پنجاپءِ بلوچ نودربراں بِل ات کہ بلوچ انت

جاوید بلوچ

اکس: کمانچر بلوچ

بلوچ بوھگ چوناہا یک ارزانیں کارے نہ انت کہ اے ترا گوں دود ءُ راہبنداں ھوار یک سرجمیں مننگ نامہ یےءَ بندوک کنت کہ اشییءَ لگت مال کنگءَ رند ترا تئی چاگرد توری ھچ ھم مہ گُشیت بلئے جندئے پت یا چماں پٹے آپ مان بوت گڑا ضمیر ہِٹّ ءُ ملام کنت کہ اے نی بلوچی کارےءَ تو کت؟ 

 اشییءَ گوں بلوچ ماتےءِ لاپءَ پیداگ بوھگ، بلوچستانءِ جاہمنند بوھگ یا دریس ءُ پوشاک پوشگءَ گوں ھچ کار نیست۔۔۔ اے مھکمیں دودمانےءِ نام انت کہ اشییءِ وتی نارمز ءُ ایتھکس ھست انت۔ ناں کسےءِ کرا چُشیں سرٹیفکٹے ھست کہ اشییءَ بھر بکنت بدنت ءُ ناں زائری جاک ءُ شورے لوٹیت۔ 

بلئے بلوچ نودربر بوھگ دگہ یک گرانتریں بارے کہ کوپگاں بیت۔ بلوچ نودربر بوھگءِ زمہ واری یک سُبکیں ءُ ارزانیں کارے نہ انت کہ گوں یک گلّےءَ یا واجہ ءُ میر ءُ ادارہ یےءَ وتءَ ھوار بہ گیج ئے ءُ ھلاس۔  اے تئی گوست ءُ باندات ءِ چکاس انت کہ ترا ءُ تئی پُشپد ءُ آؤک آں کجا ءُ چون جاگہ دئیگ بہ بیت۔ اگاں کجام ھم بلوچ نودربرے مرچی وتی پدمنتگی ءُ بزگیءَ پد ھم وتءَ یک مزنیں ادارگے (ھاس بلوچستانءَ ڈن) سر کنت۔ وانیت ءُ وتءَ ءُ وتی بلوچ نودربر بوھگءِ شانءَ برجا داریت۔ تژن ءُ شگان سگیت، دین ءُ سیاستءِ نامءِ سرا داشتگیں ٹولیانی دیمءَ میلانک بیت ءُ وانیت، وتی نوکیں پدریچءَ پہ راہ پچ کنت ءُ وتی گوستگیں راہ شون ءُ راہدربرانی شرپءَ برجا داریت ءُ وتءَ ءُ وتی بلوچ بوھگءَ ائیبدار نہ کنت۔ ءُ درساں گیش آئی ءِ یکوئی۔ بلوچ نودربر بوھگءِ تپاکی برجا دارگ ۔۔۔ اے شان دگہ راجاں گون نہ انت۔

بلوچ نودربراں بلوچستانءَ ڈن وتی آؤکیں نوکیں نودربراں پہ راہ پچ کنگءِ ھاترءَ ھمک مزنیں شھرانی شاہ دربرجاہاں وتی تپاکیءِ پتر جوڑ کتگ دانکہ یک مُشتی بلوچءَ را زندگ بکنت ءُ وانگی ءُ داکلہانی کار ارزان تر بہ بنت۔ مرچی جیونیءَ بگر داں رکنی ءُ ھب چوکیءَ بگر داں نوکنڈی ءُ تپتان کجام ھم یک بلوچ نودربرےءَ پنجاپءِ کجام ھم شھرےءِ یونیورسٹیءَ داکلہ زورگی انت یا سرپدی گرگی انت گڑا آ بس ایوک بلوچءِ نامءِ سرا یک بلوچےءَ فون کنت ءُ آئیءِ کار بنت۔ 

بلئے ھمے نودربرءَ وتی جندئے شالءَ اگاں داکلہ زورگی انت گڑا ہزار برءَ جیڑ ایت کہ کجام بی ایس او ءَ گوں اھوال بکن آں۔۔۔ کجام سیاستدانءَ بگر آں کہ منی سیٹءَ کنائین ایت۔ اگاں اشاں من فون کت گڑا پدا داکلہءَ پد منءَ کلاس گرگی انت یا سرکل؟ ءُ اگاں پلاں پارٹیءِ زہرشانی بیت ءُ آہانی چیر دستیں نودربر گلّءِ نودربر شُتاں ءُ من مہ رو آں منءَ ہاسٹل رسیت یا اناں؟ ووٹءِ وھدءَ من کئی تران ءُ توسیپی پوسٹاں سوشل میڈیاءَ فرزند ءِ پلانی ءُ ہر دل عزیز بہ لک آں ءُ شیئر بکن آں؟۔۔۔۔

اے جُست اسلام آباد ءُ پنجاپءِ شاہ دربرجاہاں داکلہ زوروکیں بلوچ نودربرانی دلءَ نئیَنت چیاکہ آہانی سرجمیں کار ایوک بلوچ نودربر بوھگءِ سببءَ بنت۔ ءُ چدءُ لہتیں سال پیسر کراچی شاہ دربرجاہءِ نودربرانی کار ھم انچش بوتگ ات انت۔۔۔ بلئے نی یک نودربرے کہ کراچی شاہ دربرجاہءَ داکلہ زور ایت گڑا آئیءِ بلوچیت ءِ چکاس سے جُتائیں جاگہاں بیت۔ آئیءَ آدینگءِ روچءَ اگاں وتءَ شرّیں بلوچے پیش دارگی انت گڑا پلاں لکچرءَ بہ روت، کمو بلوچ ءُ کمو فیمنسٹ ءُ سوشلسٹے پیش دارگی انت گڑا دگہ لیکچر رومےءَ بہ روت ءُ اگاں باگی ءُ یک نمبر بلوچے ثابت بوھگی انت گڑا سیمی آپشنءَ کارمرز بکنت۔  سے سے لیکچر وَ ھرابیں کارے نہ انت بلئے اے سے ایں لیکچرانی میانءَ اگاں تو ایوک یک لس بلوچ نودربرے یے ءُ ردیءِ سرا تئی داکلہ کراچی شاہ دربرجاہءَ بوتگ گڑا دیمءِ بلوچ نودربرءَ گندگءَ گوں سلامءِ دئیگءَ اے گپءَ وتی دلءَ پکہ بکن کہ ترا اگاں دگہ یکےءَ دیست گڑا تو سیمی پارٹی ءِ بلوچے یے یا تئی دگہ چارمی پارٹی یے ھم ھست۔

بلوچے بوھگ ءِ وھدءَ کراچی شاہ دربرجاہءَ ایوک بلوچانی داکلہ بوتگ ات۔ مین لائبریریءَ ھر بلوچ وت پہ دیم شُتگ ات ناں کارڈ پیشدار ءُ ناں "اپنی شناخت کرائیں" ۔ فن پیئر ءُ کلچر مراگش ایوک بلوچانی بوتگ ات۔ پروفیسر ءُ دگہ ایڈمن ءُ دپتراں بلوچ وت ھسابی انت بلئے ھردیں بلوچ نودربرے شتگ ات گڑا آئیءِ کار ءُ شرپ ایوک بلوچ نودربرے ءِ بستارءَ بوتگ ات۔ سندھی ءُ اردو اسپیکنگ ایں نودربر گلانی میانءَ بلوچ نودربر ایوک بلوچءِ نامءَ زانگ بوتگ ات۔ بلئے نی کہ یک نمبر بلوچ، دو نمبر بلوچ ءُ سے نمبر بلوچ ءِ دگہ دگہ ورائٹی کراچی شاہ دربرجاہ ءَ چہ شالءُ اوتھلءَ آرگ بوتگ انت۔ نی لائبریریءَ بلوچ نودربرءَ کارڈ پیشدارگ لوٹیت۔ نی کلچر واک ءُ فن پیئر ءَ بگر اسٹیڈی سرکل ءَ درآمدانی دیمءَ پیشدارگ بیت کہ آہانی شلوار ھم مزن انت بلئے آ اسلی بلوچ نہ آں ءُ اسلی ما انت۔ نی پوسٹر ءُ پینا فلکس دگہ دگہ مونوگرامانی ھمرائیءَ جتا جتا لگ انت۔ بزاں کہ نی اودءَ اوں بی ایس او الپ۔ ب۔ ی۔ ے ھست انت۔

ءُ ھما درد واریں بلوچاں کہ اے نیکیں کار کت انت کہ کراچی شاہ دربرجاہءِ بلوچ اسلی بلوچ نہ آں ما کا انت ءُ اشاں اسلی بلوچ جوڑ کن انت آ وت مرچی اسلی ءُ نقلی ءِ میانءَ بھر ءُ بانک انت ءُ اے بھر ءُ بانک ءَ ناں ایوکءَ کراچی شاہ دربرجاہءِ بلوچ نودربراں تاوان دات بلکیں بلوچستانءِ تہءَ سیاسی ءُ ووٹءِ واستہ داشتگیں نودربرانی لہتیں گلاں کہ یک اسپیسے ھالیگ کتگ ات ءُ لس بلوچ نودربرانی واستہ یک راہ یے پچ ات کہ بے جھنڈہ جَنَگ ءُ توسیپ کنگءَ ھم تؤ بلوچستانءَ یک لس بلوچ نودربر گلےءِ باسک بوت کن ئے ۔۔۔ اے ھم تاوان بار بوت۔ مرچی ایوک دستانی اکس پش کپتگ انت کہ لس بلوچ نودربر آہاں بچار ایت ءُ وتی سرا پنچ بجنت کہ اشانی توکءَ اسلی دست کجام اَنت ءُ نقلی کجام؟ جُست بکن ئے گڑا یکےءِ لاجک ءُ الزام چہ دومیءَ گیشتر انت۔ گُشگءَ وَ دیوبندی گش انت ما پیسرا جنتءَ رو انت ءُ بریلوی گش انت ما۔۔۔ 

بلئے ھئیر اے نادراھی ءِ الاج نہ بوت کہ نی ھمے نادراھیءِ اسر ءُ سازش دیم پہ پنجاپ ءَ روان اَنت۔ ملتانءِ بلوچ نودربراں ایوک بلوچ نودربر بوھگءِ نامءَ یک مزنیں پندے بُر ات ءُ سوبمندی یے وتی نامءَ کت۔ اے سوبمندیءَ پد ھمے کراچی شاہ دربرجاہ والا نادراھیءَ سر کَش ات بلئے شگر ھداءِ کہ اودءَ نادراھیءَ سر وتی شومکءَ نہ جت ءُ ھلاس بوت بلئے نی بلوچانی مستریں تپاکیءِ جاہ ءُ پنجاپءِ مستریں شاہ دربرجاہءَ اے نادراھیءِ آرگءَ پہ دزمانجنی بوھگءَ انت۔ بزاں ھدا مکنت نی اودءَ ھم یک نمبر بلوچ، دو نمبر بلوچ ءُ سے نمبر بلوچانی جتا جتا لیکچر، اسٹیڈی سرکل ءُ نام بنت۔ پدا ھمے یک نمبر ءُ دو نمبر وت مں وت چُک دئیان کن انت ءُ گیشتر بوہان بنت۔

بیت کنت چر ایشیءَ چو کراچی شاہ دربرجاہءَ لہتیں سنگتاں عہدہ زورگءِ واستہ جتائیں آپشن بہ رسیت۔ بلوچانی چیئرمین سے سے بہ بنت۔ ءُ بلوچ نودربر پہ عہدگانی واستہ تنگ مہ بنت ءُ پدا وتی اسٹیٹساں پہ مڑائے  ایر بکن انت کہ "سمی کتاباں دست مجن" بلئے سمیانی کارے ھئیر بالاچ بزگ نوک داکلہ زورگءَ پد ھئیران بنت کہ آ کجام نمبر بلوچ بہ بنت ءُ کجام سرکلءَ برو آں۔۔۔۔