بلوچستان ءِ مستریں مسیت : مکّی مسیت دزآپ

 بلوچستان ءِ مستریں مسیت : مکّی مسیت دزآپ

ذوالفقار علی ذولفی

کراچی ءَ پد بلوچانی دومی مستریں شھر "دُز آپ" (زاھدان) انت ـ دزآپ باز کوھنیں شھرے نہ انت ـ ایشی ءِ گوستانک چہ سد سال ءَ ھم کم انت ـ انگریز ءِ ھاکمیت ءِ وھد ءَ اے یک کسانیں دیہہ یے اَت ـ انگریز ءَ چہ کوئٹہ ءَ اد ءَ ریل آؤرت ءُ دلمانگ بوت اے ریل ءِ لین ءَ داں ترکی ءَ بہ بارت ـ اے زمانگ ءَ یک نیمگ ءَ بلوچ ءُ انگریز ءِ نیام ءَ بانک گُل بی بی ءِ رھشونی ءَ مزنیں جنگے بوت ءُ دومی نیمگ ءَ دزآپ ءِ بھت ھم چست بوت ـ آ زمانگ ءَ ایران ءِ سرا قاجار بادشاھانی حکومت اَت ـ رند ءَ پھلوی کئول ءَ حکومت چہ قاجاراں پچ گپت ـ پھلوی بادشاھانی زمانگ ءَ دزآپ ءِ نام "زاھدان" ایر کنگ بوت ءُ اے کسانیں شھر روکپتی بلوچستان ءِ مرکز نامینگ بوت ـ چہ ایشی ءَ پد دزآپ ءَ سک باز دیمروی کت ءُ مروچی اے ایران ءِ دہ مستریں شھراں یکے ـ 

دزآپ ؛  رخشان ءِ بھر انت ـ اد ءَ گیشتریں مردم بلوچی ءِ رخشانی گالوار ءَ گپ کن انت ـ یک کسانیں بھرے ءِ زبان براھوئی انت ـ براھوئی زبان ءِ بُنجاہ بلے چوناھی ءَ میر جاوہ گوشگ بیت کہ تپتان ءِ ھمسائیگ انت ـ 

مولوی عبدالعزیز ملا زادہ بلوچستان ءِ مزن نامیں دینی عالمے زانگ بیت ـ واجہ بُندر ءَ "سرباز" ءِ جاہ منند انت بلے مزنیں مدتے ءَ دزآپ ءِ مستریں پیش امامے بیت ـ وھدے دزآپ ءِ آبادی باز بیت ءُ شھر روچ پہ روچ پراہ ءُ شاھگانی ءِ نیمگ ءَ تچان بیت گڑا واجہ مار ایت کہ شھر ءِ مستریں مسیت (دزآپ ءَ جمعہ ءِ نماز تھنا یک مسیتے ءَ بیت) نوں کسان تر اتگ،  نمازی سڑک ءُ دمکانی تہا نماز کنگ ءَ لاچار انت ـ 

1974 ءَ واجہ عبدالعزیز ملا زادہ کوھنیں شھر ءَ چہ کمّو در یک نوکیں مسیتے یے اڈ کنگ ءِ جار جنت ـ آ زمانگ ءَ مسیت ءِ زمین کساس شش سد (600) مربع میٹر بیت ـ مسیت ءِ نام مسلمانانی مقدس تریں شھر "مکہ" ءِ نام ءِ سرا "مکّی مسیت" ایر کنگ بیت ـ مسیت ءِ ھمراہ یک کسانیں دینی مدرسہے ھم اڈ کنگ ءِ جار جنگ بیت ـ

پہ مسیت ءِ جوڑ کنگ ءَ دزآپ،   واش، میر جاوہ،  زابل ءَ گر داں سرباز،  سراوان ءُ پھرہ ءَ بلوچ رد بنت ءُ کاینت ـ اے مردم پہ مسیت ءَ مفت مزدوری کن انت ـ 1986 ءَ مسیت داں حدے ءَ تیار بیت ءُ ھمے سال ءَ پہ نماز ءَ ساڑی بیت ـ بژن بلے واجہ عبدالعزیز سالے ءَ پد چہ دنیا ءَ لڈ ایت ءُ رؤت ـ

مولوی عبدالعزیز ءَ پد واجہ ءِ مستریں ءُ شرتریں شاگرد مولوی عبدالحمید اسمعیل زھی دزآپ ءِ مستریں پیش امام نامینگ بیت ـ واجہ اسمعیل زھی بُندر ءَ رخشان ءِ مردم انت ءُ مروچی بلوچستان ءِ مستریں دینی رھدربر انت ـ

1990 ءَ مولوی عبدالحمید اسمعیل زھی مار ایت کہ اے مسیت ءُ مدرسہ ھم شھر ءِ زلورتاں پورا کت کنگ ءَ نہ انت ـ شور ءُ سلا ءَ پد مسیت ءَ پراہ کنگ ءِ جار جنگ بیت ـ کر گور ءِ زمین پہ مسیت ءَ زیرگ بنت ـ مسیت ءِ زمین چہ 600 مربع میٹر ءَ 32 ھزار مربع میٹر ءَ سر بیت ـ مسیت ءِ گمبد کہ پیسر ءَ پنچ بنت نوں 53 کنگ بنت ـ مدرسہ ھم سک باز پراہ کنگ بیت ـ

اے مسیت کوھنیں بلوچی ءُ ایرانی رھبند ءَ جوڑ کنگ بوتگ ـ الّم گوشت نہ کناں بلے لکھانی تہا مردم اد ءَ نماز کت کن انت ـ مدرسہ ھم مسیت ءِ بھر انت ـ اے مدرسہ ءَ رو دراتکی بلوچستان (پاکستان) ، اوگانستان،  کردستان ءَ بہ گر دنیا ءِ کنڈ کنڈ ءَ چے ھزارانی کچّ ءَ نودربر وانگ ءَ کاینت ـ

"مکّی مسیت دزآپ" چہ امام رضا ءِ مزار (مشھد) ءُ جمکران مسیت (قُم) ءَ رند ایران ءِ سیمی مستریں عبادت جاہ زانگ بیت ـ لھتیں گوش انت تھران ءِ امام خمینی مسیت سیمی انت ءُ مکّی چارمی ـ منی جند ءِ پٹ ءُ لوٹ ءِ رد ءَ امام خمینی مسیت چہ مکی ءَ سک باز کسان انت ـ مکّی مسیت دنیا ءِ پانزدہ مستریں مسیتاں چے یکے ـ اے تنیگا کُل بلوچستان (روکپتی ءُ رودراتکی ھر دو) ءِ مستریں مسیت انت ـ

مکّی مسیت ءِ اسپیتیں گُمبد سک ڈولدار انت ـ ایشی ءِ مینار چہ دور ءَ گندگ کاینت ءُ شھر ءِ براہ انت ـ مسیت چوش وَ برابر انت ءُ اد ءَ نماز ھم بوئگ ءَ انت بلے مسیت ءَ ڈولدار تر کنگ ءِ کار انگت برجم انت ـ

چوناھی ءَ مسیت نماز ءِ جاہ انت بلے اسلام ءِ پیغمبر ءِ زمانگ ءِ نبوی مسیت (مدینہ) ءِ رنگ ءَ اے روکپتی بلوچستان ءِ سیاسی ءُ دینی مرکز انت ـ پہ ھرچ سیاسی ءُ دینی جیڑہ ءِ گیش ءُ گیوار ءَ مردم وتی چمّاں مکی مسیت ءَ سک دینت کہ بارے مکی مسیت اے جیڑہ ءِ سرا چے رھشونی دنت ـ ایران ءِ صدارتی گچین کاری بہ بنت یا پارلیمنٹ ءِ،  شھر ءِ بلدیاتی گچین کاری بہ بنت یا میان استمانی جیڑہ مردم پہ رھشونی ءَ مکی مسیت ءِ نیمگ ءَ چار انت ـ پمشکا مسیت ءِ پیش امام مولوی عبدالحمید اسمعیل زھی ماں ایران ءَ نہ تھنا بلوچانی بلکیں کل اہل سنت مسلمانانی رھشون لیکگ بیت ءُ آئی ءِ گپ ءُ لیکہ سک باز ارزش دیگ بنت ـ

ایران ءِ حکومت ءَ سالے پیسر وھدے بلوچستان ءِ بھر ءُ بانگ ءِ لیکہ دیما آؤرت گڑا مکی مسیت ءَ آئی ءِ ترند بگیری کُت ـ ناچار حکومت پشت ءَ شُت ـ ھمے رنگ ءَ تربت ءَ حیات بلوچ ءِ کوش ءُ بانک کریمہ بلوچ ءِ کوش ھم مکّی مسیت ءَ ترند ایر جَت انت ءُ اے گوں بلوچ راج ءَ نارواھی لیک ایت ـ چیزے ماہ پیسر مکّی مسیت ءَ وتی مدرسہ ءَ بلوچی وانینگ ءِ جار ھم جتگ اَت نوں الّم نزاناں اے کار بوئگ ءَ انت یا نا ـ

مکّی مسیت بلوچ گُلزمین ءِ یک پجّارے ـ ھنچوش کہ نوٹرے ڈیم (Notre-Dame) ءِ چرچ فرانس ءِ یا تاج محل ہندوستان ءِ ـ