عبدالرزاق گرناہ ءِ گدار بھشت

عبدالرزاق گُرناہ ءِ گدار Paradise (بہشت) ءِ سرا 

کسانیں چمشانکے

                          وسیم احمد

@waseeem48

کسّہ یوسف نامیں 12 سالی بچکے ئیگ انت کہ آئی ءِ پت، آئی ءَ عزیز نامیں مردے ءِ گور ءَ پہ وامانی دیم ءَ دنت۔ یوسف عزیز ءَ وتی ناکو سرپد بیت یکوئی گُش ایت ناکو عزیز۔ گدار ءِ کسّہ کمّو دیم ءَ رؤت گڑا مئے دیم ءَ اے گپ پدر بیت کہ عزیز، یوسف ءِ ناکوگ نہ انت-

رودراتکی افریقہ ءِ دمگاں ڈُکال انت اے ھما سال انت کہ بُنڈاں ریزُم(رمیز) گیپت مردم ڈُکال ءِ سوب ءَ ھمے ریزماں ور انت۔

گدار ءِ وانگ ءَ چہ پد مردم ءَ سما کپ ایت اے دَور ءُ باریگ، جہانی اولی جنگ ءَ چہ کمّو پیسر انت۔ یورپی کالونسٹ نوک رودراتکی افریقہ ءِ دمگاں آیگ ءُ ھمود ءِ کار ءُ بار ءُ زمیناں وتی دست ءَ کنگ انت۔ گدارءِ گیشتری کارست کالونسٹانی سرا زھر انت۔ انچو یک کارستے اے گپ ءَ ھم جنت یورپی آسن وار انت۔

عزیز کاروباری مردمے۔ آ بازیں دمگاں رؤت پہ کاروبار ءِ واستہ۔ اے گدار ءِ پروٹاگونسٹ (protagonist) یوسف ھم ھمے سپراں گیشتر ھوار انت۔ اے سپراں درد، وشی ءُ گم درست ھوار انت۔ وانوکاں وتی گرپت ءَ کن انت۔

پئیگمبر یوسف ءُ گُرناہ ءِ یوسف:   

پئیگمبر یوسف ءِ داستان ءُ گرناہ ءِ گدارے protagonist ءِ کسّہ ءِ تہا بازیں ھمدپی گندگ ءَ کئیت۔ انچو پئیگمبر ءِ داستان ءِ تہا آئی ءِ برات آئی ءَ چات ءَ چگل دئے انت۔ انچو گدارءِ تہا یوسف ءِ پِت ءُ مات آئی ءَ وامانی دیم ءَ دئے انت۔

انچو کہ پئیگمبر ءِ داستان ءِ تہا عزیز نامیں مردے ءِ جَن ذلیخہ پہ آئی ءِ شررنگی ءَ آئی ءِ سرا شیدا بیت۔ انچو گدار ءِ تہا ھم عزیز ءِ جنین ذلیخہ یوسف ءِ شررنگی ءِ سرا شیدا بیت۔ آئی ءِ واھشت ھمیش انت کہ یوسف ءَ گوں ھمنیاد بہ باں۔

پئیگمبر ءِ داستان ءِ تہا ذلیخہ یکروچے یوسف ءَ لوٹائین ایت ءُ محل ءِ دروازگاں بند کنت کہ مناں وشی بہ دے ھمے وڑا گُرناہ ءِ ذلیخہ ھم یوسف ءَ لوگ ءَ لوٹائین ایت ءُ گُش ایت کہ مناں وشی بہ دے۔ یوسف تچان ءَ ڈنّ ءَ درکئیت ھمے درآیگ ءِ وھد ءَ آئی ءِ دُمبل دِرّگ بیت ھمے عزیز ءِ گورا یوسف ءِ بے گناھی ءِ ثبوت بیت۔ 

پئیگمبر واب گِند ایت کہ آئی ءَ یازدہ استال ، روچ ءُ ماہ سُجدہ کنگ انت۔ انچو گُرناہ ءِ یوسف واب گند ایت کہ کُچک دو پاد ءِ سرا آئی ءِ گورا اوشتوک انت۔ آیانی مزنیں دپ نیم ءَ پچ انت گجّ ءُ کپ انت۔ دوئیں یوسفانی واب راست بنت۔