بلوچ ازمکار، منیر راہی ءَ سالے سرجم کُت بلئے بژن۔۔۔۔

 بلوچ ازمکار، منیر راہی ءَ سالے سرجم کُت بلئے بژن۔۔۔۔

گوادرءِتوار 

22 ستمبرءِ نیم روچءَ وھدے گوادر ءِ توار ءَ بلوچ ازمکار، تامر کار ءُ نبشتہ کارانی لیکہ ءُ دلپدردی یک جاہ کت انت ءُ اے ھال شنگ کت کہ منیر راہی بیران بوتگ۔

مرچی اے گپءَ وتی اولی سال سرجم کت۔ منیر ءِ کتگیں کار ءُ یات وَ دائم نمیران انت بلئے بلوچی تامر کاریءِ پڑءِ سرا لہتیں جُست ھم دائم ایر بنت۔ چُش کہ بلوچ ءِ کرا سیاست ءُ سیاسی سروک ایوک لاپ گروک ءُ وروکاں گُش انت۔ آ نہ وت شر بنت ءُ نہ آہانی چیر دستیں نودربر گل۔ پمیشکہ یکیں نعرہ، یکیں کار ءُ یکیں بلوچءِ نامءِ گروک وت بہ یک نہ بنت۔ روچ پہ روچ زاہگ ءُ چُک دئیان آں ۔ ھمے وڑءَ مئے کرا لبزانکی ءُ ازمی گل ءُ ادارگ ھم۔ گوادر ءِ وڑیں کسانیں شھرےءَ ھم ھمے وڑ انت۔ نی و بلکیں انچو سما بیت کہ چو پنڈوگرانی مافیاہانی وڑءَ ھر یکےءَ وتی ھدّءُ اویل ھم گیشینتگ انت کہ اے بازار منی انت ءُ آ چوکءُ چار راہ تئی۔ 

مئے لبزانکی گل برے عطاءِ نام ءَ برے سید ءِ نام ءَ وتی وتی میتگ ءُ سرکلءِ تہءَ پمیشکہ پروگرام کن انت کہ یکے وَ اے دومیءِ نہ من انت ءُ دومی ھرکس لوٹیت منی دُکّان بند مہ بیت۔

ھمے وڑءَ مئے ازمی گلّ ھم، اشانی ھم بھر ءُ بانک بوھگءِ جیڑہ اے نہ انت کہ ٹیلنٹ باز انت ءُ جاگہ کم۔ بلکیں اشانی ھم وتی وتی دکانداری ءِ مسئلہ انت کہ یکے دومیءِ ھور بوھگءِ جاگہءَ تو گندئے روچے یک نوکیں دکانے پچ بیت۔ ءُ ھرکسءَ وتی واستہ چو پنڈوگرانی ٹولیانی وڑءَ یک جاگہے گیشینتگ۔ یک گلّےءَ سادءِ کنڈگءِ بُرز زُرتگ گڑا دومی موسی موڑ۔ سیمیءَ دمگی میر ءُ معتبرے۔ ءُ چارمیءَ سرکاری آفیسرے ءُ دگہ یکے سماجی تنظیمءِ نامءَ ادارگے۔۔۔۔

اے وڑیں جاوراں ھما کہ کمو چالاک تر بیت آ وَ لاپءَ نہ کپیت بلئے ازم ءُ نوک باھندیں ازمکار اللہءِ باھوٹاں۔۔

انچش منیر راہی۔۔۔ مرچی منیر راہی یک ازمکارے ءُ بلوچی شھدیں زبان آئیءَ دائم زندگ کنت بلئے منیرءِ وڑیں نوک باھندیں ازمکار ھچ گل ءُ ادارگءِ نہ بنت داں زندگاں۔ 

منیرءِ بیرانی پد گوادر ءِ توار ءَ جھد کت کہ آئیءِ ازم ءُ زندءِ سرا یک کسانیں کارے پہ کدءِ وت بہ کنت۔ اے درگتءَ منیرءِ زندءِ بابتءَ کمو سرپدی ھم چنگءُ نز آرگ بیت۔ اسکرپٹ ءُ جُست ھم نبشتہ کنگ بوت انت ءُ منیر ءِ نزیکیں ازمکار ءُ گلّاں گوں گپ ھم کنگ بیت بلئے منیرءِ نزیک تریں وتگڑیں پہ نام بلوچی تامر کاریءِ کمک کاراں اے کار ءَ را کارے نہ پہم ات کہ کار سرجم بوت ایں۔۔۔ 

مرچی اناں باندہ۔ انی اناں دیمءَ۔۔۔۔۔ چشءِ بدلءَ چش۔۔۔۔ ءُ آسر ھچ۔ سالے سرجم بوت۔ ما ھمے پہم ات کہ بیت کنت  ما نوکیں نودربریں ناں کیمرہءِ اینگلاں سرپد انت ءُ ناں ڈاکیومینٹری ءُ رپورٹ جوڑ کنگءِ داباں۔ ءُ پدا گوادر ءِ توارءِ بستار چی انت کہ اے وڑیں کارے بکنت ءُ پدا چُشیں وتی دلءَ مزنیں ازمکار ادا انٹریو ءُ ٹائم بدینت۔۔۔۔

ھمے گمان کت کہ پہ منیرءَ ھمے ادارگ وت یک شرتریں کارے کن انت بلئے سالے سرجم بیت چُشیں ھچ کار نہ بیت اگاں بیتگ گڑا ما وتی نزانتکاریءَ نہ دیستگ۔ بلئے ھئیر گوادرءِ توار بے سوب بوت۔ ایوک علی جان داد ھما ازمکار ءُ تامر کار ات کہ آئیءَ دو روچءِ تہءَ چہ چمن بارڈرءَ وتی ڈیوٹیءِ وھدءَ وھد کشت ءُ وتی انٹریو ریکارڈ کت ءُ دیم دات۔ گوادر ءِ توار سک گل بوت کہ نی دو روچ۔ سے روچ۔ ہپتگے آ دگہ کار ھم بنت ءُ سالے گوست۔۔۔۔۔

 مرچی گوادر ءِ توار وتی نابودی ءِ موتکءَ الہان کنگءَ انت ءُ پہ ھشکیں روچ پہ روچ گیش بوکیں بلوچی تامر کاریءِ نامءَ جوڑ بوکیں گلّ ءُ آہانی نامی ایں بلوچی ءُ بلوچ دوستانی پُرسءَ دارگءَ انت۔ بژن

منیر تؤ زندگ ئے داں زبان ھست۔