھلاس نہ بوکیں کسہ بے نپ اوں نہ آں۔