چیہانٹ
آئی ءَ وتی گژنگیں چُک بڑّا اَت ۔۔۔۔ جمبر سرا گرندگ ءَ اِتاں ۔ آئی ءَ آزمان چارت داں دیست ئے کہ جمبر چہ روکپت ءَ بندگ ءَ اَنت ۔
" منی چک، روکپت ءِ جمبر هروهد گواریت "
آئی ءَ وتی رپتگیں پت ءِ ھمے گپ یات اتک ءُ آ زوت پہ وت چت یے شوہازگ ءِ جهد ءَ اَت ۔
اسلا آئی ءِ پت هپتاد دهک ءَ گوں لشکرے ءَ جنگ ءِ میان ءَ جنگ بوتگ اَت، ماتے چوناہیگہ پیر ءُ هاجز بوتگ اَت پمشکا مرد ءِ روَگ ءَ رند آ هم دیراں نہ جہل ات۔ میتگ ءِ سر کماشاں آ گوں درامدے ءَ سانگ دات۔۔۔ مرد ءَ آ چہ میتگ ءَ لڑینّت ءُ شهر ءَ آؤرت۔ چوشکہ آئی ءِ سور کسانیں اُمرے ءَ بوتگ اَت پمیشکہ سور ءِ داں دا سال ءَ آئی ءَ چُک نہ بوت ءُ مرد ءَ آ یل دات ۔ مرد ءِ یل دیئگ ءِ شس ماه ءَ رند آئی ءَ وتی چُک ماتی ءِ سماه بوت ۔ اے نیام ءَ آئی ءَ برے یک یے ءِ لوئیگ ءُ رزان شُشتاں ءُ برے یک یے ء گُد شُشتنت ءُ گزران کُت بلے نو آئی ءِچک ءَ دو سال سرجم اَت پہ آئی ءَ چُک ءِ دارگ ءُ رزان شودگ ارزان نہ ات پمیشکہ آئی ءَ اے جنجالای تہ ءَ ارزان تریں کار پِنڑگ سماه بوت ءُ روچے چار راه ءِ سرا، روچے نوکیں دگ یے ءِ سرا پِنڑت ۔
آئی ءَ دو درچک ءِ میان ءَ گونی یے پچ کُت ءُ چُک کُٹّ ءَ واپینت ۔۔۔۔ آ جیڑگ ءَ ات کہ نو آئی ءَ چک ءِ وردن ءِ واستہ شیر یا بسکوٹ یے لوٹیت ۔۔۔ ھور ءَ گوارگ بِنا کُت ۔۔۔۔۔ ھور سک تینز ات بلے چہ ھور ءِ ترمپاں مستر آئی ءِچک ءِ ارس اِتاں کہ پہ گُژن گریوگ ءَ اَت۔ آئی ءَ وتی هُشکیں گودان چُک ءِ دپ ءَ داتنت ۔ چک پہ دمانے ءَ ساڑت بلے زوت آئی ءَ مات ءِ گوَرانی ھُشکی مارِت ءُ دوبر گریوگ بِنا کُت۔
اے دمان ءَ ناں آئی ءهُشکیں گودانانی سرا بزّگ پیداک اَت ءُ نہکہ وتی بھت ءِ ۔۔۔۔ آ بس چُک ءِ سرا بزّک کنگ ءَ اَت، آئی ءِ بهت ءِ سرا ارس گوُارگ ءَ اَت ۔
شپ ءَ تیوگیں شهر تہار کُتگ ات، کُچک آنی چانگگ ءِ توار اَت، هور نزّ ترتکگ، ٹریفک ءِ بتّی چمُکی جنگ ءَ اِتاں۔
آئی ءَ انچو سماه بوهگ ءَ اَت پورا شهر تیوگی ءَ مُرتگ، پورا آئی ءِچک ءِ هیسکارگانی توار دوبر تهنّا همائی ءِ گوشاں کپگ ءَ اَنت، آئی ءَ انچو سماه بوهگ ءَ ات پورا اے تیوگیں شهر ءِ زندگیں شے تهنّا آ، آئی ءِ چُک ءُ چانگوکیں کُچک اِتاں۔
َآ انچو گُمان کنگ ءَ ات کہ گاڑی یے ءِ بتّی زاهر بوتاں ۔۔۔۔۔ آئی ءَ یکدمان ءَ چک بڑّا کُت ءُ پاداتک ءُ دگ ءِ سرا اوشتات ءُ گاڑی ءِ اوشتارین ءِ واستہ اِشاره کنگ ءَ لگ اِت بلے گاڑی گوَست ۔
آئی ءَ وتی بے وسی ءِ سرا دپ پچ لگوشت ءُ گوں زوراں چیچال جت ۔ گاڑی کمّو دیم ءَ روگ ءَ رند اوشتات ۔ آئی ءَ گاڑی ءِ نیمگ ءَ چارت گاڑی پدا پُشت ءَ پیداک اَت۔ آئی ءِ شکل ءَ بچکندگ یے شِنگ اِت ءُ پہ گنوکی گاڑی ءِ نیمگ ءَ تچان بوت۔
گاڑی کانچ جہل بوتگ اِتاں، آئی ءَ وتی چک بڑّا اَت ءُ دست بستگ ءُ گُشگ ءَ اَت " واجہ منی چک ءَ بیگا ئیگیں هِچ نہ وارتگ، اے گژن ءَ بزّگ اِنت، مِرگی اِنت، ترا چیز یے گون؟ بسکوٹ یے؟ شیر یے؟۔ "
گاڑی ءَ نندوکیں مردکار ءَ آئی ءِ گپّاں چہ گیش ۔۔۔۔۔ آئی میچلتگیں بدن ارزشت دات ۔۔۔۔۔۔۔!
درچک ءِ چیرا گونی ءِ سرا آئی ءِ چُک چیہانٹ جنگ ءَ اَت، ٹریفک ءِ بتّی چمُکی جنگ ءَ اِتاں ۔۔۔۔ آ گاڑی ءِ تہ ءَ سیائیں کانچاں چہ ڈّن، وتی چُک ءَ ءَ چارگ ءَ اَت ۔ آ گَل ات کہ کمّو دیرا رند چُک ءِ گُژن هتم بیت۔
دمانے ءَ رند گاڑی ءِ دروازگ پچ بوت ۔۔۔۔ آ چہ گاڑی ءَ درتک، آئی ءَ بسکوٹ یے گون اَت ۔
گاڑی شُتگ اَت، ٹریفک ءِ بتّی چمکی جنگ ءَ اِتاں، درچک ءِ چیرا آئی ءَ وت ءَ تِکہ داتگ اَت۔۔۔۔۔۔ آئی ءَ دمانے ءَ پیسر سماه بوتگ اَت کہ بسکوٹ ءِ آرگ ءَ پیسر آئی ءِ چُک ءَ وپات کُتگ!
No comments:
Post a Comment